រាជធានីភ្នំពេញ ៖ រថយន្ត TUNDRA ពណ៌ឈាមជ្រូក មួយគ្រឿង បើកដោយបុរសម្នាក់ក្នុងស្ថានភាពស្រវឹងស្រាបានពន្លះម៉ូតូស្មាស់ពីក្រោយ ខណៈឈប់ម៉ូតូចាំដឹកប្អូនស្រីនៅចំណុចមុខហាងមួយ តាមបណ្តោយផ្លូវលេខ១៩៨៦ និងប៉ើងប្រមាណ១០ម៉ែត្រ បណ្តាលឱ្យរងរបួសឃើញបែបនេះអ្នកបើកបររថយន្ត ស្មានតែអ្នកបើកម៉ូតូស្លាប់ក៏បន្ថែមល្បឿនយ៉ាងលឿនក្នុងបំណងរត់គេចខ្លួន ប៉ុន្តែបានប្រមាណ១គីឡូម៉ែត្រពីកន្លែងកើតហេតុរថយន្តក៏បានបោលទៅបុកផ្ទះល្វែងសង់អំពីឈើជាហាងគុយទាវនៅចំណុចខាងលិចស្តុបផ្សារដីហុយ ផ្លូវភ្នំពេញ-ហាណូយ រហូតបុកចូលពី មុខប្រមាណ៣ម៉ែត្រ បណ្តាលឱ្យខូចខាតសម្ភារក្នុងផ្ទះ រួមទាំងម៉ូតូ១គ្រឿងធ្វើឱ្យម្ចាស់ផ្ទះព្រលឹងចុងសក់ ។
ទោះបីជាយ៉ាងណាម្ចាស់ផ្ទះមិនមានរងរបួសនោះទេ ។ ហេតុការណ៍នេះបានកើតឡើងកាលពីវេលាម៉ោង១១និង១០នាទីយប់ថ្ងៃទី២៧ សីហា ២០១២ នៅក្នុងភូមិរោងចក្រ សង្កាត់ភ្នំពេញថ្មី ខណ្ឌសែនសុខ ។ ចំពោះម្ចាស់ផ្ទះដែលរងការខូចខាតដោយរថយន្តខាងលើបុកនោះឈ្មោះសាត ប៉ូល័ក្ខ ភេទស្រី អាយុ៣៣ឆ្នាំ ស្នាក់នៅភូមិ-សង្កាត់កើតហេតុខាងលើ។ ចំណែកជនរងគ្រោះជាអ្នកបើកម៉ូតូស្មាស់មិនបានស្គាល់អត្តសញ្ញាណនោះទេ ព្រោះត្រូវបានបញ្ជូនទៅមន្ទីរពេទ្យភ្លាមៗ ។
ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុរថយន្តបង្កខាងលើបើកដោយបុរសម្នាក់ ក្នុងស្ថានភាពស្រវឹងស្រាជោកជាំបោះពួយតាមបណ្តោយផ្លូវ១៩៨៦ ពីកើតទៅលិចស្រាប់តែមកដល់ចំណុចហាងរាត្រីភ្នំពេញ ក៏បានបុកចំពីក្រោយម៉ូតូស្មាស់ដែលបុរសម្នាក់កំពុងឈប់ចាំដឹកប្អូនស្រីចេញពីធ្វើការក្នុងហាង ហើយបុរសជិះម៉ូតូបានខ្ទាតចម្ងាយប្រមាណ១០ម៉ែត្រ ដោយអ្នកបើកបររថយន្តបង្កស្មានតែស្លាប់ក៏ព្យាយាមបើករត់ឆ្ពោះទៅទិសខាងលិចចម្ងាយ១គីឡូដីក៏ទៅបុកចូលក្នុងផ្ទះហាងគុយទាវតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ