បុរសកូរ៉េខាងត្បូងម្នាក់ បានត្រូវចាប់ខ្លួនកាលពីថ្ងៃទី២៧ សីហា ក្រោយពីរូបគេគប់លាមកមនុស្សទៅលើស្ថានទូតជប៉ុន ដើម្បីជាការតវ៉ាប្រឆាំងនឹងការទាមទារដែនដីរបស់ក្រុងតូក្យូនៅប្រជុំកោះ DOKDO ក្នុងសមុទ្រចិនខាងកើត ។ ភាពតានតឹងរវាងកូរ៉េខាងត្បូង និងជប៉ុនបានកើនឡើងភ្លាមៗ បន្ទាប់ពីទស្សនកិច្ចពុំធ្លាប់មានពីមុនមករបស់ប្រធានាធិបតីកូរ៉េខាងត្បូងលោកមីម្យុងបាក់នៅប្រជុំកោះ DOKDO កាលពីថ្ងៃទី១០ សីហា កន្លងមកនេះ ។
បុរសដែលមានត្រកូលឆយ ត្រូវចាប់ខ្លួនក្រោយពីរូបគេគប់លាមក២ដបប្រឆាំងស្ថានទូតជប៉ុនស្ថិតនៅកណ្តាលក្រុងសេអ៊ូល ក្រោយម៉ោង៦ព្រឹក ។ ដបលាមកទាំងនេះ គប់ធ្លាក់ក្បែរខ្លោងទ្វារចូលអគារស្ថានទូត ហើយពុំបណ្តាលឱ្យមានការខូចខាតសម្ភារអ្វីឡើយ ។ បុរសអាយុ៤៨ឆ្នាំរូបនេះថ្លែងប្រាប់ប៉ូលិសថា រូបគេធ្វើបែបនេះ ដើម្បីតវ៉ាប្រឆាំងការទាមទាររបស់ជប៉ុនយកដែនដីកូរ៉េ ។ លោកឆយត្រូវបានដោះលែងវិញក្រោយការបង់ប្រាក់ពិន័យ ៕
ចែករំលែកព័តមាននេះ