ខេត្តកំពង់ស្ពឺ ៖ ក្រុមចោរ៣នាក់ ក្នុងនោះស្រី២នាក់ ម្នាក់ប្រជាពលរដ្ឋ និងសមត្ថកិច្ចចាប់ខ្លួនបាន បន្ទាប់ពីពួកគេជិះម៉ូតូ២គ្រឿងមកសកម្មភាពបន្លំចូលទិញប៊ីចេង និងថ្មពិល នៅផ្ទះលក់គ្រឿងទេស និងលក់មាសមួយកន្លែង លួចយកលុយអស់៥លាន៥០ម៉ឺនរៀល លុយដុល្លារ៣១០០ និងមាស៩តម្លឹង នៅផ្សារក្រាំងចេក ភូមិក្រាំងចេក ឃុំក្រាំងចេក ស្រុកឧត្តុង កាលពីវេលាម៉ោង៧និង៣០នាទីព្រឹកថ្ងៃទី២៨ សីហា ២០១២ ខណៈឪពុកម្តាយមិននៅដោយមានកូនស្រីនៅលក់ ។
ចោរស្រីដៃឆើត ដែលត្រូវប្រជាពលរដ្ឋចាប់ខ្លួនបានឈ្មោះយឿន ស្រីរត្ន អាយុ១៧ឆ្នាំ ចំណែកបក្សពួក២នាក់ទៀត ជិះម៉ូតូគេចខ្លួនបាត់ ។ ការឃាត់ខ្លួនជនសង្ស័យនេះ សមត្ថកិច្ចដកហូតបានលុយខ្មែរមកវិញទាំងអស់ លុយដុល្លារ១០០ដុល្លារ និងមាស២តម្លឹងប៉ុណ្ណោះ ។ ម្ចាស់ផ្ទះដែលត្រូវចោរបន្លំលួចយកលុយនេះ ប្តីឈ្មោះចរិយាអាយុ៤៧ឆ្នាំ និងប្រពន្ធឈ្មោះលៀង អិតអាយុ៤៥ឆ្នាំ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ