ADផ្ទាំងផ្សព្វផ្សាយពាណិជ្ជកម្ម

ឆែកឆេរលំនៅឋានមួយកន្លែងសង្ស័យជាប់ពាក់ព័ន្ធសំណុំរឿងស្តុកប្រេងម្រះព្រៅនៅខណ្ឌដង្កោ

13 ឆ្នាំ មុន

២៨ ខែ សីហា ឆ្នាំ ២០១២ ម៉ោង ១០:១២

រាជធានីភ្នំពេញ ៖ លោកព្រះរាជអាជ្ញារងសាលាដំបូងរាជធានីភ្នំពេញ ឯក ឆេង ហួត សហការជាមួយកម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ និងអាជ្ញាធរមូលដ្ឋានបានចុះឆែកឆេរលំនៅឋានមួយកន្លែង ស្ថិតនៅតាមបណ្តោយផ្លូវលេខ២៧១ ផ្ទះលេខ២០៨ សង្កាត់បឹងសាឡាង ខណ្ឌទួលគោក ជាផ្ទះលក់ក្តារបន្ទះយីហោ ខេវីន កាលពីវេលាម៉ោង៨និង៣០នាទីព្រឹកថ្ងៃទី២៨ សីហា នេះ និងបានឃាត់ខ្លួនស្ត្រីជាម្ចាស់ផ្ទះម្នាក់ដើម្បីសាកសួរផងដែរ ។

ការឆែកឆេរនេះធ្វើឡើងបន្ទាប់ពីសមត្ថកិច្ចបានឃាត់ខ្លួនបុរសម្នាក់ឈ្មោះឡាយ វី អាយុ២៩ឆ្នាំ កាលពីវេលាម៉ោង៤និង៣០នាទីរសៀលថ្ងៃទី២៧ សីហា ដែលជាកូនរបស់ស្ត្រីម្ចាស់ផ្ទះខាងលើដែលជាប់ពាក់ព័ន្ធករណីសំណុំរឿងស្តុកប្រេងម្រះព្រៅនៅខណ្ឌដង្កោ ដែលត្រូវបានសមត្ថកិច្ចរឹបអូសបានកាលពីថ្ងៃទី១៩ សីហា កន្លងទៅ ។ ការឆែកឆេរនេះសមត្ថកិច្ចបានរកឃើញឯកសារមួយចំនួន និងបាននាំខ្លួនស្ត្រីម្នាក់ជាម្តាយរបស់ឈ្មោះឡាយ វី ដើម្បីសាកសួរ ។ រហូតមកដល់ពេលនេះ សមត្ថកិច្ចបានបញ្ជូនខ្លួនស្ត្រីខាងលើ និងកូនប្រុសឈ្មោះឡាយ វី ទៅសាលាដំបូងរាជធានីភ្នំពេញហើយ។