ឧទ្ធម្ភាចក្រមួយគ្រឿងរបស់កងទ័ពស៊ីរីបានធ្លាក់កាលពីថ្ងៃទី២៧ សីហា នៅក្រុងដាម៉ាស់ នាឱកាសមានការប្រយុទ្ធគ្នាយ៉ាងសាហាវនានារវាងកងទ័ព និងពួកឧទ្ទាមដែលអះអាងថា បានបាញ់ធ្លាក់ឧទ្ធម្ភាគចក្រនោះ ដើម្បីសងសឹកឱ្យអ្នកស្លាប់ជាច្រើនរយនាក់ ដោយសារការវាយលុករបស់កងយោធានៅតំបន់ដារ៉ាយ៉ា ជាយក្រុងដាម៉ាស់ ។
ទូរទស្សន៍រដ្ឋប្រកាសថា ឧទ្ធម្ភាគចក្រមួយគ្រឿងបានធ្លាក់ក្នុងសង្កាត់កាប៊ូន ភាគខាងកើតក្រុងដាម៉ាស់ ។ អ្នកនាំពាក្យម្នាក់របស់ពួកឧទ្ទាមនិយាយថា មនុស្សរបស់គេបានបាញ់ធ្លាក់ ឧទ្ធម្ភាគចក្រនោះ ។ នេះជាការសងសឹកក្រោយការសម្លាប់រង្គាលនៅដារ៉ាយ៉ា។
យោងតាមអង្គការសិទ្ធិមនុស្សស៊ីរី OSDH ថា ការប្រយុទ្ធគ្នាយ៉ាងសាហាវនៅបន្តក្នុងសង្កាត់ជាច្រើនភាគឦសាន ក្រុងដាម៉ាស់ ។
ការវាយប្រហារយ៉ាងខ្លាំងក្លាក៏កើតមានផងដែរ នៅទីក្រុងអាឡែប ។ យោងតាម OSDH ថា មនុស្សយ៉ាងតិច៦៤នាក់ស្លាប់ក្នុងអំពើហិង្សាកាលពីថ្ងៃទី២៧ សីហា ។ នៅដារ៉ាយ៉ា ចម្ងាយ៧គ.ម ខាងត្បូងក្រុងដាម៉ាស់នាថ្ងៃទី២៧ សីហា នោះគេរកឃើញសាកសពមនុស្សថ្មី១៤នាក់ ទៀត ។ ពួកប្រឆាំងស៊ីរីបានបរិហារពីការសម្លាប់រង្គាលនៅដារ៉ាយ៉ា ដោយផ្សាយរូបភាពនានាបង្ហាញសាកសពមនុស្សជាច្រើនរយនាក់ដែលត្រូវគេសម្លាប់ ៕
ចែករំលែកព័តមាននេះ