ខេត្តរតនគីរី ៖ សត្វព្រៃគ្រប់ប្រភេទត្រូវបានក្រុមឈ្មួញចាប់យកទៅលក់នៅប្រទេសវៀតណាម កាលពីថ្ងៃទី២៦ សីហា ២០១២ វេលាម៉ោង៦ព្រឹកនៅតំបន់ព្រៃរបោះ ដាច់រយាល ស្ថិតក្នុងភូមិតាវែងក្រោម ឃុំតាវែង ស្រុកតាវែង ។
ជាក់ស្តែងភ្នាក់ងារកាសែតបានថតរូបសត្វព្រៃមួយក្បាលជាប្រភេទសត្វឈ្លូស ដែលក្រុមព្រានព្រៃមួយក្រុមដាក់អន្ទាក់បាន ហើយកាត់ជើងទាំង៤របស់វា និងក្បាលវះពោះយកគ្រឿងក្នុងចេញអស់យកខ្លួនទៅលក់ឱ្យម៉ូយលក់តាមទីផ្សារ ។ តាមប្រភពព័ត៌មានពីបងប្អូនជនជាតិភាគតិចដែលពួកគាត់មានទម្លាប់រស់នៅតាមតំបន់ព្រៃបានឱ្យដឹងថា ៥-៦ឆ្នាំមុនសត្វព្រៃគ្រប់ប្រភេទនៅតំបន់ស្រុកតាវែង នេះសំបូរណាស់ពេលយប់ឡើងពពួកសត្វព្រៃដើររកស៊ីចំណីពេលយប់ក្បែរៗរោងស្នាក់នៅរបស់គាត់ តែមកដល់បច្ចុប្បន្ននេះក្នុងមួយឆ្នាំពួកគាត់មិនដែលបានឃើញសត្វព្រៃដូចពេលមុនៗទៀតទេ មូលហេតុរលាយហិនហោចសត្វព្រៃអស់របៀបនេះ ដោយសារតែក្រុមព្រានព្រៃបានប្រើប្រាស់កាំភ្លើងបរបាញ់សត្វព្រៃពេលយប់ជាច្រើនក្រុមនឹងដាក់អន្ទាក់ ជាពិសេសនោះព្រៃដែលពពួកសត្វទាំងអស់នោះរស់នៅត្រូវបានក្រុមហ៊ុនដីសម្បទានកាប់បំផ្លាញជំរករបស់វាអស់រលីង ។ ចំពោះសត្វព្រៃដែលគេចាប់បាននៅរស់វិញដូចជាពស់វែក ត្រកួត អណ្តើក កន្ធាយ កូនសារិកាកែវ ពពួកសត្វព្រៃទាំងអស់នេះត្រូវបានក្រុមឈ្មួញជនជាតិវៀតណាមធ្វើការជួញដូរតាមផ្លូវងងឹតយ៉ាងសកម្មផងដែរ ដោយនាំចេញតាមរថយន្តទំនើបៗតាមច្រកទ្វារអន្តរជាតិអូរយ៉ាដាវ ដោយបន្លំជារថយន្តទេសចរណ៍ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ