ខេត្តបាត់ដំបង ៖ យុវជន២នាក់ដែលត្រូវជាបងប្អូនជាជីដូនមួយនឹងគ្នា បានត្រូវសមត្ថកិច្ចឃាត់ខ្លួនកាលពីវេលាម៉ោង១២ថ្ងៃត្រង់ថ្ងៃទី២៧ សីហា នៅនឹងផ្ទះរបស់ពួកគេ ស្ថិតក្នុងភូមិចំការសំរោង២ សង្កាត់ចំការសំរោង ក្រុងបាត់ដំបង ក្រោយពីសង្ស័យថា ពួកគេបានព្រួតគ្នាចាប់រំលោភនាងក្រមុំម្នាក់នៅផ្ទះជួលមួយកន្លែងកាលពីយប់ថ្ងៃសៅរ៍សប្តាហ៍មុន ក្នុងគ្រាដែលនាងស្រវឹងស្រាក្នុងកម្មវិធីខួបកំណើតមិត្តភក្តិ ។
ជនសង្ស័យដែលត្រូវឃាត់ខ្លួននេះ ម្នាក់ឈ្មោះលិញ ប៊ុនថង អាយុ២១ឆ្នាំ ជាកូនប្រុសលោកមេភូមិចំការសំរោង និងម្នាក់ទៀតឈ្មោះរឿម ចន្នី ហៅភ័ក្ត្រ អាយុ២០ឆ្នាំ ។ មន្ត្រីនគរបាលការិយាល័យព្រហ្មទណ្ឌកម្រិតធ្ងន់ឱ្យដឹងថា ពួកគេទាំង២នាក់ត្រូវនារីរងគ្រោះចោទប្រកាន់ថា បានចាប់នាងរំលោភម្តងម្នាក់ក្នុងបន្ទប់ផ្ទះជួលមួយកន្លែង ក្នុងក្រុងបាត់ដំបង កាលពីវេលាម៉ោង៧ និង៣០នាទីយប់ថ្ងៃទី២៥ សីហា ខណៈនាងស្នាក់នៅ២នាក់មិត្តភក្តិស្រីដែលគ្រានោះពួកនាងស្រវឹងស្រា ។
នារីរងគ្រោះបានប្រាប់សមត្ថកិច្ចថា នាងបានធ្វើពិធីខួបកំណើត ហើយបានហៅមិត្តភក្តិប្រុស ស្រីចូលរួមប្រហែលជិត១០នាក់ ក្នុងនោះឈ្មោះថង និងឈ្មោះភ័ក្ត្រ ក៏បានចូលរួមដែរ ។ កម្មវិធីបានចាប់ផ្តើមពីម៉ោង៣រសៀលនាថ្ងៃនោះ រហូតដល់ម៉ោង៦ល្ងាចទើបចប់ ឯមិត្តភក្តិផ្សេងទៀតក៏នាំគ្នាចេញទៅផ្ទះរៀងៗខ្លួនអស់ ហើយនាង និងមិត្តភក្តិម្នាក់នោះក៏បានដេក ព្រោះស្ររឹងខ្លាំងពេក ។ នាងបន្តថា លុះទៅម៉ោង៧ និង៣០នាទីយប់ថ្ងៃដដែលនោះ ពេលពួកនាងកំពុងដេកស្រាប់តែឈ្មោះថង និងឈ្មោះភ័ក្ត្រ បានជិះម៉ូតូមកដាស់ពួកនាងដោយប្រាប់ថា ពួកគេភ្លេចកាបូបលុយ ហើយនាងក៏បើកទ្វារ ប៉ុន្តែពួកគេបែរជាមកចាប់ឱបថើបពួកនាងទៅវិញ ។ លុះពេលនាងចូលក្នុងបន្ទប់ស្រាប់តែឈ្មោះថង ចូលទៅចាប់នាងរំលោភទាំងកំរោលហើយដោយនាងស្រវឹងខ្លាំងពេកមិនអាចរើរួចឡើយ ។ រីឯឈ្មោះភ័ក្ត្រ នៅខាងក្រៅបន្ទប់បានចាប់ឱបមិត្តភក្តិរបស់នាងដែរ ប៉ុន្តែក្រោយពេលឈ្មោះថង រំលោភនាងរួចភ្លាម ឈ្មោះភ័ក្ត្រ ក៏បានចូលមកចាប់នាងរំលោភម្តង ហើយឈ្មោះថងបានចេញមកឱបថើបមិត្តភក្តិវិញដែរ ។
ក្រោយពីរំលោភនាងរួចពួកគេបានជិះម៉ូតូចេញទៅវិញបាត់ លុះនៅថ្ងៃទី២៦ សីហា ពួកនាងក៏បាននាំគ្នាទៅប្តឹងសមត្ថកិច្ចតែម្តង ។ នាងបញ្ជាក់ដែរថា នាង និងឈ្មោះថង ឈ្មោះភ័ក្ត្រ នេះមិនធ្លាប់ស្រឡាញ់គ្នាទេ រីឯនារីជាមិត្តភក្តិនាងនិយាយដែរថា ពេលនោះពួកនាងស្រវឹងខ្លាំងដូចគ្នា ។ នាងប្រាប់ថា ឈ្មោះថង និងឈ្មោះភ័ក្ត្រ ពិតជាបានរំលោភមិត្តភក្តិរបស់នាងនៅក្នុងបន្ទប់មែន ឯរូបនាងដេកនៅខាងក្រៅពួកគេមិនបានរំលោភទេ ដោយសារនាងអង្វរពួកគេ តែពួកគេបានចាប់ឱបថើបនាងគ្មានប្រណីដែរ ។ នាងបន្ថែមថា ពេលឈ្មោះថង កំពុងរំលោភមិត្តភក្តិក្នុងបន្ទប់នាងបម្រុងចូលទៅជួយដែរ តែត្រូវឈ្មោះភ័ក្ត្រ ចាប់នាងជាប់មិនឱ្យជួយទេ ។ ក្រោយពីធ្វើសកម្មភាពលើពួកនាងអស់ចិត្ត ពួកគេក៏ជិះម៉ូតូចេញទៅបាត់ទៅ ។
នៅពេលសាកសួរ ជនត្រូវចោទទាំង២នាក់សារភាពថា ពួកគេពិតជាបានប្រព្រឹត្តដូច្នេះមែន ។ ឈ្មោះលិញ ប៊ុនថង សារភាពថា ខ្លួនបានប្រើល្បិចប្រាប់នាងថា មកដូរស្បែកជើងព្រោះច្រឡំ លុះពេលនាងបើកទ្វារពួកខ្លួនចូលទៅឃើញនាងក្អួត ខ្លួនក៏ជួយគ្រាហ៍នាងម្នាក់ទៅបន្ទប់ទឹក ហើយពេលចូលបន្ទប់ដេកវិញខ្លួនក៏ចាប់រំលោភនាងតែម្តង ។ រីឯឈ្មោះរឿម ចន្នី ហៅភ័ក្ត្រ វិញបានសារភាពដែរថា ខ្លួនពិតជាបានរំលោភនាងមែន ក្រោយពីឈ្មោះថងរំលោភរួច ។ ជននេះថា ពេលទៅដល់បន្ទប់នាងខ្លួនបានប្រើល្បិចថា ភ្លេចកាបូបលុយ នាងក៏បើកទ្វារឱ្យពួកគេចូលហើយក៏ធ្វើសកម្មភាពទៅលើនាងតែម្តង ។
លោកជេត វណ្ណនី ស្នងការរងនគរបាលខេត្តបានឱ្យដឹងដែរថា តាមការបំភ្លឺពីនាងរងគ្រោះ និងចម្លើយរបស់ជនសង្ស័យទាំង២នាក់ គឺជនទាំង២នាក់នេះមានគំនិតទុច្ចរិតរួចស្រេចទៅហើយ ដើម្បីប្រព្រឹត្តទៅលើពួកនាង ដែលពួកគេឆក់ឱកាសពេលឃើញពួកនាងស្រវឹងខ្លាំង ។ តាមសាក្សីខ្លះនិយាយថា ជនទាំង២នាក់នេះមានគម្រោងចង់ធ្វើបាបពួកនាងតាំងពីព្រលប់ តែមិនមានឱកាស លុះពេលអ្នកចូលរួមកម្មវិធីចេញស្ងាត់ពីផ្ទះជួលអស់ក៏នាំគ្នាប្រើល្បិចធ្វើបាបពួកនាងតែម្តង ៕
ចែករំលែកព័តមាននេះ