រាជធានីភ្នំពេញ ៖ មន្ត្រីជំនាញបានអះអាងថា អត្រាស្លាប់ដោយជំងឺគ្រុនឈាមក្នុងសប្តាហ៍ទី៣០ដល់សប្តាហ៍ទី៣២ ឆ្នាំ២០១២ នេះ មានការកើនឡើងខុសធម្មតាក្នុងនោះសប្តាហ៍ទី៣០អត្រាស្លាប់មានរហូតដល់២១នាក់ សប្តាហ៍ទី៣១ស្លាប់៩នាក់ និងសប្តាហ៍ទី៣២ មានចំនួន៨នាក់។
លោក ច ម៉េងចួ នាយកមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ បានបញ្ជាក់ថា មូលហេតុដែលអត្រាស្លាប់មានការកើនឡើង គឺដោយសារអ្នកជំងឺមានករណីធ្ងន់ធ្ងរ មានសញ្ញាហូរឈាមតាមផ្លូវរំលាយអាហារ ហើយភាគច្រើនចូលព្យាបាលនៅតាមសេវាឯកជនជាមុន ក្នុងនោះទឹកចូលសួតប្រមាណ៣៥ភាគរយ ដោយសារតែមន្ទីរព្យាបាលឯកជនបានបញ្ចូលសេរ៉ូមហួសកម្រិតនាំឱ្យជំងឺកាន់តែធ្ងន់មិនអាចជួយសង្គ្រោះបាន ហើយពេលបញ្ជូនទៅព្យាបាលនៅតាមសេវាសាធារណៈ ឬមន្ទីរពេទ្យរដ្ឋក៏ស្លាប់តែម្តង ។
លោក ច ម៉េងចួ បានរំលឹកថា មកដល់សប្តាហ៍ទី៣៣ ឆ្នាំ២០១២ នេះ ករណីជំងឺគ្រុនឈាមចូលសម្រាកព្យាបាលតាមសេវាសាធារណៈមានចំនួន២៧.៥៩២នាក់ ក្នុងនោះស្លាប់១១១នាក់ ក្នុងអត្រា០,៤ភាគរយ ។ ករណីឈឺកើន១៥០ភាគរយ បើប្រៀបធៀបនឹងឆ្នាំ២០១១ ប៉ុន្តែអត្រានេះទាបជាងឆ្នាំ២០០៧ ដែលជាឆ្នាំគោលនៃការផ្ទុះជំងឺគ្រុនឈាម ។ ខេត្តដែលមានអត្រាជំងឺគ្រុនឈាមខ្ពស់ជាងគេគឺ ខេត្តបន្ទាយមានជ័យ សៀមរាប ឧត្តរមានជ័យ កណ្តាល កំពង់ស្ពឺ កំពង់ឆ្នាំង កំពង់ធំ ព្រៃវែង កំពង់ចាម និងព្រះវិហារ ។ ចំណែកខេត្តដែលគ្មានផ្ទុះការរាតត្បាត គឺពោធិ៍សាត់ មណ្ឌលគិរី ស្ទឹងត្រែង និងរតនគិរី ។
លោកនាយកមជ្ឈមណ្ឌលបានអំពាវនាវឱ្យប្រជាពលរដ្ឋទូទាំងប្រទេសអនុវត្តនូវចំណុចជាគន្លឹះចំនួន៤ដើម្បីទប់ស្កាត់ និងការពារការឆ្លងជំងឺគ្រុនឈាមក្នុងនោះរួមមាន ត្រូវកម្ចាត់ដង្កូវទឹកដែលជាកាតព្វកិច្ចគ្រួសារ និងសហគមន៍ ខណៈដែលសាកលលោកពុំទាន់មានប្រទេសណាមួយបានចំណាយបុគ្គលិកចុះសម្អាតតាមផ្ទះប្រជាជនទេ ប៉ុន្តែបើមានចុះតាមផ្ទះគឺចុះផាកពិន័យ បើគេដឹងថាមានដង្កូវទឹក ។ រដ្ឋមានកាតព្វកិច្ចជូនព័ត៌មានត្រឹមត្រូវដល់ប្រជាជន ។ ត្រូវយល់ថាគ្រុនឈាមមិនអាចព្យាបាលតាមផ្ទះ ឬតាមភូមិដូចគ្រុនចាញ់ទេ ហេតុនេះមាតាបិតាមានកាតព្វកិច្ចបញ្ជូនកុមារសង្ស័យទៅមន្ទីរពេទ្យ ។ ទោះគ្រូពេទ្យឯកទេសចូលក្នុងផ្ទះប្រជាជនក៏គង់តែបញ្ជូនកុមារកើតជំងឺគ្រុនឈាមទៅកាន់មន្ទីរពេទ្យដដែល ។ ការចូលរួមចលនាដាក់ថ្នាំអាបែតជាផ្នែកមួយការពារមិនឱ្យមានដង្កូវទឹកក្នុងពាង ប៉ុន្តែមិនការពារដង្កូវទឹកនៅក្រៅពាងដូចជាសម្បកដូង កង់រថយន្ត កំប៉ុង ទឹកថ្លុក ភក់ជ្រាំនេះទេ ។ សូមឱ្យកុមារស្លៀកពាក់សម្លៀកបំពាក់វែងៗពេលរត់លេង ហើយបើកុមារគេងទោះពេលថ្ងៃ ឬយប់សូមគេងក្នុងមុង ៕
ចែករំលែកព័តមាននេះ