រាជធានីភ្នំពេញ ៖ អ្នកមើលការបុរីមួយកន្លែង ២នាក់បងប្អូនក្នុងចំណោមបក្សពួកប្រមាណជិត១០នាក់ ត្រូវកម្លាំងគណៈបញ្ជាការឯកភាពខណ្ឌទួលគោក ដឹកនាំដោយលោកសាំង សុភៈវិចិត្រ អភិបាលរងខណ្ឌ សហការជាមួយសមត្ថកិច្ចខណ្ឌសែនសុខ ចាប់ខ្លួនកាលពីវេលាម៉ោង១០ និង៣០នាទីយប់ថ្ងៃទី២៦ សីហា នៅពេលប្រើហិង្សាចូលទៅកាប់គូទំនាស់របស់ខ្លួនដល់ក្នុងផ្ទះ បណ្តាលឱ្យរងរបួសធ្ងន់ម្នាក់បញ្ជូនទៅកាន់មន្ទីរពេទ្យព្រះកុសុមៈ ហើយជនបង្ករូបនោះរត់ចូលក្នុងបុរីដែលស្ថិតនៅក្នុងសង្កាត់ភ្នំពេញថ្មី ខណ្ឌសែនសុខ ។
ការចាប់ខ្លួនត្រូវបានធ្វើឡើងក្នុងរយៈពេលប្រមាណជិត៣ម៉ោងក្រោយពីកើតមានអំពើហិង្សាកាលពីវេលាម៉ោង៧ និង២០នាទីយប់ថ្ងៃទី២៦ សីហា នៅផ្ទះលេខ៤៨ ផ្លូវលេខ៥៩៨ សង្កាត់បឹងកក់ទី២ ខណ្ឌទួលគោក ហើយបង្កឱ្យមានការភ្ញាក់ផ្អើលយ៉ាងខ្លាំងផងដែរពីសំណាក់ក្រុមកម្មករ និងបានធ្វើការគំរាមកំហែងមកលើសមត្ថកិច្ច ។ នៅក្នុងប្រតិបត្តិការបង្ក្រាបជនបង្ករបួសស្នាមនេះ សមត្ថកិច្ចបានឃាត់ខ្លួនក្រុមកម្មករទាំងអស់៦នាក់ ប៉ុន្តែជាប់ពាក់ព័ន្ធតែ២នាក់បងប្អូនទេ ។
ជនដៃដល់ដែលត្រូវចាប់ខ្លួននេះ ម្នាក់ឈ្មោះទេព រី ភេទប្រុស អាយុ៣៥ឆ្នាំ និងម្នាក់ទៀតឈ្មោះអាំ ពៅ ភេទប្រុស អាយុ២០ឆ្នាំ ជាជាងសំណង់ ។ អ្នកទាំងពីរនាក់ជាបងប្អូននឹងគ្នា មានទីលំនៅភូមិប្រសូត ឃុំប្រសូត ស្រុកស្វាយទាប ខេត្តស្វាយរៀង ។ ចំណែកជនរងគ្រោះឈ្មោះគៀង ធី ភេទប្រុស អាយុ៤៦ឆ្នាំ ជាបុគ្គលិកក្រុមហ៊ុនមិត្តហ្វូន មានទីលំនៅផ្ទះលេខ៤៨ ផ្លូវលេខ៥៩៨ សង្កាត់បឹងកក់ទី២ ខណ្ឌទួលគោក បានរងរបួសក្បាលពីក្រោយ ចិញ្ចើម និងមាត់ធ្ងន់ធ្ងរ ហើយត្រូវបានបញ្ជូនទៅកាន់មន្ទីរពេទ្យព្រះកុសុមៈ ។
ស្ត្រីឈ្មោះជា ដានី ត្រូវជាប្រពន្ធជនរងគ្រោះឱ្យដឹងថា ក្រុមជនបង្កមានបក្សពួកប្រមាណជិត១០នាក់បានចូលទៅវាយ និងកាប់ប្តីគាត់នឹងពូថៅដល់ក្នុងផ្ទះ បន្ទាប់ពីមានទំនាស់គ្នារឿងជននោះចតម៉ូតូបាំងផ្លូវ ហើយប្តីរបស់គាត់ទៅប្រាប់ ។ តាមព័ត៌មានឱ្យដឹងទៀតថា នៅវេលាម៉ោង៧ និង២០នាទីយប់ថ្ងៃទី២៦ សីហា ជនដៃដល់ឈ្មោះអាំ ពៅ បានជិះម៉ូតូមួយគ្រឿងមកចតនៅច្រកផ្លូវចូលផ្ទះដែលមានទទឹងប្រមាណជាង១ម៉ែត្រ ។ ខណៈនោះបុរសឈ្មោះគៀង ធី បានទៅប្រាប់ឱ្យយកម៉ូតូចេញ ក៏កើតជាទំនាស់ពាក្យសម្តី និងឈានទៅរកការប្រវាយប្រតប់គ្នា ហើយត្រូវក្រុមជននោះបានទៅហៅបក្សពួកដែលជាកម្មករប្រមាណជិត១០នាក់ចូលទៅក្នុងផ្ទះជនរងគ្រោះកាប់នឹងពូថៅបណ្តាលឱ្យរងរបួសធ្ងន់ រួចរត់គេចខ្លួនឆ្លងផ្លូវលេខ៥៩៨ទៅចូលក្នុងបុរីវិញ ។
បន្ទាប់ពីកើតមានរឿងរ៉ាវខាងលើ លោកសាំង សុភៈវិចិត្រ អភិបាលរងខណ្ឌ និងសមត្ថកិច្ចក៏បានចុះទៅអន្តរាគមន៍ ហើយរាយការណ៍ទៅលោកព្រះរាជអាជ្ញាដើម្បីចាប់ខ្លួនជនជាប់ចោទ២នាក់ដែលបង្ករបួសធ្ងន់ ៕
ចែករំលែកព័តមាននេះ