រាជធានីភ្នំពេញ ៖ អ្នកជួញដូរគ្រឿងញៀនដ៏សកម្ម៣នាក់ និងអ្នកបើកបរម្នាក់មិនទាន់ត្រូវបានបញ្ជូនទៅកាន់តុលាការនៅឡើយ ព្រោះបន្ទាប់ពីឃាត់ខ្លួនពីរនាក់ប្តី-ប្រពន្ធក្រោយការចាប់ខ្លួនលោកផ្កាយ២ ចាន់ ឫទ្ធីឌី នោះ សមត្ថកិច្ចសួរនាំ២នាក់ប្តី-ប្រពន្ធនេះមិនទាន់អស់ និងកំពុងកសាងសំណុំរឿងយ៉ាងប្រុងប្រយ័ត្ន… ហើយការបញ្ជូនពួកគេទៅតុលាការគ្រោងនឹងធ្វើនៅថ្ងៃទី២៨ សីហា ២០១២ ។
សូមបញ្ជាក់ថា យោងតាមចម្លើយសារភាពរបស់លោកឧត្តមសេនីយ៍ទោ ចាន់ ឫទ្ធីឌី ដែលត្រូវបានឃាត់ខ្លួនពាក់ព័ន្ធការជួញដូរគ្រឿងញៀននោះ នៅវេលាម៉ោង៤និង១៥នាទីរសៀលថ្ងៃទី២៦ សីហា ២០១២ ប៉ូលិសប្រយុទ្ធប្រឆាំងគ្រឿងញៀនក្រសួងមហាផ្ទៃបានបន្តទៅឆែកឆេរនៅហាងសំអាងការមួយកន្លែងឈ្មោះ រតនាពេជ្រសំអាងការ ស្ថិតក្នុងភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ ដែលជាបក្សពួកទទួលយកគ្រឿងញៀនទៅចែកចាយបន្ត ។
ជាមួយនឹងការឆែកឆេរកន្លែងថ្មីនេះ ប៉ូលិសបានឃាត់ខ្លួនមនុស្សប្រុស-ស្រី២នាក់ប្តី-ប្រពន្ធបន្ថែមទៀត ដែលបុរសជាប្តីឈ្មោះឌៀប ស៊ុនឡាយ អាយុ៥១ឆ្នាំ ប្រពន្ធឈ្មោះញ៉ម សុខា អាយុ៤៩ឆ្នាំ ។ ប៉ូលិសនៅបានដកហូតជញ្ជីងថ្លឹងគ្រឿងញៀនមួយគ្រឿង, ថ្នាំញៀនម៉ាទឹកកក៩៨៩,៩ក្រាម, យ៉ាម៉ា៣.៧១៩,៥ក្រាម និងរថយន្តកាមរីស៊េរីបាឡែនពណ៌ទឹកប្រាក់ ១គ្រឿង ។
លោកខៀវ សាម៉ន ប្រធានមន្ទីរប្រយុទ្ធប្រឆាំងគ្រឿងញៀននៃក្រសួងមហាផ្ទៃដែលដឹកនាំកម្លាំងចុះបង្ក្រាបអ្នកជួញដូរគ្រឿងញៀនដ៏ធំនេះ បានមានប្រសាសន៍ថា សមត្ថកិច្ចនៅតែបន្តរុករកបក្សពួក និងកន្លែងផលិត-ចែកចាយគ្រឿងញៀននេះជាបន្តទៀត រហូតមានភស្តុតាង និងឯកសារគ្រប់គ្រាន់ ទើបកសាងសំណុំរឿងបញ្ជូនទៅកាន់តុលាការ ។
គួររំលឹកថា ឧត្តមសេនីយ៍ទោយោធាម្នាក់ លោកចាន់ ឫទ្ធីឌី ជានាយរងកងទ័ពជើងគោកត្រូវបានសមត្ថកិច្ចនគរបាលនៃមន្ទីរប្រឆាំងគ្រឿងញៀនសហការជាមួយអាជ្ញាធរខណ្ឌមានជ័យ ព័ទ្ធចាប់ខ្លួននៅក្នុងបរិវេណភូមិ គ្រឹះដ៏ស្កឹមស្កៃមួយកន្លែងគ្មានពីរ ស្ថិតនៅភូមិអូរអណ្តូង សង្កាត់ព្រែកប្រា ខណ្ឌមានជ័យ កាលពីវេលាម៉ោង៣រសៀល ថ្ងៃទី២៤ សីហា ឆ្នាំ២០១២ ។
តាមប្រភពព័ត៌មានពីមន្ត្រីសមត្ថកិច្ចចម្រុះក្នុងប្រតិបត្តិការខាងលើ បានឱ្យថា មុនពេលឈានដល់ការឃាត់ខ្លួនឈ្មោះ ចាន់ ឫទ្ធីឌី គឺនគរបាលជំនាញបានធ្វើការស្រាវជ្រាវអស់រយៈពេលជាងមួយខែកន្លងមកហើយ ទើបកំណត់បានមុខសញ្ញាដ៏ធំម្នាក់នេះ ។
មុនការចាប់ខ្លួន គឺសមត្ថកិច្ចបានប្រើប្រាស់កម្លាំងជំនាញអន្ទងទិញថ្នាំញៀនពីឈ្មោះ ចាន់ ឫទ្ធីឌី ចំនួនពីរខាំ ។ ពេលនោះឈ្មោះ ចាន់ ឫទ្ធីឌី ក៏បានយកថ្នាំញៀនប្រភេទម្សៅមកលក់ឱ្យម៉ូយតាមទីតាំងដែលបានណាត់ជួបគ្នា ។ ពេលគាត់យកថ្នាំញៀនមកដល់ក៏ត្រូវក្រុមសមត្ថកិច្ចព័ទ្ធចាប់តាមដងផ្លូវ ប៉ុន្តែត្រូវឈ្មោះចាន់ ឫទ្ធីឌី ជិះរថយន្តម៉ាកធុនដ្រា មួយគ្រឿង បើករត់សំដៅទៅចូលភូមិគ្រឹះរបស់ខ្លួន ជាហេតុធ្វើឱ្យសមត្ថកិច្ចជំនាញបង្ខំចិត្តធ្វើការឡោមព័ទ្ធចាប់ខ្លួនឈ្មោះចាន់ ឫទ្ធីឌី នៅក្នុងភូមិគ្រឹះតែម្តង និងធ្វើការឆែកឆេរលំនៅឋានភ្លាមៗបានរកឃើញ ថ្នាំញៀនគ្រាប់ប្រមាណ២មឺុនគ្រាប់ និងប្រភេទម្សៅប្រមាណជាង២០កញ្ចប់ធំ ។
ក្រោយពេលចូលឆែកឆេរដល់ក្នុងលំនៅឋានដ៏ស្កឹមស្កៃរបស់ឈ្មោះចាន់ ឫទ្ធីឌី សមត្ថកិច្ចក៏បានឱ្យដឹងថា ឈ្មោះចាន់ ឫទ្ធីឌី គឺជាមុខសញ្ញារកស៊ីជួញដូរថ្នាំញៀនដ៏ធំមួយអស់រយៈពេលជាយូរមកហើយ និងពុំធ្លាប់ត្រូវបានចាប់ខ្លួនឡើយ ដោយសារឈ្មោះចាន់ ឫទ្ធីឌី ប្រកបមុខរបររកស៊ីបើកហាងបៀរហ្គាឌិន ផឹកស៊ីមួយកន្លែងយីហោរស្មីបឹងកេងកង បន្លំភ្នែកអ្នកដទៃដើម្បីបិទបាំងមុខរបរជួញដូរថ្នាំញៀនរបស់ខ្លួន ។
ចំពោះហាងរស្មីបឹងកេងកងនៅវេលាល្ងាចថ្ងៃដដែល ក្រុមសមត្ថកិច្ចបានចុះឆែកឆេររុករកថ្នាំញៀនបន្ត ប៉ុន្តែពុំទាន់ដឹងលទ្ធផលនៅឡើយទេ ។ ដោយឡែកប្រតិបត្តិការឆែកឆេរក្នុងភូមិគ្រឹះខាងលើ សមត្ថកិច្ចសម្រេចដកហូតបានរថយន្តចំនួន៤គ្រឿង មានម៉ាកធុនដ្រា មួយគ្រឿង ឡិចស៊ីស៤៧០ មួយគ្រឿង មែរសឺដេស មួយគ្រឿង និងរថយន្តប្រភេទទួរីសមួយគ្រឿង។ នៅក្នុងភូមិគ្រឹះដ៏ស្កឹមស្កៃនេះមិនមែនជាភូមិគ្រឹះធម្មតាឡើយ ដែលខាងក្នុងភូមិគ្រឹះនេះបំពាក់ដោយគ្រឿងសង្ហារឹមយ៉ាងប្រណីតបំផុតដែលមានតម្លៃរាប់លានដុល្លារ ៕
ចែករំលែកព័តមាននេះ