យោងទៅតាមប្រភពព័ត៌មានពីគេហទំព័រ chinesestar.com ចេញផ្សាយកាលពីថ្ងៃចន្ទទី២៧ សីហា ឆ្នាំ ២០១២ បានឱ្យដឹងថានាងការ៉ាត់ ឆឹង បានគ្រងមកុដបវរកញ្ញាឯកហុងកុងកាលពីរាត្រីថ្ងៃអាទិត្យ ទី២៦ សីហា ឆ្នាំ២០១២ កន្លងទៅនេះ ។ ការប្រឡងបវរក្រុងហុងកុង ឆ្នាំនេះត្រូវបានរៀបចំធ្វើឡើងដោយទូរទស្សន៍ TVB City នៅតំបន់មាត់សមុទ្រ Tseng Kwan O ។
ក្រៅពីទទួលបានមកុដបវរកញ្ញាឯក រាជនីសម្រស់ក្រុងហុងកុងវ័យ២៤ឆ្នាំរូបនេះ ទទួលបានពានរង្វាន់២ផ្សេងទៀត គឺពានរង្វាន់បវរកញ្ញា ឯកអគ្គរដ្ឋទូតសុឆន្ទៈអន្តរជាតិ និងពានរង្វាន់បវរកញ្ញាឯកអគ្គរដ្ឋទូតអាកាសចរណ៍ផងដែរ ។ ចំណែកឯចំណាត់ថ្នាក់លេខ២ បានទៅលើនាង Jacqudine Wong ជានិស្សិតអនុបណ្ឌិត និងចំណាត់ថ្នាក់លេខ៣ បានទៅលើនាង Tracy Chung វ័យ២៤ឆ្នាំ ជានិស្សិតថ្នាក់អនុបណ្ឌិតរដ្ឋបាល ។
បន្ទាប់ពីគណៈវិនិច្ឆ័យប្រកាសឈ្មោះជ័យលាភីតំណែងបវរកញ្ញាឯកហុងកុងឆ្នាំ២០១២ នាង ការ៉ាត់ ឆឹង និស្សិតថ្នាក់អនុបណ្ឌិតរូបនេះបាននិយាយថា «ខ្ញុំសប្បាយចិត្តខ្លាំងណាស់ ខ្ញុំមិនដែលគិតថាខ្ញុំអាចឈ្នះការប្រកួតនេះម្តងណាទេ»។កិច្ចការចម្បងរបស់នាងការ៉ាត់ ឆឹង នឹងត្រូវទៅចូលរួមប្រកួតបវរកញ្ញាពិភពលោកឆ្នាំ២០១៣ ដែលនឹងប្រារព្ធធ្វើឡើងនៅថ្ងៃទី១៤ កញ្ញា ឆ្នាំ២០១៣ នៅទីក្រុងហ្សាកាតា ប្រទេសឥណ្ឌូណេស៊ី ៕
ចែករំលែកព័តមាននេះ