រាជធានីភ្នំពេញ ៖ កីឡាករវ៉ែន ជីវ៉ុង មកពីក្លិបកងកេងមានឫទ្ធិខេត្តបាត់ដំបង រងការរិះគន់ និងព្រមានពីលោកអាជ្ញាកណ្តាលដោយសារចង់ស៊ីឡាក បន្ទាប់ពីត្រូវកីឡាករអីុ ប៊ុនថា មកពីក្លិបអេភូថងកីឡា អុកមួយជង្គង់ត្រូវចំប្រដាប់ការពារនៅក្នុងទឹកទី៣ កាលពីរសៀលថ្ងៃអាទិត្យទី២៦ សីហា នៅលើសង្វៀនស្ថានីយទូរទស្សន៍ CTN តែការអុកត្រូវនោះត្រូវគេមើលឃើញថា មិនធ្ងន់ធ្ងររហូតដល់ថ្នាក់មិនអាចប្រកួតបន្តទៀតបាននោះទេ ។ ការចង់ស៊ីឡាកនេះ ត្រូវលោកអាជ្ញាកណ្តាលសុខ វិជ័យ ព្រមានថា បើសិនជាគេមិនព្រមប្រកួតបន្តទៀតទេ លោកនឹងរាប់៨ហើយបញ្ឈប់ការប្រកួតតែម្តង ទើបគេសុខចិត្តប្រកួតទាំងអារម្មណ៍មិនសូវល្អ ។
នៅទឹកទី១ និងទី២ ជីវ៉ុង បានប្រើស្នៀត
ពិសេសៗដូចជា ស្នៀតកែង និងជង្គង់ជាដើមវាយប្រហារទៅលើប៊ុនថា យ៉ាងចាស់ដៃ ប៉ុន្តែត្រូវប៊ុនថា ទាត់សងវិញយ៉ាងរហ័សទៅលើល្វែងខាងក្រោមពេញៗតែម្តង ធ្វើឱ្យជីវ៉ុង ចាប់ផ្តើមទ្រុឌទ្រោមយ៉ាងខ្លាំង ។ លុះចូលដល់ទឹកទី៣ ប៊ុនថា បានជ្រុលជង្គង់បុកត្រូវចំប្រដាប់ការពារជីវ៉ុងដោយអចេតនាបណ្តាលឱ្យគេឈឺចុកចាប់យ៉ាងខ្លាំង និងបង្ហាញចេតនាមិនចង់ប្រកួតបន្តទៀតឡើយ បុ៉ន្តែលោកសុខ វិជ័យ បានព្រមានថា បើសិនជាគេមិនព្រមប្រកួតបន្តទេនោះនឹងត្រូវប្រកាសឱ្យចាញ់មិនខានឡើយ ទើបជីវ៉ុងយល់ព្រមប្រកួតបន្តរហូតបញ្ចប់ទឹកទី៥ហើយត្រូវចាញ់ពិន្ទុអីុ ប៊ុនថា ។
កីឡាករសុខ វាសនា មកពីក្លិបឃ្លាំងមឿងកីឡា ត្រូវអាជ្ញាកណ្តាលលោកងួន និត ប្រកាសឱ្យចាញ់កីឡាករឆាន់ ជឿន មកពីក្លិបរស្មីកុមារកំព្រានៅត្រឹមទឹកទី៣ ។ រវាងគូនេះបើទោះជាពួកគេមិនសូវមានបច្ចេកទេសវាយលុកដូចជើងចាស់មែន ប៉ុន្តែបានធ្វើឱ្យអ្នកទស្សនាមានការចាប់អារម្មណ៍យ៉ាងខ្លាំងជាមួយនឹងការបញ្ចេញស្នៀតពិសេសៗវាយសម្រុកគ្នាតាំងពីទឹកទី១មកម៉្លេះ ។ ក្នុងទឹកទី២ទាំងសងខាងនៅតែបង្កើនការវាយគ្នាទៅវិញទៅមកមិនដកថយឡើយ ប៉ុន្តែកម្លាំងរបស់វាសនាបានស្រុតចុះបន្តិចធ្វើឱ្យឆាន់ ជឿន មានឱកាសវាយសម្រុកតាមអំពើចិត្ត ។ ចូលដល់ទឹកទី៣ វាសនា ត្រូវឆាន់ ជឿន ជ្រុលជើងទាត់ត្រូវខ្នង ខណៈរូបគេបានដួលទាំងជំហរទៅហើយនោះ ក្នុងស្ថានភាពបែបនេះវាសនា មានបំណងចង់ឈ្នះដោយការស៊ីឡាកយ៉ាងពិតប្រាកដ ប៉ុន្តែក្រោយពីអាជ្ញាកណ្តាលរាប់៨រួច គេនៅតែមិនក្រោកទៀត ទើបអាជ្ញាកណ្តាលប្រកាសឱ្យចាញ់ដោយស្វ័យប្រវត្តិនៅត្រឹមទឹកទី៣ ។
នៅលើសង្វៀនដដែលកីឡាករធា រិទ្ធី មកពីក្លិបអេភូថងកីឡា ប្រកួតឈ្នះពិន្ទុកីឡាករលាភ សំណាង មកពីក្លិបកងពលតូចលេខ៧០ ។ កីឡាករវ៉ាន់ ចាន់វ៉េត មកពីក្លិបសិង្ហកីឡា ប្រកួតឈ្នះរឿម វណ្ណៈ មកពីសមាគមកីឡាប្រដាល់ក្រសួងការពារជាតិដោយពិន្ទុ ។ កីឡាករយឹម សាវុធ មកពីក្លិបភ្នំពេជ្រកីឡា ប្រកួតលក្ខណៈសាកលឈ្នះកីឡាករម៉ៃ ថៃប៊ិប មកពីសមាគមកីឡាប្រដាល់ក្រសួងការពារជាតិ ដោយពិន្ទុ ៕
ចែករំលែកព័តមាននេះ