រាជធានីភ្នំពេញ ៖ រហូតមកដល់ពេលនេះលោកអេ ភូថង អតីតកីឡាករល្បីឈ្មោះវ័យ៤១ឆ្នាំ បានដកខ្លួនទាំងស្រុងពីសង្វៀនប្រដាល់ ។ទោះយ៉ាងណាលោកនៅតែសកម្មក្នុងវិស័យមួយនេះដូចមុន បើទោះជាម្នាក់ៗស្មានថា លោកបានលាឈប់ពីអាជីពប្រដាល់បាត់ទៅហើយក្តី ។ អ្វីដែលសំខាន់ជាងនេះគឺលោកកាន់តែបង្កើនកេរ្តិ៍ឈ្មោះរបស់ខ្លួនមិនចាញ់កាលនៅឡើងរេញប៉ុន្មានទេ តាមរយៈមុខងារជាគ្រូបង្វឹកនៅក្នុងក្លិបផ្ទាល់ខ្លួនមួយដែលលោកបានបង្កើតឡើង ។
ដ្បិតថាអតីតកីឡាករជើងខ្លាំងលោកអេ ភូថង បានបញ្ឈប់ការឡើងរេញទាំងស្រុងតាំងពីឆ្នាំ២០០៨ ប៉ុន្តែលោកនៅតែរស់ក្រោមនឹមវិស័យកីឡាប្រដាល់ដដែលទេ ក្នុងរយៈពេលចុងក្រោយនេះ ។ ជាមួយនឹងមាគា៌មិនធ្វើឱ្យកេរ្តិ៍ឈ្មោះសាបសូន្យលោកបែរជាកាន់តែរក្សាបាននូវភាពល្បីល្បាញតាមរយៈការបណ្តុះកីឡាករស្រករក្រោយ ឱ្យមានស្នាដៃនៅលើពិភពប្រដាល់ ។ ចាប់តាំងពីបានបង្កើតក្លិបប្រដាល់ផ្ទាល់ខ្លួនកាលពីឆ្នាំ២០០៤ លោកបានបណ្តុះបណ្តាលកីឡាករក្មេងៗឱ្យមានឈ្មោះជាជើងខ្លាំងបានជាច្រើនរូបដើម្បីស្នងតំណែងដ៏ខ្លាំងក្លារបស់លោកនាអតីតកាលផងដែរ ។ បច្ចុប្បន្នក្លិប«អេភូថងកីឡា»របស់ លោកបានបណ្តុះបណ្តាលកីឡាករប្រមាណជាង១០០នាក់ ក្នុងនោះកីឡាករដែលកំពុងមានឈ្មោះបោះសំឡេងលើរេញប្រដាល់ជួយលើកមុខមាត់របស់លោកឱ្យនៅស្ថិតស្ថេរក្នុងវិស័យនេះរួមមានកីឡាករ អេ តារា , អេ អីុតាលី , អេ សុវត្ថិឌី ,អេ ស៊ីថា ,ឌុន រដ្ឋា និងកីឡាករឈ្លើងទាមឆ្លាមជាដើម ។ លោកនិយាយថា«ខ្ញុំដកខ្លួនតែការឡើងរេញប៉ុណ្ណោះ ប៉ុន្តែបើនិយាយពីការងារប្រដាល់វិញគឺខ្ញុំកាន់តែយកចិត្តទុកដាក់ ព្រោះទីមួយត្រូវបង្ហាត់សិស្សនៅក្នុងក្លិប និងទី២ត្រូវដឹកនាំពួកគេឡើងប្រកួតស្ទើរតែរាល់អាទិត្យនៅលើរេញ ដើម្បីលើកទឹកចិត្តពួកគេកុំឱ្យភ័យ ធ្វើឱ្យពួកគេកាន់តែមានសេចក្តីក្លាហាន» ។
លោកអះអាងថា ស្រឡាញ់អាជីពប្រដាល់មិនសាបសូន្យឡើយ ទើបនៅតែប្រឹងបន្តដោយមិនធ្លាប់គិតចង់បើកជំនួញ ឬធ្វើកិច្ចការងារផ្សេងជំនួសទេ ។ បន្ថែមពីលើនោះលោកក៏បានបង្វឹកភរិយាឱ្យចេះបង្ហាត់ប្រដាល់ដល់សិស្សស្រីៗក្នុងក្លិប និងឱ្យភរិយាចាប់អាជីពជាអាជ្ញាកណ្តាលផងដែរ ។ សូម្បីតែកូនស្រីរបស់លោកគឺនាង អេ យ៉ានុត អាយុ១៤ឆ្នាំ ក៏កំពុងបោះជំហានឈានទៅចាប់អាជីពជាកីឡាការិនីជម្រើសជាតិផ្នែកវ៉ូវៀតណាម ក្នុងន័យលើកកម្ពស់វិស័យកីឡាផងដែរ ។ អតីតខ្លាចាស់ដែលល្បីល្បាញខាងកែងឆេះជង្គង់ហោះនៅគ្រប់ការប្រកួតរូបនេះថ្លែងបញ្ជាក់ថា ដោយសារមានចិត្តស្រឡាញ់វិស័យកីឡាទើបលោកបានបណ្តុះបណ្តាលភរិយា និងកូនស្រីឱ្យប្រឡូកក្នុងអាជីពប្រដាល់ ហើយក្នុងពេលដ៏ខ្លីខាងមុខនេះកូនប្រុសរបស់លោកក៏នឹងក្លាយជាកីឡាករប្រដាល់តាមលំនាំរបស់លោកផងដែរ ។
ការងារប្រដាល់គឺស្មុគស្មាញ ប៉ុន្តែមកពីលោកមានចំណូលចិត្ត ទើបសម្រេចចិត្តបណ្តុះបណ្តាលសិស្សគុន ដើម្បីរក្សាស្នាដៃ និងកេរ្តិ៍ឈ្មោះរបស់ខ្លួនគឺអេ ភូថង កុំឱ្យបាត់បង់ ។ លោកបញ្ជាក់ថា ការបង្កើតក្លិបមិនមែនគ្រាន់តែបង្ហាត់ឱ្យរួចពីដៃនោះទេ គឺត្រូវយកចិត្តទុកដាក់គ្រប់កាលៈទេសៈចំពោះសិស្សទើបសិស្សគុនដែលចេញពីក្លិបរបស់លោក ត្រូវគេកត់សម្គាល់ថា ច្រើនតែមានស្នាដៃនាពេលចុងក្រោយនេះ ។
អេ ភូថង ជាកីឡាករដែលចាប់អាជីពប្រដាល់ក្នុងឆ្នាំ១៩៩៣ នៅខេត្តកោះកុង ។ លោកល្បីឈ្មោះនៅទឹកដីកំណើតប្រមាណ១០ឆ្នាំ ទើបមានឱកាសឡើងមកប្រកួតលើសង្វៀននៅភ្នំពេញ ។ លោកប្រកួតទាំងសេរី និងសាកលបានសរុបជាង១៩០ដង ក្នុងនោះចាញ់តែ៧ដងប៉ុណ្ណោះ ទើបរុញឱ្យលោកក្លាយជាកីឡាករល្បីល្បាញតែក្នុងរយៈពេលខ្លី ។ លោកដកខ្លួនទន្ទឹមគ្នានឹងវ័យកាន់តែជ្រេ ហើយគ្មានដៃគូប្រកួតក្នុងស្រុក ។
ក្នុងពេលប្រឡូកវិស័យប្រដាល់ លោកទទួលបានខ្សែក្រវាត់ ពាន និងមេដាយស្ទើររាប់មិនអស់ ពិសេសពីការប្រកួតនៅអូស្ត្រាលី២០០៣ បារាំង២០០៦ និងនៅប្រទេសជិតខាងមួយចំនួនទៀត ។ លោកមានគម្រោងបន្តអាជីពជាគ្រូបង្វឹកអស់មួយជីវិត ដោយមិនងាកទៅប្រកបអាជីពផ្សេងទៀតទេ ដើម្បីលើកស្ទួយវិស័យប្រដាល់ដល់ក្មេងជំនាន់ក្រោយ ៕
ចែករំលែកព័តមាននេះ