រាជធានីភ្នំពេញ ៖ ក្រោយពីទទួលបានអំណោយជាសម្ភារខារ៉ាអូខេមួយឈុតពីសប្បុរសជននានានោះ សមាគមសិល្បករខ្មែរបានប្រកាសបើកបង្រៀនច្រៀង និងសម្តែងដោយឥតគិតថ្លៃចំពោះយុវវ័យជំនាន់ក្រោយដែលមានបំណងចង់ក្លាយជាអ្នកសិល្បៈ ។ ពិធីទទួលសម្ភារសម្រាប់បង្រៀនចម្រៀងនេះបានធ្វើឡើងកាលពីថ្ងៃទី២៥ សីហា ២០១២ នៅក្នុងបរិវេណរបស់សមាគមសិល្បករខ្មែរ ។
ថ្លែងប្រាប់អ្នកសារព័ត៌មាននាឱកាសនោះលោកសុះ ម៉ាច ប្រធានសមាគមសិល្បករខ្មែរបានឱ្យដឹងថា នេះជាជំហានថ្មីមួយទៀតរបស់សមាគមក្នុងការចូលរួមចំណែកលើកស្ទួយវិស័យសិល្បៈក្នុងប្រទេសកម្ពុជាឱ្យកាន់តែមានភាពរីកចម្រើន ។ លោកបន្តថា ការបណ្តុះបណ្តាលនេះ នឹងផ្តល់ឱកាសដល់ប្អូនៗជំនាន់ក្រោយដែលមានបំណងចង់ចាប់យកអាជីពជាអ្នកចម្រៀង និងសម្តែងនោះ ។ ការចុះឈ្មោះចូលរៀន គឺមិនតម្រូវឱ្យមានការបង់ប្រាក់ឡើយ គឺគ្រាន់តែមកចុះឈ្មោះចូលជាសមាជិករបស់សមាគម និងបង់ជាវិភាគទានបន្តិចបន្តួចប្រចាំឆ្នាំ គឺអាចមានសិទ្ធិចូលរៀនបាន ។
លោកបញ្ជាក់ថា ក្នុងនាមជាប្រធានសមាគមលោកសូមអំពាវនាវដល់ប្អូនៗដែលមានបំណងចង់ចូលរួមជាសមាជិករបស់សមាគមសូមប្រញាប់រួសរាន់មកចុះឈ្មោះដើម្បីមានឱកាសទទួលបានការបណ្តុះបណ្តាលឱ្យក្លាយជាអ្នកសិល្បៈទៅថ្ងៃអនាគត ។ លោក និងតារាសម្តែងជើងចាស់មួយចំនួនទៀតបាននិងកំពុងតែត្រៀមខ្លួនផ្តល់ចំណេះដឹង និងបទពិសោធន៍ដល់ប្អូនៗជំនាន់ក្រោយដើម្បីចាប់អាជីពសិល្បៈមួយដែលច្បាស់លាស់ ។ លោកសុះ ម៉ាច បានអះអាងបន្ថែមថា ទៅថ្ងៃមុខប្រសិនបើមានសម្ភារគ្រប់គ្រាន់នោះ សមាគមក៏មានបំណងបើកការបង្ហាត់បង្រៀនខាងផ្នែកតន្ត្រី និងការតែងនិពន្ធបទចម្រៀងផងដែរ ព្រោះបច្ចុប្បន្នយើងមានសិល្បករចាស់ៗរង់ចាំជួយដល់សមាគម ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ