មជ្ឈមណ្ឌលប្រកាសអាសន្ន ស៊ូណាមីនៅប៉ាស៊ីហ្វិក របស់អាមេរិករាយការណ៍ថា ការរញ្ជួយដីខ្លាំងមួយមានកម្លាំង៧,៤វីស្ទ័របានកើតមានក្នុងដែនទឹកសាល់វ៉ាឌ័រ កាលពីថ្ងៃទី២៧ សីហា ញ៉ាំងឱ្យមានរលកយក្សស៊ូណាមី វាយប្រហារតំបន់មួយក្នុងមហាសមុទ្រប៉ាស៊ីហ្វិក នៅដែនទឹកសាល់វ៉ាឌ័រ ។
ក្នុងសេចក្តីប្រកាសមួយមជ្ឈមណ្ឌលនេះបន្តថា ការពិនិត្យកម្ពស់ទឹកសមុទ្រអះអាងពីការកើតមានស៊ូណាមីមួយ ។ ការរញ្ជួយដីនេះ កើតមាននាវេលាម៉ោង ៤និង៣៧នាទីម៉ោងសាកលក្នុងតំបន់មួយស្ថិតនៅមហាសមុទ្រប៉ាស៊ីហ្វិក នាដែនទឹកនៃធ្នេរសមុទ្រសាល់វ៉ាឌ័រ ។ ចំណុចកណ្តាលរបស់វា ស្ថិតនៅចម្ងាយ១១១គីឡូម៉ែត្រ ខាងត្បូងទីក្រុងពូអ័រតូអែលទ្រីអ៊ុនហ្វូ ។
មជ្ឈមណ្ឌលប្រកាសអាសន្នស៊ូណាមីនៅប៉ាស៊ីហ្វិក បញ្ជាក់ពីការរញួយដីនេះកើតមានក្នុងជម្រៅ៥៤គីឡូម៉ែត្រ ។ មជ្ឈមណ្ឌលនេះប្រកាសអាសន្នស៊ូណាមី សម្រាប់គ្រប់ប្រទេសទាំងអស់នៅអាមេរិកកណ្តាលនិងសម្រាប់ម៉ិចស៊ិក ។ ព័ត៌មានដំបូងពុំបានរៀបរាប់ពីជនរងគ្រោះ ឬការខូចខាតឡើយ ៕
ចែករំលែកព័តមាននេះ