រាជធានីភ្នំពេញ ៖ មន្ត្រីជំនាញបានអះអាងថា អត្រាស្លាប់ដោយជំងឺគ្រុនឈាមក្នុងសប្តាហ៍៣០ដល់សប្តាហ៍៣២ នៃឆ្នាំ២០១២ នេះ មានការកើនឡើងខុសធម្មតាក្នុងនោះសប្តាហ៍ទី៣០ អត្រាស្លាប់មានរហូតដល់២១នាក់ សប្តាហ៍៣១ ស្លាប់៩នាក់ និងសប្តាហ៍ទី៣២ មានចំនួន៨នាក់ ។
លោក ច ម៉េងចួ នាយកមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណាកសាស្ត្របានបញ្ជាក់ថា មូលហេតុដែលអត្រាស្លាប់មានការកើនឡើងនោះ គឺដោយសារអ្នកជំងឺមានករណីធ្ងន់ធ្ងរ មានសញ្ញាហូរឈាមតាមផ្លូវរំលាយអាហារ៣៥% ដោយសារតែមន្ទីរពេទ្យឯកជនបានបញ្ចូលសេរ៉ូមហួសកម្រិតនាំឱ្យជំងឺកាន់តែធ្ងន់ធ្ងរមិនអាចជួយសង្គ្រោះបាន ហើយពេលបញ្ជូនមកព្យាបាលសេវាសាធារណៈ ឬពេទ្យរដ្ឋក៏ត្រូវស្លាប់តែម្តង។
លោក ច ម៉េងចួ ក៏បានរំលឹកឡើងវិញថា មកដល់សប្តាហ៍ទី៣៣ ឆ្នាំ ២០១២ នេះ ករណីជំងឺគ្រុនឈាមចូលសម្រាកព្យាបាលសេវាសាធារណៈមានចំនួន២៧.៥៩២នាក់ ក្នុងនោះស្លាប់១១១នាក់ ក្នុងអត្រា០,៤% ។ ករណីឈឺកើន១៥០% បើប្រៀបធៀបឆ្នាំ២០១១ ប៉ុន្តែអត្រានេះទាបជាងឆ្នាំ ២០០៧ ដែលជាឆ្នាំគោលនៃការផ្ទុះជំងឺគ្រុនឈាម ។ ខេត្តដែលមានអត្រាជំងឺគ្រុនឈាមខ្ពស់ជាងគេ គឺខេត្តបន្ទាយមានជ័យ, សៀមរាប, ឧត្តរមានជ័យ, កណ្តាល, កំពង់ស្ពឺ, កំពង់ឆ្នាំង, កំពង់ធំ, ព្រៃវែង, កំពង់ចាម និងព្រះវិហារ ។ ចំណែកខេត្តដែលគ្មានផ្ទុះការរាតត្បាតគឺពោធិ៍សាត់, មណ្ឌលគិរី, ស្ទឹងត្រែង និងរតនគិរី ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ