អ្នកបើកបរម៉ូតូប្រណាំងប្រភេទ World Superbikeសញ្ជាតិអង់គ្លេស Jonathan Reaនឹងត្រូវចូលប្រណាំងក្នុងប្រភេទ Moto Grand Prixដើម្បីជំនួសកីឡាករអូស្ត្រាលីខាស៊ី ស្តូន័រដែលបានរងរបួសបាក់ឆ្អឹង.កជើង ។ ការជំនួសនោះត្រូវគេបញ្ជាក់ឱ្យដឹងថាមានរយៈពេល២ជុំ ។
សូមបញ្ជាក់ថា ការប្រណាំងម៉ូតូប្រភេទ Moto Grand Prixឆ្នាំនេះមាន១៨ជុំ ហើយមកទល់នឹងខែនេះ ការប្រណាំងបានបញ្ចប់ទៅ១២ជុំរួចជាស្រេចហើយដែរ ។ នេះមានន័យថា Jonathan Reaចូលបើកបរជំនួសស្តូន័រសម្រាប់ជុំទី១៣និងទី១៤ដែលនឹងធ្វើក្នុងខែកញ្ញាខាងមុខ ។
Jonathan Reaបានធ្វើរួចមកហើយនូវការបើកបរសាកល្បងឱ្យក្រុមហុងដានៅទីលាន Brnoប្រទេសឆែកកាលពីថ្ងៃអាទិត្យ ប៉ុន្តែគេនឹងចូលរួមការសាកល្បង២ថ្ងៃបន្ថែមទៀតនៅទីក្រុង Aragonថ្ងៃទី៤-៥ខែកញ្ញា ។កីឡាករវ័យ២៥ឆ្នាំរូបនេះបានថ្លែងថា ៖«ខ្ញុំមិនអាចបោះបង់បានទេ ។ នេះជាឱកាសដ៏វិសេសវិសាលមួយសម្រាប់ខ្ញុំ ។
ខ្ញុំពិតជាអាណិតដល់កីឡាករស្តូន័រ ហើយខ្ញុំសូមជូនពរឱ្យគេឆាប់ជាសះស្បើយពីរបួស ។ បើនិយាយទៅ វានៅជាការភ័យបន្តិចដែរ ប៉ុន្តែខ្ញុំសប្បាយចិត្តដែលក្រុមហុងដាជឿជាក់លើរូបខ្ញុំ ។ ខ្ញុំមិនបារម្ភថា តើការប្រណាំងកម្រិតនេះពិបាកប៉ុនណានោះទេ ។ ម៉ូតូប្រៀបដូចជាសត្វមួយក្បាលអញ្ចឹងដែរ ។ ខ្ញុំកំពុងរង់ចាំការប្រណាំងដោយក្តីរីករាយ »។ Jonathan Reaបច្ចុប្បន្នស្ថិតនៅលំដាប់ទី៥នៃតារាងជើងឯកប្រណាំង World Superbike
ចែករំលែកព័តមាននេះ