កីឡាការិនីនូវែលសេឡង់ Lydia Koបានក្លាយជាម្ចាស់ពានវ័យក្មេងបំផុតរបស់កម្មវិធី Canadian Women’s Open ខណៈកាលពីថ្ងៃអាទិត្យទី២៦សីហានាងបានយកឈ្នះជើងឯកជាមួយនឹងគម្លាតពិន្ទុ៣ស្ត្រូក ។ ការប្រកួតដែលមានរយៈពេល៤ថ្ងៃនេះត្រូវបានរៀបចំធ្វើនៅទីលានវាយកូនហ្គោល Vancouver Golf Club ស្ថិតក្នុងទីក្រុង Coquitlamប្រទេសកាណាដា ។
Lydia Ko ដែលបានបញ្ចប់ជុំផ្តាច់ព្រ័ត្រធ្វើបានពិន្ទុ ៥អាន់ឌ័រ ៦៧ឆ្លងកាត់៤ជុំប្រកួតសម្រេចបានលទ្ធផលសរុប ១៣អាន់ឌ័រ ២៧៥ ទទួលបានពានជើងឯកយកមកគ្រប់គ្រងក្នុងវ័យទើបតែ១៥ឆ្នាំ ។ កាលពីដើមឆ្នាំនេះ នៅប្រទេសអូស្ត្រាលី នាងបានយកឈ្នះពានជើងឯកកម្មវិធី New South Wales Open ។ ដោយឡែកកាលពី២សប្តាហ៍កន្លងទៅនេះ នៅរដ្ឋអូហៃយ៉ូ សហរដ្ឋអាមេរិក នាងក៏៏បានយកឈ្នះពានជើងឯកកម្មវិធី US Women’s Amateurផងដែរ ។
កីឡាការិនីកូរ៉េខាងត្បូង Inbee Parkឆ្លងកាត់ការប្រកួត៤ជុំធ្វើបានលទ្ធផលសរុប ១០ អាន់ឌ័រ ២៧៨ដណ្តើមបានចំណាត់ថ្នាក់លេខ២ជាមួយនឹងទឹកប្រាក់រង្វាន់ ៣០ម៉ឺនដុល្លារអាមេរិក ។ ចំណែកកីឡាការិនីមិត្តរួមជាតិរបស់នាង៣នាក់ផ្សេងទៀតមានដូចជា Jiyai Shin, Chella Choiនិងនាង Na Yeon Choiបញ្ចប់ការប្រកួតធ្វើបានលទ្ធផលស្មើគ្នា ៨អាន់ឌ័រ ២៨០ស្ថិតនៅចំណាត់ថ្នាក់លេខ៣ស្ទួននិងទទួលបានទឹកប្រាក់រង្វាន់ក្នុងម្នាក់ៗ ១៤០ពាន់ដុល្លារ ។
ដោយឡែកក្នុងថ្ងៃជាមួយគ្នានោះដែរ នៅឯទីលានវាយកូនហ្គោល Bethpage State Parkក្នុងទីក្រុង Farmingdaleរដ្ឋញូវយ៉កសហរដ្ឋអាមេរិក កីឡាករម្ចាស់ផ្ទះ Nick Watneyបានវាយបំបែកកញ្ចប់ថវិកា៨លានដុល្លាររបស់កម្មវិធី The Barclays ខណៈគេធ្វើបានពិន្ទុ២អាន់ឌ័រ ប៉ា ៦៩បន្ថែមទៀតក្នុងជុំផ្តាច់ព្រ័ត្រកាលពីថ្ងៃអាទិត្យទី២៦សីហា ។
ឆ្លងកាត់ការប្រកួត៤ជុំ Nick Watneyធ្វើបានពិន្ទុសរុប ១០អាន់ឌ័រ ២៧៤នាំមុខ៣សត់លើកីឡាករ Brandt Snedekerដែលធ្វើបានពិន្ទុសរុប ៧អាន់ឌ័រ ២៧៧ស្ថិតនៅចំណាត់ថ្នាក់លេខ២ ។ តាមពីក្រោយរូបគេគឺកីឡាករDustin Johnsonនិង Sergio Garcia។ អ្នកទាំង២ឆ្លងកាត់ការប្រកួត៤ជុំធ្វើបានពិន្ទុសរុប ៦អាន់ឌ័រ ២៧៨ដណ្តើមបានចំណាត់ថ្នាក់លេខ៣ស្ទួន ។ ឯចំណាត់ថ្នាក់លេខ៥ស្ទួនបានទៅលើកីឡាករGraham DeLaet, Louis Oosthuizen, Brian Harman និងកីឡាករអង់គ្លេសលីវេស វូដ ។ ពួកគេទាំង៤នាក់ឆ្លងកាត់៤ជុំប្រកួតធ្វើបានលទ្ធផលពិន្ទុស្មើៗគ្នាគឺ ៥អាន់ឌ័រ ២៧៩ ។
ចំណែកថៃហ្គ័រ វូដបញ្ចប់៤ជុំប្រកួតស្ថិតក្នុងចំណាត់ថ្នាក់លេខ៣៨ស្ទួន។ កីឡាករអាមេរិករូបនេះធ្វើបានលទ្ធផលសរុប១អូវើប៉ា ២៨៥ស្មើជាមួយកីឡាករមិត្តរួមជាតិ Phil Mickelson ។ ឯទឹកប្រាក់រង្វាន់វិញ កីឡាករ Watneyដែលជាជើងឯកទទួលបាន១លាននិង៤៤ម៉ឺនដុល្លារអាមេរិកខណៈកីឡាករចំណាត់ថ្នាក់លេខ២Snedekerទទួលបាន៨៦៤ពាន់ដុល្លារ ។ កីឡាករ២រូបដែលដណ្តើមបានជ័យលាភីលេខ៣ស្ទួនទទួលបានទឹកប្រាក់រង្វាន់ក្នុងម្នាក់ៗ ៤៦៤ពាន់ដុល្លារ ៕
ចែករំលែកព័តមាននេះ