ខេត្តសៀមរាប ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍វាយតម្លៃខ្ពស់ចំពោះយុវជនស្ម័គ្រចិត្តសម្តេចតេជោ និងមន្ត្រីសុរិយោដីទាំង១៤០នាក់ ដែលបានចុះអនុវត្តន៍ភារកិច្ចដែលសម្តេចដាក់ឱ្យអនុវត្តនូវ «នយោបាយចាស់ សកម្មភាពថ្មី» លើវិស័យដីធ្លីក្នុងការចុះវាស់វែងធ្លីជូនប្រជាពលរដ្ឋតាមគ្រប់គោលដៅទាំងអស់ក្នុងខេត្តសៀមរាប ប្រកបដោយលទ្ធផលដ៏ត្រចេះត្រចង់ ។
សម្តេចតេជោនាយករដ្ឋមន្ត្រីបានមានប្រសាសន៍បែបនេះ កាលពីព្រឹកថ្ងៃទី២៦ សីហា ២០១២ ក្នុងឱកាសដែលសម្តេចអញ្ជើញជួបសំណេះសំណាលជាមួយយុវជនស្ម័គ្រចិត្តរបស់សម្តេចតេជោ ហ៊ុន សែន និងមន្ត្រីសុរិយោដីដែលកំពុងមានភារកិច្ចចុះវាស់វែងដីធ្លីជូនប្រជាពលរដ្ឋខេត្តសៀមរាប ។
សម្តេចតេជោនាយករដ្ឋមន្ត្រីមានប្រសាសន៍បន្តថា សម្តេចពិតជាមានការរីករាយខ្លាំងណាស់ ចំពោះយុវជនស្ម័គ្រចិត្តទាំងអស់ដែលបានចូលរួមនូវសកម្មភាពជាប្រវត្តិសាស្ត្រនេះ ដែលសកម្មភាពនេះគឺជាការផ្តល់នូវផលប្រយោជន៍ដ៏មានតម្លៃបំផុតជូនប្រជាពលរដ្ឋ ។
សម្តេចបានគូសបញ្ជាក់ថា ពាក្យថា នយោបាយចាស់ សកម្មភាពថ្មី គឺមិនមែនទើបតែនឹងកើតឡើងនៅពេលនេះទេ ពោលគឺរាជរដ្ឋាភិបាលបានបញ្ជូនមន្ត្រីចុះវាស់វែងដីធ្លីជូនប្រជាពលរដ្ឋជាយូរមកហើយ ប៉ុន្តែយើងមិនអាចធ្វើឱ្យបានរួចរាល់តាមសន្ទុះរីកចម្រើននៃសង្គមជាតិនោះទេ ពិសេសកំណើនរបស់ប្រជាពលរដ្ឋ ។ ទើបតែនៅពេលនេះសម្តេចបានជ្រើសរើសយុវជនស្ម័គ្រចិត្តរបស់សម្តេចតេជោ ឱ្យបន្តចុះអនុវត្តន៍នយោបាយចាស់សកម្មភាពថ្មីលើវិស័យដីធ្លីចែកជូនប្រជាពលរដ្ឋនៅគ្រប់ទីកន្លែងទាំងអស់ ក្នុងប្រទេសកម្ពុជា ដើម្បីឱ្យប្រជាពលរដ្ឋទាំងអស់ទទួលបាននូវភាពស្របច្បាប់ក្នុងការប្រើប្រាស់ដីធ្លី ពិសេសនៅតាមតំបន់ដែលប្រជាពលរដ្ឋមិនធ្លាប់មានកម្មសិទ្ធិស្របច្បាប់ ។
សម្តេចតេជោនាយករដ្ឋមន្ត្រីមានប្រសាសន៍ថា នៅកម្ពុជាមិនទាន់មានសកម្មភាពបែបនោះទេ ហើយនៅលើពិភពលោកក៏មិនទាន់មានប្រវត្តិនៃសកម្មភាពបែបនេះ កើតមានឡើងនោះដែរ ។ នៅពេលនេះយើងកំពុងធ្វើនៅលើតំបន់ដែលប្រជាពលរដ្ឋកំពុងកាន់កាប់ដីខុសច្បាប់ និងប្រជាពលរដ្ឋដែលកាន់កាប់ដីដែលគ្មានកម្មសិទ្ធិ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ