ខេត្តសៀមរាប ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍បើកកិច្ចប្រជុំរដ្ឋមន្ត្រី សេដ្ឋកិច្ចអាស៊ានលើកទី៤៤ នាព្រឹកថ្ងៃទី២៧ សីហា ២០១២ នៅសណ្ឋាការអប្សរាអង្គរ ក្រុងសៀមរាប បញ្ជាក់ថា រដ្ឋមន្ត្រីសេដ្ឋកិច្ចអាស៊ានមានតួនាទីយ៉ាងសំខាន់ក្នុងដំណើរការបង្កើតសហគមន៍សេដ្ឋកិច្ចអាស៊ាន ជាពិសេសការដោះស្រាយបញ្ហាពាក់ព័ន្ធរបាំងពន្ធគយ និងរបាំងមិនមែនពន្ធគយ ក៏ដូចជាបញ្ហាថ្មីៗដែលកំពុងកើតមាន ពាក់ព័ន្ធនឹងគម្លាតនៃការអនុវត្តពាណិជ្ជកម្មសេរីអាស៊ាន និងតំបន់ពាណិជ្ជកម្មសេរីផ្សេងទៀតរួមជាមួយគូសន្ទនា ដើម្បីធ្វើឱ្យសមាហរណកម្មពាណិជ្ជកម្មតំបន់កាន់តែមានលក្ខណៈមុតស្រួច ។
ពាក់ព័ន្ធនឹងបញ្ហាខាងលើ សម្តេចតេជោនាយករដ្ឋមន្ត្រី ហ៊ុន សែន សូមស្នើឱ្យរដ្ឋមន្ត្រីអាស៊ានផ្តោតការយកចិត្តទុកដាក់លើចំណុចអាទិភាពមួយចំនួនដូចខាងក្រោម ៖
ទី១-ការសម្រេចឱ្យបាននូវការបង្កើតសហគមន៍សេដ្ឋកិច្ចអាស៊ាននៅឆ្នាំ២០១៥ គឺជាអាទិភាពខ្ពស់បំផុត ដើម្បីប្រែក្លាយអាស៊ានឱ្យទៅជាទីផ្សារ និងមូលដ្ឋានផលិតកម្មតែមួយ មានលំហូរដោយសេរីនូវទំនិញ សេវា ការវិនិយោគ ពលករជំនាញ និងលំហូរមូលធនកាន់តែស៊ីជម្រៅជាងមុន ។ ក្នុងន័យនេះយើងគួរធ្វើអាទិភាវូបនីយកម្ម សកម្មភាព និងវិធានការគន្លឹះជាក់ស្តែង ដើម្បីដោះស្រាយបញ្ហាប្រឈម និងបន្ថយគម្លាតអភិវឌ្ឍន៍ដែលជាឧបសគ្គក្នុងការសម្រេចបាននូវសហគមន៍សេដ្ឋកិច្ចតាមការគ្រោងទុក ។
ដូច្នេះខ្ញុំជឿជាក់ថា របាយការណ៍នៃការពិនិត្យឡើងវិញ ពាក់កណ្តាលអាណត្តិនៃឯកសារគោលរបស់សហគមន៍ សេដ្ឋកិច្ចអាស៊ានដែលរៀបចំដោយវិទ្យាស្ថានស្រាវជ្រាវ សេដ្ឋកិច្ចសម្រាប់អាស៊ាន និងអាស៊ីបូព៌ា អាចប្រើប្រាស់ជាមូលដ្ឋានសម្រាប់រដ្ឋមន្ត្រី សេដ្ឋកិច្ចអាស៊ានពិនិត្យឡើងវិញ និងដាក់ចេញនូវវិធានការគោលនយោបាយជាក់លាក់ ដើម្បីដោះស្រាយទម្លាតនៃការអនុវត្តរវាងឆ្នាំបច្ចុប្បន្ន និងឆ្នាំ ២០១៥ ដោយរួមទាំងមធ្យោបាយនានា ដើម្បីជំនះលើការគាំពារនិយមក្នុងការធ្វើពាណិជ្ជកម្មទំនិញ និងសេវាក្នុងអាស៊ាន ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ