ប្រធានាធិបតីស៊ីរីលោកបាចាអាល់ អាសាដ បានសន្យាកាលពីថ្ងៃទី២៦ សីហា កម្ទេចការបះបោរ ទោះជាត្រូវបង់តម្លៃបែបណាក៏ដោយ ក្រោយការស្លាប់មនុស្សជាច្រើនរយនាក់ ក្នុងប្រតិបត្តិការយោធាដ៏ធំមួយរបស់កងទ័ពនៅឯតំបន់ជាយក្រុងដាម៉ាស់មួយដែលពួកប្រឆាំងចោទប្រកាន់ថា នោះជាការសម្លាប់រង្គាលមួយ។
ពេលជួបជាមួយលោកអាឡាអេដឌីន ហ្សូបូរូហ្ស័រ ឌីន បេសកជន១រូបរបស់អីុរ៉ង់ជាសម្ព័ន្ធមិត្តសំខាន់ក្នុងតំបន់ប្រមុខរដ្ឋស៊ីរីអះអាងថា ប្រជាជនស៊ីរីនឹងមិនអនុញ្ញាតឱ្យការរួមគំនិតរបស់បរទេសទទួលបានជោគជ័យឡើយហើយនឹងយកឈ្នះលើការរួមគំនិតនោះទោះបីជាត្រូវបង់តម្លៃបែបណាក៏ដោយ ។
នេះជាលើទីមួយហើយ ដែលម៉ាស៊ីនឃោសនារាយការណ៍ពីសេចក្តីថ្លែងការណ៍របស់លោកអាសាដចាប់តាំងពីអ្នកទទួលខុសត្រូវស៊ីរីម្នាក់លើកឡើងកាលពីថ្ងៃទី២១ សីហា កន្លងមកនេះ ជាលើកដំបូងពីលទ្ធភាពពិភាក្សាពីការចាកចេញរបស់ប្រធានាធិបតីស៊ីរីក្នុងក្របខណ្ឌនៃការចរចាជាមួយពួកប្រឆាំង ។
ការសន្យាផ្ទួនៗកម្ទេចពួកបះបោររួមនឹងភេរវកម្មដោយរបបលោកអាសាដ គឺជួនពេលគ្នាជាមួយការប្រកាសរបស់អង្គការសិទ្ធិមនុស្សស៊ីរីមួយពីការរកឃើញសាកសពមនុស្សយ៉ាងតិច៣២០នាក់ នៅឯមូលដ្ឋានពួកស៊ុននីត DARAYA ស្ថិតនៅចម្ងាយ៧គ.ម ខាងត្បូងក្រុងដាម៉ាស់ ដែលនៅទីនោះកងទ័ពបានធ្វើប្រតិបត្តិការដ៏ធំមួយរយៈពេល៥ថ្ងៃមកហើយ ។ អង្គការ OSDH នោះរៀបរាប់ថា ក្នុងចំណោមសាកសពទាំងនេោះ គេរាប់ឃើញបណ្តោះអាសន្ននូវសាកសពនារី១៥នាក់ និងកុមារ១៤នាក់ ។
ចំណែកទីភ្នាក់ងារព័ត៌មានស៊ីរី SANA វិញរាយការណ៍ថា កងទ័ពបានបោសសំអាតពួកភេរវករស៊ីឈ្នួលនៅដារ៉ាយ៉ា ដែលពួកនេះប្រព្រឹត្តអំពើឧក្រិដ្ឋនានាប្រឆាំងប្រជាជន សម្លុតបំភ័យ ហើយកម្ទេចចោលទ្រព្យសម្បត្តិសាធារណៈនិងឯកជន ។នៅឯទីក្រុងអាឡែប ជាទីក្រុងយុទ្ធសាស្ត្រចម្ងាយ៣៥៥គ.មខាងជើងក្រុងដាម៉ាស់ ពួកឧទ្ទាមនៅតែបន្តទប់ទល់ជាមួយការវាយលុករបស់កងទ័ព។
កាលពីថ្ងៃទី២៦ សីហា យោងតាមអង្គការOSDH ថា មនុស្សយ៉ាងតិច៩១នាក់ ស្លាប់ក្នុងការវាយប្រហាររបស់កងទ័ព និងការប្រយុទ្ធគ្នារវាងកងទាហាន និងពួកឧទ្ទាមនៅក្នុងប្រទេសដោយក្នុងចំណោមអ្នកស្លាប់ទាំងនេះមានជនស៊ីវិល៦១នាក់ ពួកឧទ្ទាម១៣នាក់ និងទាហាន១៧នាក់ ៕
ចែករំលែកព័តមាននេះ