កីឡាករបារាំងសេបាស្ទៀន ឡូអែបបានក្លាយជាម្ចាស់ពានជើងឯកនៃការប្រណាំងរថយន្តកម្មវិធី WRC Rally Germany បន្ទាប់ពីគេបន្តយកឈ្នះដំណាក់កាលផ្តាច់ព្រ័ត្រកាលពីថ្ងៃអាទិត្យទី២៦ខែសីហាកន្លងមកនេះ ។ ការប្រណាំងក្នុងថ្ងៃទី៣នេះត្រូវបានបញ្ចប់នៅទីក្រុង Trierទិសនិរតីនៃប្រទេសអាល្លឺម៉ង់ ។
ឡូអែបបានបើករថយន្ត Citroenរបស់ខ្លួនចូលដល់ទីព្រ័ត្រក្នុងថិរវេលា៣ម៉ោង៤១នាទីនិង៥២វិនាទីយកឈ្នះកីឡាករសញ្ជាតិហ្វាំងឡង់Jari-Matti Latvalaដែលប្រើពេលអស់៣ម៉ោង៤៣នាទីនិង៥២វិនាទីយឺតជាងរូបគេ ២នាទីនិង១វិនាទី។
កីឡាករហ្វាំងឡង់ម្នាក់ទៀត Mikko Hirvonen បើកបរឱ្យក្រុម Citroenបានបញ្ចប់ការប្រណាំងក្នុងចំណាត់ថ្នាក់លេខ៣ក្រោយពីបានប្រើពេលអស់៣ម៉ោង៤៤នាទីនិង២៣.៣វិនាទីពោលគឺយឺតជាងឡូអែប២នាទីនិង៣១.៣វិនាទីខណៈចំណាត់ថ្នាក់លេខ៤បានទៅលើកីឡាករន័រវែស Mads Ostbergដែលបានប្រើអស់ថិរវេលា ៣ម៉ោង ៤៥នាទីនិង១៦.៣វិនាទី ។
ចំណែកកីឡាករអូស្ត្រាលី Chris Atkinsonបញ្ចប់ការប្រណាំងក្នុងលំដាប់ទី៥បន្ទាប់ពីបានប្រើពេលអស់៣ម៉ោង៥១នាទីនិង២.៤វិនាទីខណៈកីឡាករស៊ុយអែត ភីធ័រ សូលបឺកបញ្ចប់ការប្រណាំងក្នុងចំណាត់ថ្នាក់ទី១១បន្ទាប់ពីកង់រថយន្តរបស់គេមានបញ្ហា។
សម្រាប់កីឡាករឡូអែបនេះគឺពានលើកទី៧៤ហើយនៅក្នុងអាជីព ។
ម្ចាស់ជើងឯកពិភពលោក៨ជំនាន់រូបនេះបាននិយាយថា៖«ការប្រណាំងក្នុងថ្ងៃនេះ វាមិនសូវជាពិបាកដូចជាថ្ងៃមុនៗទេ។ ខ្ញុំសប្បាយចិត្តណាស់ដែលដណ្តើមបានជ័យជម្នះជាថ្មីម្តងទៀត។ នេះជាជ័យជម្នះដែលមិនអាចកាត់ថ្លៃបានដ្បិតនេះជាលើកទី៧៤ក្នុងអាជីព »។ កីឡាករវ័យ៣៨ឆ្នាំរូបនេះបានបន្ថែមថា ៖«យ៉ាងណាក៏ដោយ ប្រសិនជាយើងមិនប្រយ័ត្នទេនោះ វានឹងងាយធ្វើឱ្យមានកំហុសក្នុងពេលប្រណាំង។ មានកីឡាករច្រើនណាស់ដែលមានកំហុស »។
កីឡាករជើងខ្លាំងបារាំងម្នាក់ទៀត សេបាស្ទៀន អូហ្ស៊ីយ៉េបញ្ចប់ការប្រណាំងក្នុងលំដាប់ទី៦។ កីឡាកររូបនេះបញ្ជាក់ថា គូប្រជែងដ៏ខ្លាំងរបស់គេគឺកីឡាករសេបាស្ទៀន ឡូអែប។ ទោះជាយ៉ាងណា គេអាចមិនមែនជាគូប្រជែងរបស់ឡូអែបទៀតទេដ្បិតការប្រកួត៩លើកមកនេះគេមិនដែលទទួលបានលទ្ធផលល្អឡើយ។
ឆ្លងកាត់ការប្រណាំងអស់ចំនួន ៩ជុំមកនេះ ឡូអែបសន្សំពិន្ទុបានច្រើនជាងគេស្ថិតនៅលំដាប់កំពូលតារាងជាដដែល។ ពេលនេះគេមាន១៩៩ពិន្ទុនាំមុខកីឡាករហ្វាំងឡង់Mikko Hirvonenស្ថិតនៅលំដាប់ទី២មាន១៤៥ពិន្ទុ។ ឯកីឡាករន័រវេស Mads Ostbergស្ថិតនៅលំដាប់ទី៤ក្រោយពីសន្សំបាន១០២ពិន្ទុតាមពីក្រោយកីឡាករស៊ុយអែត សូលបឺកដែលមាន១០៤ពិន្ទុស្ថិតនៅលំដាប់ទី៣ ។
សូមបញ្ជាក់ថា ការប្រណាំងរថយន្តប្រភេទរែលលីសម្រាប់ឆ្នាំ២០១២នេះមាន១៣ជុំ ។ ជុំទី១ចាប់ផ្តើមកាលពីថ្ងៃទី១៧ខែមករាដើមឆ្នាំនៅប្រទេសបារាំង និងជុំចុងក្រោយបំផុតនឹងធ្វើនៅថ្ងៃទី០៨ដល់ទី១១ខែវិច្ឆិកាខាងមុខនៅប្រទេសអេស្ប៉ាញ ។ ដោយឡែកការប្រណាំងនៅប្រទេសអាល្លឺម៉ង់លើកនេះគឺស្ថិតនៅក្នុងជុំទី៩ ៕
ចែករំលែកព័តមាននេះ