រាជធានីភ្នំពេញ ៖ កម្មករ កម្មការិនីរោងចក្រកាត់ដេរយីហោអាលីម ជាង៥០០នាក់បានបន្តធ្វើកូដកម្មបិទផ្លូវចោមចៅអស់រយៈពេលជាង២០នាទីតវ៉ាសុំឱ្យថៅកែរោងចក្រដោះស្រាយនូវលក្ខខណ្ឌការងារចំនួន១២ចំណុច ក្នុងនោះមានមួយចំណុចសំខាន់ គឺទាមទារឱ្យថៅកែទទួលយកតំណាងសហជីពម្នាក់ដែលត្រូវបញ្ឈប់ពីការងារចូលធ្វើការវិញ ។
កូដកម្មបិទផ្លូវនោះបានធ្វើឡើងកាលពីព្រឹកថ្ងៃទី២៧ សីហា ២០១២ នៅលើកំណាត់ផ្លូវចោមចៅត្រង់ចំណុចផ្សារត្រពាំងថ្លឹងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។ រោងចក្រកាត់ដេរយីហោអាលីមនោះមានទីតាំងស្ថិតនៅក្នុងភូមិខាងលើនោះដែរ ហើយមានកម្មករជាង៥០០នាក់បម្រើការងារ។ ពួកគេបានធ្វើកូដកម្មនោះមានរយៈពេល៣ថ្ងៃមកហើយ ប៉ុន្តែដោយសារគ្មានដំណោះស្រាយទើបកម្មករបន្តធ្វើកូដកម្មបិទផ្លូវ តែការបិទផ្លូវនោះ គឺមានរយៈពេលត្រឹមតែជាង២០នាទីប៉ុណ្ណោះក៏បានរំសាយវិញ តែបង្កឱ្យមានរថយន្តតូចធំរាប់រយគ្រឿងត្រូវបានកកស្ទះចរាចរណ៍ផងដែរ ។
កម្មករបានឱ្យដឹងថា ពួកគេធ្វើកូដកម្មនោះ គឺដើម្បីទាមទារឱ្យថៅកែដោះស្រាយនូវលក្ខខណ្ឌការងារចំនួន១២ចំណុច ប៉ុន្តែចំណុចសំខាន់នោះ គឺស្នើសុំឱ្យថៅកែទទួលយកលោកអេង អយ ប្រធានសហជីពកម្មករខ្មែរដែលត្រូវថៅកែដកចេញពីការងារចូលធ្វើការវិញ ។ ការតវ៉ានោះមិនត្រូវបានថៅកែអើពើនោះទេ ដោយមានរយៈពេល៣ថ្ងៃកន្លងមកហើយ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ