ទីភ្នាក់ងារសារព័ត៌មានផ្លូវការកូរ៉េខាងជើង KCNA រាយការណ៍កាលពីថ្ងៃទី២៦ សីហា ថា លោកគីម ជុងអ៊ុន មេដឹកនាំកំពូលកូរ៉េខាងជើង បានចុះហត្ថលេខាលើបទបញ្ជាប្រយុទ្ធមួយប្រឆាំងនឹងការវាយប្រហារជាយថាហេតុនានា ដែលអាចធ្វើដោយកូរ៉េខាងត្បូង និងសហរដ្ឋអាមេរិក ។
កូរ៉េខាងត្បូង និងសហរដ្ឋអាមេរិកនាពេលនេះកំពុងតែធ្វើសមយុទ្ធយោធារួមទ្រង់ទ្រាយធំមួយ ដែលសំដៅលើកូរ៉េខាងជើង ។ នេះជាការអះអាងរបស់លោកគីម ជុងអ៊ុន កាលពីថ្ងៃទី២៥ សីហា កន្លងមកនេះក្នុងឱកាសនៃសុន្ទរកថាមួយថ្លែងនាខួបលើកទី៥២នៃការបញ្ចូលដោយលោកគីមជុងអ៊ីលនូវនយោបាយ SONGUN ដែលផ្តល់សារសំខាន់ជាងគេដល់កងទ័ព។
ទីភ្នាក់ងារព័ត៌មាន KCNA រាយការណ៍ទៀតថា មេដឹកនាំកូរ៉េខាងជើងបានពិនិត្យ បន្ទាប់មកចុះហត្ថលេខាលើផែនការប្រតិបត្តិការ ហើយក៏ស្នើផងដែរ ដល់កងទ័ពប្រជាជនកូរ៉េ ឱ្យស្ថិតក្នុងស្ថានភាពប្រកាសអាសន្នប្រឈមមុខចំពោះអំពើអាក្រក់នានារបស់ពួកសត្រូវ ។
លោកគីម ជុងអ៊ុន ដែលក៏ជាមេបញ្ជាការកំពូលរប់កងទ័ពដែរនោះបានសច្ចាកាលពីថ្ងៃទី១៨ សីហា ថា នឹងប្រែក្លាយសមុទ្រខាងលិចជាផ្នូររបស់ពួកឈ្លានពានក្នុងពេលដែលលោកទៅត្រួតពិនិត្យកងឯកភាពកាំភ្លើងធំទាំងឡាយស្ថិតនៅជួរមុខជិតព្រំដែនសមុទ្រដ៏រសើបនៅសមុទ្រលឿង ។
សមយុទ្ធយោធារួមកូរ៉េខាងត្បូង-សហរដ្ឋអាេមរិកមានឈ្មោះថា ULCHI FREEDOM GUARDIAN ប្រព្រឹត្តទៅពីថ្ងៃទី២០ ដល់៣១ សីហា ។ ទាហានកូរ៉េខាងត្បូងប្រមាណជា៥៦.០០០នាក់ និងទាហានអាមេរិក៣០.០០០នាក់ ចូលរួមក្នុងសមយុទ្ធនេះដែលប្រទេសទាំង២គូសបញ្ជាក់ថា ជាសមយុទ្ធមានលក្ខណៈការពារប៉ុណ្ណោះ ៕
ចែករំលែកព័តមាននេះ