រាជធានីភ្នំពេញ ៖ រថយន្តកាមរីឆ្លាម ពណ៌ខ្មៅ មួយគ្រឿងបានបើកទៅបុកជាមួយនឹងរថយន្តឡិចស៊ីស LX470 ពណ៌ខ្មៅ មួយគ្រឿង បណ្តាលឱ្យរងរបួសធ្ងន់ និងស្រាល៧នាក់ ។ ហេតុការណ៍នេះកើតឡើងកាលពីវេលាម៉ោង១និង៥នាទីរំលងអធ្រាត្រឈានចូលថ្ងៃទី២៧ សីហា ២០១២ ត្រង់ចំណុចផ្លូវលេខ២៧១ មុខពេទ្យមិត្តភាពខ្មែរ-សូវៀត ហៅមន្ទីរពេទ្យរុស្ស៊ី ក្រុម៥ ភូមិ៣០ សង្កាត់ទំនប់ទឹក ខណ្ឌចំការមន ។
ប្រភពព័ត៌មាននៅកន្លែងកើតហេតុបានប្រាប់ឱ្យដឹងថា មុនដំបូងឃើញរថយន្តកាមរីឆ្លាមពណ៌ខ្មៅ បើកពីជើងទៅត្បូងដោយមានគ្នារួមដំណើរសរុប៦នាក់ (ស្រី៣នាក់) ចំណែករថយន្តឡិចស៊ីស LX470 បើកម្នាក់ឯងពីត្បូងទៅជើងក្នុងទិសដៅបញ្ច្រាសគ្នា លុះមកដល់ចំណុចខាងលើក៏បុកគ្នាពេញទំហឹងតែម្តង បណ្តាលឱ្យរងរបួសធ្ងន់ និងស្រាល៧នាក់ ឯរថយន្តទាំង២ខូចខាតស្ទើរទាំងស្រុង (ជនរងគ្រោះទាំងអស់មិនត្រូវបានស្គាល់អត្តសញ្ញាណ) កំពុងសម្រាកព្យាបាលនៅឯមន្ទីរពេទ្យមិត្តភាពខ្មែរ-សូវៀត រីឯរថយន្តទាំង២គ្រឿងត្រូវបានសមត្ថកិច្ច នគរបាលចរាចរ ជើងគោករាជធានីភ្នំពេញ យកទៅរក្សាទុក ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ