រដ្ឋមន្ត្រីថាមពលវេណេសុយអេឡាលោករ៉ាហ្វាអែល រ៉ាមីរេស អះអាងកាលពីថ្ងៃទី២៦ សីហា ថា រោងចក្រចម្រាញ់ប្រេងកាតធំជាងគេ របស់វេណេសុយអេឡា ដែលត្រូវភ្លើងឆេះយ៉ាងខ្លាំងក្លាកាលពីថ្ងៃទី២៥ សីហា កន្លងមកនេះ បណ្តាលឱ្យមនុស្សស្លាប់៤១នាក់ អាចដំណើរការផលិតកម្មឡើងវិញរយៈពេល២ថ្ងៃទៀត ។
រដ្ឋមន្ត្រីរូបនេះថ្លែងថា អគ្គិភ័យបណ្តាលមកពីការផ្ទុះ ព្រោះការធ្លាយឧស្ម័នកាលពីព្រឹកថ្ងៃទី២៥ សីហា ក្នុងរោងចក្រចម្រាញ់ប្រេងកាត AMUAY ស្ថិតនៅភាគពាយ័ព្យប្រទេសពេលនេះកម្រិតត្រឹមការផ្ទុះឆេះអស់អាងស្តុកប្រេងតែ២ប៉ុណ្ណោះ ។ ទាហាន១៨នាក់ នៃកងឆ្មាំជាតិ និងជនស៊ីវិល១៥នាក់ ស្ថិតក្នុងចំណោមអ្នកស្លាប់។ សាកសពមនុស្ស៦នាក់ ពុំអាចកំណត់ដឹងអត្តសញ្ញាណឡើយ ។ កាលពីថ្ងៃទី២៦ សីហា មនុស្ស២នាក់ទៀត ស្លាប់ដោយសាររបួសធ្ងន់ពេកនៅមន្ទីរពេទ្យ ។
រោងចក្រនោះដែលផលិតប្រេងចំនួន៦៤៥.០០០ធុង ក្នុង១ថ្ងៃ ជាផ្នែកមួយរបស់ក្រុមហ៊ុន PARAGUANA ជាក្រុមហ៊ុនធំបំផុតមួយនៃពិភពលោក ដែលមានសមត្ថភាពផលិតប្រេងសរុបដល់ទៅ៩៥៥.០០០ធុងក្នុង១ថ្ងៃ ។
នេះជាគ្រោះថ្នាក់ដ៏ធំមួយសម្លាប់មនុស្សច្រើនកើតមានក្នុងរោងចក្រចម្រាញ់ប្រេងកាតមួយក្នុងប្រវត្តិសាស្ត្រនៃឧស្សាហកម្មប្រេងដោយ កាលពីឆ្នាំ១៩៩៧ រោងចក្រចម្រាញ់ប្រេងកាត VISAKHAPATNAM នៅឥណ្ឌាត្រូវភ្លើងឆេះបណ្តាលឱ្យមនុស្សស្លាប់៥៦នាក់ ហើយការឆេះក្នុងរោងចក្រចម្រាញ់ប្រេងមួយរបស់ក្រុមហ៊ុន BP នៅរដ្ឋតិចសាស់ កាលពីឆ្នាំ២០០៥ បណ្តាលឱ្យមនុស្សស្លាប់១៥នាក់ ៕
ចែករំលែកព័តមាននេះ