កីឡាករបែលហ្ស៊ិក Philippe Gilbert ទទួលបានការអបអរសាទរពីបណ្តាមិត្តរួមក្រុមBMC Racing Teamរបស់ខ្លួនបន្ទាប់ពីបានយកឈ្នះណាក់ទី៩នៃការប្រណាំងកង់កម្មវិធី Tour of Spainនៅប្រទេសអេស្ប៉ាញកាលពីថ្ងៃពីអាទិត្យទី២៦ខែសីហាកន្លងមកនេះ។ ការប្រណាំងក្នុងដំណាក់នេះត្រូវបានបញ្ចប់នៅទីក្រុងបាសេឡូណា ។
Gilbertស្ថិតក្នុងសម្លៀកបំពាក់ក្រុមពណ៌ក្រហមលាយសបានឆ្លងកាត់គំនូសព្រ័ត្រក្នុងថិរវេលា ៤ម៉ោង៤៥នាទីនិង២៨វិនាទីយកឈ្នះដំណាក់ដែលមានចម្ងាយផ្លូវ១៩៦.៣គីឡូម៉ែត្រចេញដំណើរពីទីក្រុង Andorraឆ្ពោះទៅកាន់ទីក្រុងបាសេឡូណាប្រទេសអេស្ប៉ាញ ។ បញ្ចប់ក្នុងលំដាប់ទី២គឺកីឡាករម្ចាស់ផ្ទះJoaquim Rodriguez ដោយបានប្រើអស់ថិរវេលាស្មើគ្នាជាមួយកីឡាករអុីតាលី Paolo Tiralongoដែលជិះឱ្យក្រុម Astana Pro Team ។
បន្ទាប់ពីបញ្ចប់ការប្រណាំង Gilbertបានធ្វើការឆ្លុះបញ្ចាំងថា៖«ការជិះឡើងភ្នំ Montjuicពិតជាពិបាកខ្លាំងណាស់ ។ នៅពេលដែលខ្ញុំឃើញកីឡាករ Joaquim Rodriguezចាប់ផ្តើមចេញដំណើរ ខ្ញុំដឹងថា នោះជាឱកាសប្រសិនជាខ្ញុំចង់ឈ្នះ ។ បន្ទាប់មក ខ្ញុំបានសម្រុកទៅមុខយ៉ាងលឿន។ ខ្ញុំដឹងយ៉ាងច្បាស់ថា គេមិនអាចជិះកង់លឿនជាងខ្ញុំបានទេ »។
បើទោះជាយ៉ាងនេះក្តី ប៉ុន្តែនៅលើតារាងពេលថិរវេលាសរុប រូបគេនៅតែពុំទាន់អាចដណ្តើមបានការនាំមុខជាដដែល ដ្បិត Joaquim Rodriguezដែលបានបញ្ចប់ដំណាក់នេះក្នុងលំដាប់ទី២នោះ នៅតែសន្សំពេលវេលាបានយ៉ាងល្អបំផុតគ្រងអាវកាក់ពណ៌ក្រហមក្នុងនាមជាអ្នកនាំមុខគេសម្រាប់ការប្រណាំងទាំងមូលដដែល ។
ឆ្លងកាត់ការប្រណាំងចំនួន៩ដំណាក់មកនេះ Joaquim Rodriguezដែលជិះឱ្យក្រុម Katusha Teamបានប្រើអស់ថិរវេលាតិចជាងគេបំផុតគឺ៣៤ម៉ោងនិង៤៤នាទីនិង៥៥វិនាទីនាំមុខកីឡាករអង់គ្លេស Christopher Froomeដែលប្រើថិរវេលាច្រើនជាង៥៣វិនាទី។ ចំណែកកីឡាករអេស្ប៉ាញម្នាក់ទៀតអាល់បឺតូ កុងតាឌ័រស្ថិតនៅលំដាប់ទី៣បន្ទាប់ពីបានប្រើថិរវេលាច្រើនជាងកីឡាករ Rodriguez ១នាទី ។
សូមបញ្ជាក់ថាការប្រណាំងកម្មវិធី Tour of Spainឆ្នាំនេះចែកចេញជា២១ដំណាក់និងមានចម្ងាយផ្លូវសរុប៣៣៦០គីឡូម៉ែត្រ។ ដោយឡែកដំណាក់ទី១០ដែលជាដំណាក់បន្តមានចម្ងាយផ្លូវ១៩០គីឡូម៉ែត្រដោយការប្រណាំងចាប់ចេញដំណើរពីទីក្រុង Ponteareas ឆ្ពោះទៅកាន់ទីក្រុង Sanxenxoប្រទេសអេស្ប៉ាញ ៕
ចែករំលែកព័តមាននេះ