ខេត្តកំពត ៖ រថយន្តកូរ៉េចំណុះ២តោនកន្លះដឹកកម្មករផ្លូវដែកជាង២០នាក់បានក្រឡាប់ផ្ងារជើងជះកម្មករដេករដូករណែលពេញផ្លូវ តែសំណាងល្អពុំមាននរណាម្នាក់រងរបួសធ្ងន់នោះទេ គ្រាន់តែរលាត់ដៃជើង ខណៈដឹកកម្មករទៅធ្វើការពេលភ្លៀងកំពុងធ្លាក់ខ្លាំងរអិលក្រឡាប់តែម្តង ដែលហេតុការណ៍នេះបានកើតឡើងតាមបណ្តោយផ្លូវជាតិលេខ៣ ត្រង់ចំណុចផ្លូវកោង ស្ថិតក្នុងភូមិគីឡូម៉ែត្រលេខ១២ ឃុំកោះតូច ស្រុកទឹកឈូ កាលពីវេលាម៉ោង៦និង៣០នាទីព្រឹកថ្ងៃទី២៧ សីហា ២០១២ ។
ប្រភពព័ត៌មានឱ្យដឹងថា រថយន្តកូរ៉េដឹកកម្មករផ្លូវដែកជាង២០នាក់ចេញពីក្រុងកំពតឆ្ពោះទៅការដ្ឋាននៅខាងលិចផ្សារវាលរេញ ខណៈភ្លៀងកំពុងធ្លាក់ខ្លាំង ។ លុះមកដល់ចំណុចកើតហេតុផ្លូវកោង ហើយរអិលអ្នកបើកបរព្យាយាមទប់ចង្កូត តែទប់មិនឈ្នះក៏ជាន់ហ្វ្រាំង បណ្តាលឱ្យក្រឡាប់ជះកម្មកររងរបួសតែម្តង តែសំណាងល្អពុំមានអ្នកស្លាប់នោះទេ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ