AFP បានចុះផ្សាយដោយយោងលើរបាយការណ៍ពីធនាគារអភិវឌ្ឍន៍អាស៊ី(ADB) ដោយបញ្ជាក់ថា កំណើនសេដ្ឋកិច្ចដ៏រឹងមាំអាចជួយលើកកម្រិតកម្ពស់ភូមាឱ្យស្ថិតនៅក្នុងក្រុមប្រទេសដែលមានប្រាក់ចំណូលមធ្យមនៅក្នុងឆ្នាំ២០២០ខាងមុខប្រសិនបើភូមាអាចយកឈ្នះលើឧបសគ្គដែលរារាំងកំណែទម្រង់ ។
នៅក្នុងរបាយការណ៍របស់ ADB បញ្ជាក់ថាផលិតផលសរុបក្នុងប្រទេស(GDP) របស់ភូមាមានសក្តានុពលនឹងកើនឡើងប្រហែលពី៧ទៅ៨ភាគរយក្នុងមួយឆ្នាំ ខណៈពេលប្រាក់ចំណូលមធ្យមសម្រាប់បុគ្គលម្នាក់អាចកើនឡើង៣ដងក្នុងរយៈពេល១៨ឆ្នាំខាងមុខ ។ADB បានអំពាវនាវឱ្យមានការវិនិយោគផ្នែកសំណង់សិក្សាអប់រំ សុខភាព និងសង្គមកិច្ចកាន់តែច្រើន ដើម្បីឱ្យប្រទេសភូមាស្ថិតនៅក្នុងទិសដៅរីកចម្រើនចីរកាល ។
លោកស្ទីហ្វេន ក្រូហ្វ អនុប្រធាន ADB បានថ្លែងថាមានសក្តានុភាពដ៏រឹងមាំដល់ការរីកចម្រើនរបស់ភូមា និងដើម្បីឱ្យមានភាពប្រាកដប្រជាលើសក្តានុពលនោះភូមាចាំបាច់ត្រូវពុុះពារជាបន្តបន្ទាប់នៅក្នុងការធ្វើកំណែទម្រង់ ។ការគ្រប់គ្រងសេដ្ឋកិច្ចដែលមានកំហុសឆ្គងក្នុងអំឡុងពេលជាច្រើនទសវត្សក្រោមការដឹងនាំរបស់រដ្ឋាភិបាលផ្តាច់ការយោធាធ្វើឱ្យមានលក្ខណៈអន់ថយជាងប្រទេសជិតខាងក្នុងផ្នែកបទដ្ឋានជីវភាពរស់នៅ និងបច្ចុប្បន្នភូមាស្ថិតក្នុងក្រុមប្រទេសមានប្រាក់ចំណូលទាបរួមជាមួយអាហ្វហ្គានីស្ថាន បង់ក្លាដេស កម្ពុជា និងនេបា៉ល់ ដោយប្រាក់ចំណូលមធ្យមចំពោះបុគ្គលម្នាក់តិចជាង១.០២៥ដុល្លារក្នុងមួយឆ្នាំ ។
លោកក្រូហ្វ បញ្ជាក់ថា «ការរីកចម្រើនចាំបាច់ត្រូវលាតសន្ធឹងទៅលើមនុស្សគ្រប់រូប តាំងពីវណ្ណៈកណ្តាលដល់វណ្ណៈក្រីក្រ ។ ទៅថ្ងៃអនាគតភូមាអាចរីកចម្រើនដូចគ្នានឹងបណ្តាប្រទេសជិតខាងនៅក្នុងភូមិភាគ »។ ADBនិងធនាគារពិភពលោក(WB) ទើបតែបើកទីស្នាក់ការនៅភូមាក្រោយពេលធ្វើកំណែទម្រង់លើការដឹកនាំនៃរដ្ឋាភិបាលអាណត្តិថ្មី ៕
ចែករំលែកព័តមាននេះ