ADផ្ទាំងផ្សព្វផ្សាយពាណិជ្ជកម្ម

ស្ត្រីចំណាស់កើតរោគសរសៃប្រសាទចាក់សាំងដុតសម្លាប់ខ្លួន

13 ឆ្នាំ មុន

២៧ ខែ សីហា ឆ្នាំ ២០១២ ម៉ោង ០៩:០៣

ខេត្តកំពត ៖ ស្ត្រីចំណាស់ម្នាក់បានយកសាំងចាក់ស្រោចដុតខ្លួន បណ្តាលឱ្យស្លាប់យ៉ាងអាណោចអាធ័មបំផុតដែលត្រូវបានគេប្រទះឃើញកាលពីវេលាម៉ោង៥ល្ងាចថ្ងៃទី២៦ សីហា នៅភូមិគាថាវង់លើ ឃុំត្រពាំងសាលាខាងលិច ស្រុកបន្ទាយមាស ។ ស្ត្រីរងគ្រោះឈ្មោះលន់ យ៉ើ អាយុ៦៣ឆ្នាំ ហើយបើតាមការអះអាងពីក្រុមគ្រួសារថា មានរោគសរសៃប្រសាទយូរឆ្នាំមកហើយ ។

នៅថ្ងៃកើតហេតុស្ត្រីរងគ្រោះនៅផ្ទះតែម្នាក់ឯង ព្រោះប្តី និងកូនៗរវល់នៅរោងចិញ្ចើមទា ហើយក៏មិនមានរឿងឈ្លោះប្រកែកអ្វីក្នុងគ្រួសារដែរ ។ សាក្សីរស់នៅក្បែរផ្ទះស្ត្រីរងគ្រោះសន្និដ្ឋានថា ស្ត្រីខាងលើបានចាក់សាំងដុតសម្លាប់ខ្លួនឯងតាំងពីចន្លោះម៉ោង៩ ម៉ោង១០ម៉្លេះ ព្រោះនៅវេលាម៉ោងនេះគេឃើញស្ត្រីឈ្មោះលន់ យ៉ើ បានកាន់ដបទៅទិញសាំងដោយប្រាប់គេថា យកទៅចាក់ម៉ាស៊ីនបូមទឹកដាក់ស្រែ ទើបមិនមានអ្នកចាប់អារម្មណ៍ លុះនៅវេលាម៉ោង៥ល្ងាចថ្ងៃដដែលមានក្មេង២-៣នាក់ បានទៅរកបេះផ្លែត្របែកនៅក្បែរផ្ទះស្ត្រីរងគ្រោះ ក៏ស្រាប់តែប្រទះឃើញសពស្ត្រីខាងលើបង្កឱ្យមានការភ្ញាក់ផ្អើលតែម្តង ។ បើតាមការអះអាងរបស់កូនប្រុសស្ត្រីរងគ្រោះថា ម្តាយរបស់ខ្លួនកើតរោគសរសៃប្រសាទយូរឆ្នាំមកហើយ ហើយមុនធ្វើអត្តឃាតនេះក៏មិនមានទំនាស់អ្វីនឹងក្រុមគ្រួសារដែរ ។