វិបត្តិសេដ្ឋកិច្ចសាកលបានរុញច្រានឱ្យតម្លៃរបស់របរគ្រប់បែបយ៉ាងធ្លាក់ថ្លៃយ៉ាងខ្លាំង រាប់ចាប់តាំងពីទង់ដែងទៅដល់ធ្យូង ។ ឃើញដូច្នេះហើយទើបក្រុមហ៊ុន Cartel ដែលជាក្រុមហ៊ុនគ្រប់គ្រងផលិតផលកៅស៊ូនៅលើពិភពលោកកំពុងមានវិធានការវាយបកវិញដើម្បីដំឡើងថ្លៃកៅស៊ូ ។ ក្រុមប្រទេសអាស៊ីអាគ្នេយ៍ចំនួន៣ដែលកាន់កាប់ការផ្គត់ផ្គង់កៅស៊ូ៧០%នៅលើពិភពលោកនិយាយថា ពួកគេនឹងទទួលយកការផ្គត់ផ្គង់ និងរក្សាទុកការផ្គត់ផ្គង់ទាំងអស់នោះដោយដុតកម្ទេចដើមកៅស៊ូចាស់ៗចោល ដោយសង្ឃឹមថានឹងជួយលើកកម្ពស់តម្លៃដែលបានធ្លាក់ចុះ៦០% ចាប់តាំងពីខែកុម្ភៈ ឆ្នាំ២០១១ មក ។
វិធានការនេះធ្វើឡើងដោយក្រុមប្រឹក្សាកៅស៊ូត្រីភាគីអន្តរជាតិមានមូលដ្ឋាននៅទីក្រុងបាងកក ដែលតំណាងដោយប្រទេសថៃ ឥណ្ឌូណេស៊ី និងម៉ាឡេស៊ី ។ កាលពីថ្ងៃសុក្រកន្លងទៅ តម្លៃកៅស៊ូនៅក្នុងទីផ្សារដោះដូរផលិតផលនៅទីក្រុងតូក្យូកើន៩%ចាប់ពីមានការធ្លាក់ចុះជិត៣ឆ្នាំកន្លងមកនេះ ពោលគឺកៅស៊ូ១គីឡូក្រាមថ្លៃ២២១យ៉េន ស្មើនឹង២,៧៨ដុល្លារអាមេរិក ។ ខុសពីឆ្នាំនេះតម្លៃកៅស៊ូបានឈានឡើងដល់៥២៨យ៉េនក្នុង១គីឡូក្រាមកាលពីខែកុម្ភៈ ឆ្នាំ២០១១ តែក្រោយមកបានធ្លាក់ចុះវិញ ស្របពេលជាមួយនឹងតម្លៃប្រេងដែរ ។ តាមការពិតទៅ ការធ្លាក់ចុះនេះដោយសារតែប្រទេសដែលប្រើប្រាស់កៅស៊ូធំៗមានដូចជា ចិន និងប្រេស៊ីលមានការថមថយសកម្មភាពផ្នែកសំណង់ ។
យោងតាមក្រុមហ៊ុនផ្តល់ទិន្នន័យ CEIC បានឱ្យដឹងថា ចិនជាប្រទេសដែលប្រើកៅស៊ូធំបំផុតនៅលើពិភពលោក ដោយបង្កើនការនាំចូលកៅស៊ូដល់ទៅ១៦%ស្មើនឹង១,២លានតោននៅក្នុងឆ្នាំនេះ បើគិតចាប់ពីដើមឆ្នាំមក ។ នៅពេលទំហំនៃការនាំចូលកៅស៊ូចូលមកប្រទេសចិនកើនឡើង តម្លៃនាំចូលកៅស៊ូរបស់ចិនបានធ្លាក់ចុះ១៦%មកនៅ៥៥១លានដុល្លារ ។
យ៉ាងណាក៏ដោយការធា្លក់ចុះតម្លៃកៅស៊ូបានជួយឱ្យកម្រិតប្រាក់ចំណេញទទួលបានច្រើនដល់បណ្តាក្រុមហ៊ុនផលិតសម្បកកង់រថយន្តមួយចំនួនដូចជា ក្រុមហ៊ុន Bridgestone របស់ជប៉ុន និងក្រុមហ៊ុន Kumho របស់កូរ៉េខាងត្បូង ៕
ចែករំលែកព័តមាននេះ