រាជធានីភ្នំពេញ ៖ លោកថោង ខុន រដ្ឋមន្រ្តីក្រសួងទេសចរណ៍ បានចាត់ទុកការនាំមកនូវបច្ចេកវិទ្យាថ្មីក្នុងការផ្គត់ផ្គង់ថាមពលដែល ប្រើប្រាស់ពន្លឺព្រះអាទិត្យគឺជាការចូលរួមចំណែកយ៉ាងសំខាន់ដល់ការអភិវឌ្ឍទស្សនទានទេសចរណ៍បៃតងនៅក្នុងព្រះរាជាណាចក្រកម្ពុជា ។ លោករដ្ឋមន្ត្រីបានលើកឡើងដូច្នេះ ក្នុងឱកាសអញ្ជើញចូលរួមក្នុងពិធីសម្ពោធក្រុមហ៊ុន Green Earth Technology Service ដែលរៀបចំធ្វើឡើងនៅសណ្ឋាគារណាហ្គាវើល កាលពីថ្ងៃទី២១ សីហា ឆ្នាំ២០១២ ។
លោក ថោង ខុន មានប្រសាសន៍ថា ស្របពេលដែលពិភពលោកទាំងមូលបាននិងកំពុងប្រឈមនឹងការវិវត្តថ្មីឥតឈប់ឈរលើមូលដ្ឋានសេដ្ឋកិច្ច សង្គមនិងបរិស្ថាន ដែលស្តែងឡើងតាមរយៈការប្រែប្រួលជាច្រើនដូចជា ភាពមិនប្រាកដប្រជានៃវិបត្តិសេដ្ឋកិច្ចសាកលលោកនោះ បញ្ហាគ្រោះធម្មជាតិបានកើតឡើងជាបន្តបន្ទាប់ ហើយកម្តៅភពផែនដី ការរលាយទឹកកកនៅតំបន់ប៉ូល រលកយក្សស៊ូណាមិ បានជះឥទ្ធិពលលើវិស័យទេសចរណ៍ ។ ឆ្លើយតបបញ្ហាប្រឈមទាំងអស់នេះ ការយកចិត្តទុកដាក់ដល់ទស្សនទានបៃតងគឺជាការចាំបាច់និងមានសារសំខាន់ជាមូលដ្ឋាន ខណៈពេលដែលពិភពលោកទាំងមូលកំពុងបោះជំហានទៅមុខក្នុងសម័យកាលបៃតង ។
លោករដ្ឋមន្រ្តីបញ្ជាក់ថា ការអភិវឌ្ឍទេសចរណ៍បៃតងដែលជាគំរូអភិវឌ្ឍន៍ គិតគូរដល់ការអភិរក្សថែរក្សាសម្បត្តិវប្បធម៌ ធនធានធម្មជាតិ និង បរិស្ថានប្រកបដោយនិរន្តរភាព មានសារសំខាន់និងចាំបាច់ផងដែរសម្រាប់សាកលលោកបច្ចុប្បន្ន។ ទាំងអស់នេះ ក៏ទាមទារឲ្យមានការចូលរួមពីគ្រប់ភាគីពាក់ព័ន្ធក្នុងការអភិវឌ្ឍ គ្រប់គ្រង និងការធ្វើធុរកិច្ចក្នុងឧស្សាហកម្មទេសចរណ៍ ហើយការចូលរួមនាពេលនេះមិនត្រឹមតែផ្អែកលើផ្នែករដ្ឋប៉ុណ្ណោះទេ ប៉ុន្តែសំដៅដល់តួនាទីរបស់ប្រតិបត្តិករទេសចរណ៍ ព្រមទាំងអ្នកផ្តល់សេវាកម្មនានាដែលទ្រទ្រង់លើប្រធានបទជំរុញការចូលរួមវិស័យទេសចរណ៍ក្នុងការធានានិរន្តរភាពនៃប្រភពថាមពល ។
ដោយឡែកសម្រាប់កម្ពុជា លោករដ្ឋមន្រ្តីបានឲ្យដឹងថា កម្ពុជាកំពុងធ្វើសមាហរណកម្មខ្លួនទៅក្នុងតំបន់និងសាកលលោក ដោយត្រូវរៀបចំខ្លួនឲ្យទាន់ពេលវេលា ធានាឲ្យបាននូវការអភិវឌ្ឍសម្រាប់រយៈពេលយូរអង្វែង ។ កម្ពុជា ខិតខំប្រឹងប្រែងឈរលើទស្សនទានក្នុងការអភិវឌ្ឍវិស័យទេសចរណ៍បៃតងតាមរយៈការប្រឡងប្រណាំងទីក្រុងស្អាត ការអភិវឌ្ឍអេកូទេសចរណ៍ និងយុទ្ធនាការទេសចរណ៍ម្នាក់ដើមឈើមួយដើម និងយុទ្ធនាការទីក្រុងស្អាតជាទីក្រុងគ្មានសំរាមជាថង់ប្លាស្ទិកហើរតាមខ្យល់ ។
ដូច្នេះ ការនាំមកនូវបច្ចេកវិទ្យាថ្មីៗក្នុងការផ្គត់ផ្គង់ថាមពលប្រើប្រាស់ពន្លឺព្រះអាទិត្យ (Solar Energy) ដែលសម្ពោធប្រើប្រាស់់នៅថ្ងៃនេះ គឺពិតណាស់ថាជាការរួមចំណែកអភិវឌ្ឍន៍ទស្សនទានបៃតងនៅកម្ពុជាស្របតាមអ្វីដែលបានលើកឡើងខាងលើ ។ ការងាកមកប្រើថាមពលពន្លឺព្រះអាទិត្យ និងជួយការពារបរិស្ថាន ៕
ចែករំលែកព័តមាននេះ