រាជធានីភ្នំពេញ ៖ ព្រឹកថ្ងៃទី២៧ សីហា ២០១២ នេះ សម្តេចតេជោនាយករដ្ឋមន្រ្តី ហ៊ុន សែន បានអញ្ជើញជាអធិបតីដ៏ខ្ពង់ខ្ពស់ក្នុងពិធីបើកកិច្ចប្រជុំថ្នាក់រដ្ឋមន្រ្តីសេដ្ឋកិច្ចអាស៊ានលើកទី៤៤ នៅក្រុងសៀមរាប ។
កិច្ចប្រជុំថ្នាក់រដ្ឋមន្រ្តីសេដ្ឋកិច្ចអាស៊ានលើកទី៤៤ ដែលមានប្រទេសទំាង១០ក្នុងតំបន់អាស៊ីអាគ្នេយ៍ចូលរួមនេះ ធ្វើឡើងបន្ទាប់ពីក្រុមឧត្តមមន្រ្តីនៃក្រុមប្រឹក្សាសេដ្ឋកិច្ចអាស៊ានកាលពីថ្ងៃទី២៥ សីហា ២០១២ បានធ្វើការពិភាក្សារួមគ្នាអំពីតំបន់វិនិយោគ និងធ្វើការពិនិត្យទៅលើរបាយការណ៍មួយចំនួនស្ដីពីតំបន់សេរីអាស៊ាន និងស្វែងរកផលចំណេញខាងផ្នែកពាណិជ្ជកម្មក្នុងតំបន់ និងពិភពលោក មុននឹងដាក់ជូនរដ្ឋមន្រ្តីសេដ្ឋកិច្ចអាស៊ានពិនិត្យសម្រេចបន្ត ។
គួរបញ្ជាក់ថា ក្រៅពីដំណើរការនៃកិច្ចប្រជុំក្រុមរដ្ឋមន្ត្រីសេដ្ឋកិច្ចអាស៊ានដែលមានរយៈពេល៧ថ្ងៃ នៅក្នុងខេត្តសៀមរាប ក៏នឹងមានការជួប ពិភាក្សារវាងក្រុមរដ្ឋមន្ត្រីបណ្ដាប្រទេសអាស៊ានជាមួយនឹងបណ្តាប្រទេសនៅក្រៅតំបន់ចំនួន៨ផ្សេងទៀតចូលរួមផងដែរ រួមមានសហរដ្ឋអាមេរិក អូស្ត្រាលី កាណាដា ឥណ្ឌា នូវែលហ្សេឡង់ រុស្ស៊ី ចិន និងជប៉ុន ។ ជាមួយគ្នានេះដែរ យោងតាមសេចក្តីប្រកាសព័ត៌មានមួយរបស់ស្ថានទូតអាមេរិកប្រចាំកម្ពុជាបានឱ្យដឹងថា សហរដ្ឋអាមេរិកមានគម្រោង នឹងបញ្ជូនលោករ៉ន ខឺក ដែលជាទីប្រឹក្សាសេដ្ឋកិច្ចជាន់ខ្ពស់របស់លោកប្រធានាធិបតីអាមេរិក បារ៉ាក់ អូបាម៉ា មកកាន់កម្ពុជា ចាប់ពីថ្ងៃទី៣០-៣១ ខែសីហា ដើម្បីចូលរួមកិច្ចប្រជុំជាមួយរដ្ឋមន្ត្រីពាណិជ្ជកម្មអាស៊ាន និងជួបប្រជុំផ្នែកធុរកិច្ចកំពូលរវាងសហរដ្ឋអាមេរិក អាស៊ាន ផងដែរ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ