រាជធានីភ្នំពេញ ៖ នៅថ្ងៃនេះទី២៧ សីហា អតីតផ្កាយ២ឈ្មោះ ចាន់ ឫទ្ធីឌី និងត្រូវបាននាំខ្លួនឡើងសាលាដំបូងរាជធានី ។ នេះជាការឱ្យដឹងពីលោកឧត្តមសេនីយ៍ទោ ខៀវ សាម៉ន នាយកមន្ទីរប្រឆាំងគ្រឿងញៀនក្រសួងមហាផ្ទៃ ។ លោកឧត្តមសេនីយ៍ទោមានប្រសាសន៍ឱ្យដឹងទៀតថា គ្រឿងញៀនដែលត្រូវបានរឹបអូសមានថ្នាំ មេតំហ្វេតាមីន និងម៉ាទឹកកក(ICE)សរុបរួមគ្នាមានទម្ងន់ប្រមាណ៤,៧គីឡូក្រាម ។ លោកនាយកមន្ទីរប្រឆាំងគ្រឿងញៀនបានឱ្យដឹងទៀតថា ដោយសារតែមានការតាមចាប់បក្សពួកទើបត្រូវបានពន្យារពេលបញ្ជូនជនត្រូវចោទ ។
នគរបាលមន្ទីរប្រឆាំងគ្រឿងញៀនបាននាំខ្លួនអតីតផ្កាយពីរ ចាន់ ប្ញទ្ធីឌី មេឧក្រិដ្ឋជនគ្រឿងញៀនទៅចង្អុលបង្ហាញបក្សពួកជាឈ្មួញដែលនាំគ្រឿងញៀនពីប្រទេសឡាវមកចែកចាយ និងធ្វើការឆែកឆេរលំនៅឋានមួយកន្លែងទៀត កាលពីវេលាម៉ោង៤និង២០នាទីរសៀលថ្ងៃទី២៦ សីហា ឆ្នាំ ២០១២ ដែលមានយីហោរតនាពេជ្រសំអាងការ ស្ថិតក្នុងក្រុមទី៦ ភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ ។
ការចុះឆែកឆេរនោះមានការសហការពីកម្លាំងសមត្ថកិច្ចមូលដ្ឋាន និងមានការចូលរួមពីសំណាក់ព្រះរាជអាជ្ញារងសាលាដំបូងរាជធានី ដោយបាននាំយកអតីតផ្កាយពីរទៅធ្វើការចង្អុលបង្ហាញ ។ លំនៅឋានខាងលើនោះ មានស្លាកយីហោរតនាពេជ្រសំអាងការ ស្ថិតក្នុងភូមិខាងលើ ហើយនៅក្នុងប្រតិបត្តិការឆែកឆេរនោះ កម្លាំងសមត្ថកិច្ចបានឃាត់ខ្លួនមនុស្សពីរនាក់ដែលជាម្ចាស់ផ្ទះ គឺប្តីឈ្មោះ ឌៀប ស៊ុនឡាយ អាយុ៥១ឆ្នាំ និងប្រពន្ធ ញ៉ម សុខា អាយុ៤៩ឆ្នាំ ។ ក្នុងការចាប់ខ្លួននេះ សមត្ថកិច្ចបានដកហូតថ្នាំញៀនប្រភេទមេតំហ្វេតាមីន WY ចំនួន ៣.៧១៩,៥ក្រាម ថ្នាំប្រភេទម៉ាទឹកកកចំនួន ៩៨៩,៩ក្រាម រថយន្តម៉ាកកាមរីបាឡែន ពណ៌ទឹកប្រាក់មួយគ្រឿង និងជញ្ជីងថ្លឹងគ្រឿងញៀនមួយគ្រឿង ។
មន្ត្រីសមត្ថកិច្ចនិយាយថា សម្ភារដែលត្រូវដកហូតបានខាងលើនោះ គឺរកឃើញនៅក្នុងផ្ទះប្តីប្រពន្ធទាំងពីរនាក់ ។ តាមការសាកសួរ គឺពួកគេបានលក់គ្រឿងញៀនឱ្យឈ្មោះ ចាន់ ប្ញទ្ធីឌី ក្នុងមួយគីឡូក្រាមតម្លៃ៣៥.០០០ដុល្លារ ហើយគ្រឿងញឿនទាំងនោះនាំចូលមកពីប្រទេសឡាវ ក្នុងមួយគីឡូក្រាមតម្លៃ៣២.០០០ដុល្លារ ។ ដោយឡែកឈ្មោះ ចាន់ ប្ញទ្ធីឌី លក់ចេញបន្តក្នុងមួយគីឡូក្រាម៤២.០០០ដុល្លារ ។
ស្របពេលដែលមានព័ត៌មានពីការចាប់ខ្លួនអតីតឧត្តមសេនីយ៍ទោរូបនេះ តាមប្រភពពីខេត្តព្រះវិហារបានឱ្យដឹងថា ចាន់ ឫទ្ធីឌី ធ្លាប់បានទៅកាន់តំបន់កំពង់ស្រឡៅដែលស្ថិតនៅក្នុងភូមិសាស្ត្រស្រុកឆែប ខេត្តព្រះវិហារជាប់ព្រំប្រទល់ស្រុកមឿងខូង ប្រទេសឡាវ ។ តំបន់នោះជាច្រកនាំចូលដ៏សំខាន់ថ្នំាញៀនចេញពីតំបន់ត្រីកោណមាស ជាព្រំប្រទល់រវាងប្រទេសភូមា ថៃនិងឡាវ ។ គេមិនដឹងថាឈ្មោះនេះទៅកាន់តំបន់នោះដោយមូលហេតុអ្វីនោះទេ លុះដល់មានការបែកធ្លាយពីមុខរបរជួយដូរថ្នាំញៀនដ៏ធំសម្បើមមួយ ទើបមានការភ្ញាក់ផ្អើលគ្រប់គ្នា ។ អ្វីដែលធ្វើឱ្យមានការចាប់អារម្មណ៍ផងដែរនោះ គឺលំនៅឋាននរបស់អតីតផ្កាយ២រូបនេះគឺជាភូមិគ្រឹះដ៏ស្តុកស្តម្ភមួយដែលមានតម្លៃរាប់លានដុល្លារ ។ កាលពីថ្ងៃទី២៥ សីហា កន្លងមកនេះកំណាត់ឈើប្រណីតជាច្រើនដែលដឹកប្រមាណ៧រថយន្តត្រូវបានរឹបអូសពីក្នុងបរិវេណផ្ទះអតីតផ្កាយ២នេះដែរ ហើយសុទ្ធសឹងជាឈើពាក់កណ្តាលកែច្នៃ ។ អតីតផ្កាយ២រូបនេះមានអាយុ៤៥ឆ្នាំ និងប្រពន្ធជាអ្នកលក់គ្រឿងសំណង់នៅព្រែកប្រា ។ ចំពោះសំណួរថា ប្រសិនបើមានការចាប់ខ្លួនបែបនេះតើលំនៅឋានដ៏ស្គឹមស្គៃរបស់ជនរូបនេះនឹងត្រូវរឹបអូស ឬបែបណា ? ត្រូវបានមន្ត្រីប្រឆាំងគ្រឿងញៀននិយាយថា នោះជាការសម្រេចរបស់តុលាការ។ ចំណែកសមត្ថកិច្ចគ្រាន់តែកសាងសំណុំរឿងបញ្ជូនមកតុលាការតែប៉ុណ្ណោះ ។ ការចាប់ខ្លួនអតីតផ្កាយ២ដែលជាថៅកែបៀរហ្គាដិនរស្មីបឹងកេងកងផង នោះ បានធ្វើឱ្យមានការចាប់អារម្មណ៍ពីសាធារណជន ។
គួររំលឹកថា តាមប្រភពព័ត៌មានពីមន្ត្រីសមត្ថកិច្ចចម្រុះក្នុងប្រតិបត្តិការខាងលើ បានឱ្យដឹងជាជំហានដំបូងថា មុនពេលឈានដល់ការឃាត់ខ្លួនឈ្មោះ ចាន់ ឫទ្ធីឌី គឺនគរបាលជំនាញបានធ្វើការស្រាវជ្រាវអស់រយៈពេលជាងមួយខែកន្លងមកហើយ ទើបកំណត់បានមុខសញ្ញាដ៏ធំម្នាក់នេះ ។
មុនការចាប់ខ្លួននារសៀលថ្ងៃទី២៤ សីហា នេះ គឺសមត្ថកិច្ចបានប្រើប្រាស់កម្លាំងជំនាញអន្ទងទិញថ្នាំញៀនពីឈ្មោះ ចាន់ ឫទ្ធីឌី ចំនួនពីរខាំ ។ ពេលនោះឈ្មោះ ចាន់ ឫទ្ធីឌី ក៏បានយកថ្នាំញៀនប្រភេទម្សៅមកលក់ឱ្យម៉ូយតាមទីតាំងដែលបានណាត់ជួបគ្នា ។ ពេលគាត់យកថ្នាំញៀនមកដល់ក៏ត្រូវក្រុមសមត្ថកិច្ចព័ទ្ធចាប់តាមដងផ្លូវ ប៉ុន្តែត្រូវឈ្មោះចាន់ ឫទ្ធីឌី ជិះរថយន្តម៉ាកធុនដ្រា មួយគ្រឿង បើករត់សំដៅទៅចូលភូមិគ្រឹះរបស់ខ្លួន ជាហេតុធ្វើឱ្យសមត្ថកិច្ចជំនាញបង្ខំចិត្តធ្វើការឡោមព័ទ្ធចាប់ខ្លួនឈ្មោះចាន់ ឫទ្ធីឌី បាននិងធ្វើការឆែកឆេរលំនៅឋានភ្លាមៗបានរកឃើញ ថ្នាំញៀនគ្រាប់ប្រមាណ២ម៉ឺនគ្រាប់ និងប្រភេទម្សៅប្រមាណជាង២០កញ្ចប់ធំ ។
ក្រោយពេលចូលឆែកឆេរដល់ក្នុងលំនៅឋានដ៏ស្កឹមស្កៃរបស់ឈ្មោះចាន់ ឫទ្ធីឌី សមត្ថកិច្ចក៏បានឱ្យដឹងថា ឈ្មោះចាន់ ឫទ្ធីឌី គឺជាមុខសញ្ញារកស៊ីជួញដូរថ្នាំញៀនដ៏ធំមួយអស់រយៈពេលជាយូរមកហើយ និងពុំធ្លាប់ត្រូវបានចាប់ខ្លួនឡើយ ដោយសារឈ្មោះចាន់ ឫទ្ធីឌី ប្រកបមុខរបររកស៊ីបើកហាងបៀរហ្គាឌិន ផឹកស៊ីមួយកន្លែងយីហោរស្មីបឹងកេងកង បន្លំភ្នែកអ្នកដទៃដើម្បីបិទបាំងមុខរបរជួញដូរថ្នាំញៀនរបស់ខ្លួន ។
ចំពោះហាងរស្មីបឹងកេងកងនៅវេលាល្ងាចថ្ងៃដដែល ក្រុមសមត្ថកិច្ចបានចុះឆែកឆេររុករកថ្នាំញៀនបន្ត ប៉ុន្តែពុំទាន់ដឹងលទ្ធផលនៅឡើយទេ ។ ដោយឡែកប្រតិបត្តិការឆែកឆេរក្នុងភូមិគ្រឹះខាងលើ សមត្ថកិច្ចសម្រេចដកហូតបានរថយន្តចំនួន៤គ្រឿង មានម៉ាកធុនដ្រា មួយគ្រឿង ឡិចស៊ីស៤៧០ មួយគ្រឿង មែរសឺដេស មួយគ្រឿង និងរថយន្តប្រភេទទួរីសមួយគ្រឿង។
នៅក្នុងភូមិគ្រឹះដ៏ស្កឹមស្កៃនេះមិនមែនជាភូមិគ្រឹះធម្មតាឡើយ ដែលខាងក្នុងភូមិគ្រឹះនេះបំពាក់ដោយគ្រឿងសង្ហារឹមយ៉ាងប្រណីតបំផុតគ្មានពីរ ៕
ចែករំលែកព័តមាននេះ