ខេត្តពោធិ៍សាត់ ៖ អ្នកក្រុងពោធិ៍សាត់ដែលរស់នៅលើដីទាំង៥កន្លែងក្នុងសង្កាត់ផ្ទះព្រៃ គឺដីអតីតផ្លូវយន្តហោះ ដីច្រមុះជ្រូកផ្សារចាស់ ខាងក្រោយសាលាខេត្ត ខាងក្រោយមន្ទីរពេទ្យ និងក្នុងប្លុកមន្ទីរសាធារណការ និងដឹកជញ្ជូន ដែលបាននាំគ្នាតវ៉ាសុំឱ្យលោកអភិបាលខេត្តជួយចេញប្លង់កម្មសិទ្ធិស្របច្បាប់ ដែលពួកគាត់រស់នៅជិត៣០ឆ្នាំមកហើយនោះ ឥឡូវនេះត្រូវបានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បញ្ជាមកលោកអភិបាលខេត្តឱ្យពិនិត្យមើល និងធ្វើប្លង់ជូនតាមការជាក់ស្តែង ។ ការផ្តល់ជូនពីសំណាក់សម្តេចតេជោនេះ បានធ្វើឱ្យបងប្អូនប្រជាពលរដ្ឋដែលកន្លងមករស់នៅពុំមានសិទ្ធិពេញលេញ មិនហ៊ានសង់ផ្ទះធំ និងរស់នៅទាំងបារម្ភនោះ ឥឡូវនេះពួកគាត់រំភើបចិត្តយ៉ាងខ្លាំងហើបជើងពីដី រហូតនិយាយលែងចង់ចេញទៅជាអួលដើមក និងហូរទឹកភ្នែកទៅវិញ ។
កាលពីថ្ងៃទី២៥ សីហា លោក ខូយ សុខា អភិបាលខេត្ត លោកឆាយ ម៉ាទីណាល់ អភិបាលក្រុង លោកឧត្តមសេនីយ៍ សារុន ចាន់ធី ស្នងការនគរបាលខេត្ត លោកចេង ឡៃ ប្រធានមន្ទីររៀបចំដែនដី នគររូបនីយកម្ម សំណង់ និងសុរិយោដី លោកកាង ប៉េងហាក់ ប្រធានមន្ទីរសាធារណការ និងដឹកជញ្ជូន និងលោកសៅ ម៉ុង ចៅសង្កាត់ផ្ទះព្រៃ បានចុះពិនិត្យមើលទីតាំងទាំង៥កន្លែងខាងលើ ដើម្បីផ្តល់ដំណឹងល្អ និងចាត់ឱ្យមន្ត្រីជំនាញចាប់ផ្តើមវាស់វែងធ្វើប្លង់ជូនតែម្តង ។
លោកខូយ សុខា អភិបាលខេត្តជម្រាបថា ដីដែលបងប្អូនតវ៉ានេះឥឡូវសម្តេចបានឯកភាពហើយសូមកុំព្រួយបារម្ភទៀត លោកនឹងឱ្យមន្ត្រីជំនាញចាប់ផ្តើមវាស់វែងដីច្រមុះជ្រូកផ្សារចាស់មុនគេនៅថ្ងៃស្អែកនេះ ។ បងប្អូនកុំទៅណាចាំជួបជាមួយមន្ត្រីជំនាញចុះវាស់វែង ហើយនៅពេលទទួលបានប្លង់កម្មសិទ្ធិស្របច្បាប់ សូមបងប្អូនសង់ផ្ទះឱ្យមានរបៀបរៀបរយចូលរួមកែលម្អសោភ័ណភាពក្រុង ដើម្បីឈានទៅប្រឡងប្រណាំងទីក្រុងស្អាត ចៀសវាងសំណង់អនាធិបតេយ្យ ។ ប្រជាពលរដ្ឋខេត្តពោធិ៍សាត់ បោះឆ្នោតជូនគណបក្សប្រជាជនកម្ពុជាស្ទើរតែគ្រប់គ្នា ដូច្នេះពេលបងប្អូនមានទុក្ខកង្វល់សម្តេចមិនអាចធ្វើមិនដឹងមិនឮបានទេ គឺត្រូវតែដោះស្រាយជូនតាមការជាក់ស្តែង ហើយប្រជាពលរដ្ឋខ្មែរត្រូវតែមានដីសម្រាប់រស់នៅដោយស្របច្បាប់ ។
នៅពេលទទួលបានដំណឹងល្អនេះ បងប្អូនប្រជាពលរដ្ឋអរលោតជើងផុតពីដីរកអ្វីប្រៀបផ្ទឹមពុំបាន ព្រោះពួកគាត់ដេកឱបទុក្ខកង្វល់ជាយូរមកហើយ ។ បងប្អូនប្រជាពលរដ្ឋប្តេជ្ញាបោះឆ្នោតជូនគណបក្សប្រជាជនកម្ពុជា ដើម្បីបានសម្តេចតេជោ ហ៊ុន សែន ធ្វើជានាយករដ្ឋមន្ត្រីជារៀងរហូត ៕
ចែករំលែកព័តមាននេះ