ខេត្តព្រះសីហនុ ៖ ស្នងការដ្ឋាននគរបាលខេត្តព្រះសីហនុ កាលពីព្រឹកថ្ងៃទី២៥ សីហា ២០១២ មានរៀបចំការប្រឡងវាស់ស្ទង់សមត្ថភាពដល់មន្ត្រីនគរបាលជាតិ ដែលបម្រើការងារនៅប៉ុស្តិ៍នគរបាលច្រកទ្វារកំពង់ផែសមុទ្រនៃស្នងការដ្ឋាននគរបាលខេត្តព្រះសីហនុចំនួន៥៣នាក់ ក្នុងនោះមានស្រីម្នាក់ ដើម្បីពង្រឹងការងារ ។
លោកឧត្តមសេនីយ៍ត្រី ព្រហ្ម និមល និងឧត្តមសេនីយ៍ត្រី សាន់ សុខវិជ្ជា អនុប្រធាននាយកដ្ឋានអន្តោប្រវេសន៍នៃអគ្គស្នងការនគរបាលជាតិបានឱ្យដឹងដូចគ្នាថា ដើម្បីពង្រឹងជំនាញអន្តោប្រវេសន៍ដល់មន្ត្រីនគរបាលជាតិ និងដើម្បីឈានទៅរកនិរន្តរភាពលើផ្នែកអន្តោប្រវេសន៍ដល់ជនបរទេស ទើបអគ្គស្នងការនគរបាលជាតិបានបង្កើតនូវកម្មវិធីប្រឡងវាស់ស្ទង់សមត្ថភាពដល់គ្រប់មន្ត្រីនគរបាលទទួលបន្ទុកអន្តោប្រវេសន៍ទាំងអស់ ជាក់ស្តែងថ្ងៃនេះយើងបានធ្វើការប្រឡងវាស់ស្ទង់សមត្ថភាពដល់មន្ត្រីនគរបាលខេត្តព្រះសីហនុ ។
ចំពោះវិញ្ញាសាប្រឡងថ្ងៃនេះរួមមានជំនាញអន្តោប្រវេសន៍ ចំណេះដឹងទូទៅ ភាសាអង់គ្លេស (លំហាត់និយាយ និងសរសេរ) វាយអត្តបទជាភាសាខ្មែរ និងភាសាអង់គ្លេសដោយកុំព្យូទ័រ ។ លោកឧត្តមសេនីយ៍ត្រី ព្រហ្ម និមល បានបញ្ជាក់ដោយសង្កត់ធ្ងន់ថា នៅមុនពេលអនុវត្តន៍កម្មវិធីប្រឡងវាស់ស្ទង់សមត្ថភាពដល់មន្ត្រីនគរបាលជាតិ ក្រុមការងារបានធ្វើការបណ្តុះបណ្តាលបន្ថែម និងរំលឹកមេរៀនឡើងវិញរយៈពេល៣ម៉ោងទៅ៤ម៉ោងលើមុខវិជ្ជាចំនួន៥រួមមាន អន្តោប្រវេសន៍នីតិរដ្ឋបាលទូទៅ នីតិសមុទ្រ ការទំនាក់ទំនងអន្តរជាតិ និងការគ្រប់គ្រងអង្គភាពបែបទំនើប ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ