ខេត្តព្រះសីហនុ ៖ នារីវ័យក្មេង២នាក់ដែលគេស្គាល់ថា ជាកម្មករចំការដូងប្រេងបានលង់ទឹកស្លាប់ ខណៈពេលដែលពួកនាងចុះទៅលាងដៃលាងជើងនៅនឹងរណ្តៅមួយកន្លែងបន្ទាប់ពីសម្រាកពីការងារ ដើម្បីទៅហូបបាយថ្ងៃត្រង់ កាលពីថ្ងៃទី ២៥ សីហា ២០១២ វេលាម៉ោង១២ថ្ងៃត្រង់ នៅចំណុចវាលត្រាក (ប្លុក C4) ស្ថិតក្នុងភូមិអន្លង់ក្រពើ ឃុំជើងគោ ស្រុកព្រៃនប់ ។
តាមព័ត៌មានពីក្រុមគ្រួសារសពឱ្យដឹងថា នារីរងគ្រោះ២នាក់ ១-ឈ្មោះសឿន នីន អាយុ២២ឆ្នាំ ជាកម្មករកាប់ព្រៃក្នុងចំការដូងប្រេង មានទីលំនៅក្រុម៩ ភូមិត្រពាំងគារ ឃុំជើងគោ ស្រុកព្រៃនប់ និង២-ឈ្មោះអូច សាត អាយុ២២ឆ្នាំ ជាកម្មករដូចគ្នាមានទីលំនៅភូមិវាលមាស ឃុំវាលរេញ ស្រុកព្រៃនប់ ។ តាមលោកហ៊ូ សឿន អាយុ៥៦ឆ្នាំ ជាឪពុកបង្កើតរបស់សពនារីរងគ្រោះឈ្មោះសឿន នីន បានរៀបរាប់ថា កូនស្រីគាត់បានចូលបម្រើការងារជាកម្មករចំការដូងប្រេងប្រមាណជាង២ឆ្នាំមកហើយ គ្រាន់នឹងបានកម្រៃខ្លះៗមកជួយផ្គត់ផ្គង់គ្រួសារ ។ មុនពេលកើតហេតុក្រោយពីឈប់សម្រាកពី ការងារម៉ោង១១ព្រឹក កូនរបស់គាត់ និងនារីរងគ្រោះម្នាក់ទៀតបានជិះគោយន្តសម្រាប់ដឹកកម្មករទៅសម្រាកហូបបាយ ។ លុះពេលធ្វើដំណើរតាមផ្លូវស្រាប់តែគោយន្តដែលកូនគាត់ជិះនោះបានជាប់ផុង ធ្វើឱ្យកម្មករមួយចំនួននាំគ្នាទៅមុន និងលាងដៃលាងជើងនៅចំណុចនោះ ហើយនាំគ្នាទៅហូបបាយអស់ នៅសល់តែកូនគាត់ និងនារីរងគ្រោះម្នាក់ទៀត ។ មួយសន្ទុះក្រោយនារីរងគ្រោះទាំង២នាក់បានចុះទៅលាងដៃលាងជើងនៅចំណុចកើតហេតុខាងលើ ក៏ត្រូវលង់ទឹកស្លាប់ទាំងពីរនាក់តែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ