កីឡាករអេស្ប៉ាញចច ឡូរេនហ្សូ(Jorge Lorenzo)បានសម្តែងនូវក្តីត្រេកអរយ៉ាងខ្លាំងបន្ទាប់ពីបានយកឈ្នះការនាំមុខបណ្តោះអាសន្ននៃការប្រណាំងម៉ូតូជីភីកម្មវិធី Czech Republic Grand Prixនៅទីលានប្រណាំង Brno សាធារណរដ្ឋ ឆែកកាលពីថ្ងៃសៅរ៍ទី២៥ ខែសីហា កន្លងមកនេះ។
ឡូរេនហ្សូ ដែលជាអ្នកបើកបរឱ្យក្រុមយ៉ាម៉ាហា បានយកឈ្នះការនាំមុខបណ្តោះអាសន្នជាលើកទី៣ក្នុងរដូវកាល បន្ទាប់ពីបញ្ចប់ការប្រណាំងក្នុងថិរវេលា១នាទីនិង៥៥.៧៩៩វិនាទីប្រជែងយកឈ្នះកីឡាករអង់គ្លេស Cal Crutchlowរបស់ក្រុមប្រណាំង Tech 3 Yamahaដែលបានបញ្ចប់ការប្រណាំងក្នុងចំណាត់ថ្នាក់ទី២។ Crutchlow ប្រើអស់ថិរវេលា១នាទីនិង៥៥.៩៩៥វិនាទីគឺ០.១៩៦វិនាទីយឺតជាងកីឡាករឡូរេនហ្សូ ។ ឯចំណាត់ថ្នាក់ទី៣បានទៅលើកីឡាករជើងខ្លាំងមកពីប្រទេសអេស្ប៉ាញដដែលគឺដានី ប៉េដ្រូហ្សា ។ ប៉េដ្រូហ្សា ដែលបើកបរឱ្យក្រុមហុងដាបានបញ្ចប់ការប្រណាំងក្នុងថិរវេលា១នាទីនិង៥៦.៣២៧វិនាទី។
កីឡាករអាមេរិក បេន ស្ប៉ាយ ដែលជាអ្នកបើកបរឱ្យក្រុមយ៉ាម៉ាហា បានបញ្ចប់ការប្រណាំងដោយប្រើអស់ថិរវេលា១នាទីនិង៥៦.៣៣១វិនាទីគឺ០.៥២៨វិនាទីយឺតជាងកីឡាករឡូរេនហ្សូ និងតាមពីក្រោយដោយកីឡាករអុីតាលី Andrea Dovizioso របស់ក្រុម Tech 3 Yamaha ដែលបញ្ចប់ការប្រណាំងក្នុងលំដាប់ទី៥។ កីឡាករជើងខ្លាំងរបស់អុីតាលីវ៉ាឡិនទីណូ រ៉ូស៊ី បានប្រើអស់ថិរវេលា១នាទីនិង៥៦.៧៣៥វិនាទី ស្ថិតក្នុងលំដាប់ទី៦ ។ ឯកីឡាករអាល្លឺម៉ង់ Stefan Bradl បញ្ចប់ការប្រណាំងស្ថិតក្នុងចំណាត់ថ្នាក់ទី៧។ កីឡាកររូបនេះបានប្រើអស់ថិរវេលា១នាទីនិង៥៦.៨២៧វិនាទី យឺតជាងកីឡាករឡូរេនហ្សូ១.០២៨វិនាទី។
បន្ទាប់ពីទទួលបានជោគជ័យ ឡូរេនហ្សូបានបញ្ជាក់ថា៖«វាជាចុងសប្តាហ៍ដ៏ស្រស់ត្រកាលមួយ។ ស្អែកគឺជាថ្ងៃប្រកួតប្រជែងយ៉ាងស្វិតស្វាញបំផុត។
ខ្ញុំគិតថា វាច្បាស់ជាមានការប្រដេញគ្នាយ៉ាងខ្លាំងក្លាបំផុត»។ គេបានបន្តថា៖«ខ្ញុំពិតជាសប្បាយចំពោះលទ្ធផលក្នុងពេលនេះ។ ខ្ញុំបានចាប់ផ្តើមយ៉ាងល្អ ប៉ុន្តែបន្តិចក្រោយមក ការគ្រប់គ្រងម៉ូតូរបស់ខ្ញុំហាក់មានបញ្ហា » ។សម្រាប់ឡូរេនហ្សូដែលជាជើងឯកពិភពលោក២សម័យកាល នេះគឺជាការនាំមុខបណ្តោះអាសន្នលើកទី៤៧ហើយនៃការប្រណាំងចំនួន ១៧២លើកក្នុងអាជីព ៕
ចែករំលែកព័តមាននេះ