ខេត្តបាត់ដំបង ៖ នារីបម្រើការងារក្នុងហាងខារ៉ាអូខេមួយកន្លែងបានព្យាយាមលេបថ្នាំសម្លាប់ខ្លួនជាបន្តបន្ទាប់មិនបានសម្រេច ព្រោះតែមានវិវាទជាមួយប្រុសស្នេហ៍ ។ បន្ថែមពីលើនេះដោយសារនាងក្តៅក្រហាយនឹងប្រុសស្នេហ៍ហេងស៊យនេះថ្លើមធំវាយដំនាងគ្មានប្រណីរួច ដោះយកគ្រឿងអលង្ការពីខ្លួននាងអស់ទៀត ។ តាមការបំភ្លឺពីសន្តិសុខថា នាងព្យាយាមលេបថ្នាំសម្លាប់ខ្លួនលើកចុងក្រោយនេះនៅម៉ោងប្រហែលជាង៨យប់ថ្ងៃទី២៥ សីហា ២០១២ ខណៈដែលនាងចេញទៅជួបប្រុសស្នេហ៍នៅខាងក្រៅ រួចត្រឡប់មកដេកប្រកាច់នៅក្នុងបន្ទប់ដេកក្នុងហាងខារ៉ាអូខេវិញ ។
សន្តិសុខនិយាយថា នារីបម្រើការងារក្នុងហាងខារ៉ាអូខេដែលមិនចង់រស់នេះឈ្មោះចិន អាយុ២៧ឆ្នាំ ជាអ្នកធ្វើការក្នុងហាងខារ៉ាអូខេមួយកន្លែងនៅក្នុងភូមិរតនៈ សង្កាត់រតនៈ ក្រុងបាត់ដំបង ។ ប្រភពដដែលបានបន្តថា នារីឈ្មោះចិន បានស្នាក់នៅក្នុងហាង ប៉ុន្តែនាងបានលេបថ្នាំដែលគេមិនស្គាល់ឈ្មោះសម្លាប់ខ្លួននោះ ក្នុងគ្រាដែលនាងចេញទៅជួបសង្សារនៅខាងក្រៅ រួចត្រឡប់មកដេកប្រកាច់ម្នាក់ឯងក្នុងបន្ទប់វិញ ។ មិត្តភក្តិរបស់នាងនិយាយថា នាងបានខ្ទាស់ទ្វារជាប់ពីខាងក្នុង ដោយមិនបាននិយាយអ្វីទាំងអស់ លុះបន្តិចក្រោយមកទើបសង្សាររបស់នាងទូរស័ព្ទមកប្រាប់អ្នកស្គាល់ក្នុងហាងថា នាងចិនបានលេបថ្នាំសម្លាប់ខ្លួន ។ គ្រានោះក៏មានការភ្ញាក់ផ្អើលទៅមើល តែត្រូវនាងចាក់គន្លឹះទ្វារជាប់ធ្វើឱ្យថៅកែ និងបុគ្គលិកបម្រើការងារទាំងអស់ឆោឡោកាន់តែខ្លាំង រហូតថៅកែហាងទូរស័ព្ទសុំអន្តរាគមន៍ពីសមត្ថកិច្ចភ្លាមៗតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ