រាជធានីភ្នំពេញ ៖ វគ្គបណ្តុះបណ្តាលគ្រូបង្វឹកបាល់ទាត់កម្រិតខ្ពស់បង្រៀនដោយគ្រូមកពី FIFA ដែលចាប់ផ្តើមពីថ្ងៃទី២០ សីហា នៅក្នុងមជ្ឈមណ្ឌលបាល់ទាត់ជាតិរាជធានីភ្នំពេញ មកដល់ថ្ងៃទី២៤ សីហា កន្លងទៅបានបញ្ចប់ហើយ ដោយមានការអញ្ជើញចូលរួមបិទវគ្គពីលោកគល់ សុផាណា អគ្គលេខាធិការសហព័ន្ធកីឡាបាល់ទាត់កម្ពុជា និងសិក្ខាកាមចូលរៀនក្នុងវគ្គនេះដែលសុទ្ធតែជាគ្រូបង្វឹក គ្រូជំនួយតាមក្លិបធំៗលេងនៅក្នុង League គ្រូ និងគ្រូជំនួយជម្រើសជាតិ គ្រូកំពុងបង្ហាត់ក្រុមជម្រើសតាមប្រភេទអាយុនានាសរុប៣០នាក់ ។
លោក Kelly Cross ជាគ្រូបង្វឹកដែល FIFA បញ្ជូនមកបង្ហាត់បង្រៀនមានប្រសាសន៍ថា វគ្គបណ្តុះបណ្តាលនេះមានលក្ខណៈពិសេសដោយសារការសិក្សាមានការអនុវត្តផ្ទាល់លើទីលានរួមជាមួយនឹងការសិក្សាទៅលើទ្រឹស្តី មិនតែប៉ុណ្ណោះយុទ្ធវិធីនៃការកសាងក្រុមមួយឱ្យខ្លាំង ការធ្វើឱ្យកីឡាករប្រកបដោយថាមពល និងពោរពេញដោយកលល្បិចក៏ត្រូវបានលោកលើកយកមកបង្រៀនផងដែរ ។
មានប្រសាសន៍ក្នុងឱកាសនោះ លោកគល់ សុផាណា អគ្គលេខាធិការសហព័ន្ធកីឡាបាល់ទាត់កម្ពុជាបានថ្លែងអំណរគុណចំពោះសហព័ន្ធកីឡាបាល់ទាត់អន្តរជាតិ ដែលបានអនុញ្ញាតឱ្យសហព័ន្ធកីឡាបាល់ទាត់រៀបចំវគ្គសិក្សានេះ ដើម្បីអភិវឌ្ឍន៍ធនធានមនុស្សក្នុងវិស័យកីឡាដ៏មានប្រជាប្រិយភាពក្នុងពិភពលោកនេះ ។
លោកក៏បានផ្តាំផ្ញើដល់សិក្ខាកាមទាំងអស់ដែលបានចូលរួមវគ្គសិក្សាថ្ងៃដំបូងរហូតដល់ថ្ងៃបញ្ចប់នេះ ត្រូវយកចំណេះដឹងដែលខ្លួនទទួលបានពីលោកគ្រូបង្វឹកទៅបម្រើការងារតាមអង្គភាពរៀងៗខ្លួនឱ្យមានប្រសិទ្ធភាពសម្រាប់វិស័យបាល់ទាត់នាពេលបច្ចុប្បន្ន និងទៅអនាគត ។ សូមបញ្ជាក់ថា សិក្ខាកាមទាំងអស់ដែលបានចូលរួមក្នុងវគ្គនេះសុទ្ធតែបានទទួលវិញ្ញាបនប័ត្របញ្ជាក់ការសិក្សាគ្រប់ៗគ្នា ៕
ចែករំលែកព័តមាននេះ