រាជធានីភ្នំពេញ ៖ កីឡាករទិត្យ សុវណ្ណគិរី មកពីក្លិបសមាគមកីឡាប្រដាល់ក្រសួងកសិកម្ម និងឃឹម ឌីម៉ា មកពីក្លិបអប្សរាក្បាច់គុនខ្មែរប្រកួតស្មើពិន្ទុជាមួយកីឡាករថៃ រីឯកីឡាករនួន វិចិត្រ មកពីក្លិបសមាគមកីឡាប្រដាល់ក្រសួងមហាផ្ទៃ ប្រកួតចាញ់ពិន្ទុកីឡាករថៃ នៅលើសង្វៀនស្តាតចាស់ដែលរៀបចំឡើងដោយស្ថានីយទូរទស្សន៍អប្សរា កាលពីថ្ងៃសៅរ៍ ទី២៥ សីហាកន្លងមកនេះ ។
ទិត្យ សុវណ្ណគិរី ប៉ះជើងខ្លាំងYUOK KHAV SITPHANTOU ដែលមានប្រវត្តិធ្លាប់ផ្តួលគូប្រកួតឱ្យសន្លប់នៅលើសង្វៀនរហូតដល់ទៅ៣០ដងឯណោះ ប៉ុន្តែគិរី បានបង្ហាញភាពខ្លាំងរបស់ខ្លួនចាប់ពីទឹកទី១រហូតដល់ទឹកទី៣ ខណៈដែលYUOK KHAV SITPHANTOU បានបង្កើនការវាយបកវិញយ៉ាងសាហាវនៅទឹកទី៤ និងទី៥ ។ ស្នៀតកែង និងជង្គង់របស់គិរីបានធ្វើឱ្យកីឡាករថៃ ស្ថិតនៅក្នុងស្ថានភាពលំបាកយ៉ាងខ្លាំង ប៉ុន្តែបើនិយាយពីកម្លាំងវិញគឺចាញ់YUOK KHAV SITPHANTOU ដូច្នេះការផ្តល់ពិន្ទុស្នើគ្នានេះគឺជារឿងល្អបំផុត ។
កីឡាករឃឹម ឌីម៉ា ប្រកួតស្មើពិន្ទុជាមួយកីឡាករថៃ CHHATH CHHAY NOY SITPHANTOU ។ ឌីម៉ា ដែលមានស្នៀតកែង និងជង្គង់ល្អនោះទីបំផុតគេនៅតែជួបការលំបាក ខណៈដែលCHHATH CHHAY NOY SITPHANTOU បានប្រើស្នៀតជង្គង់ និងជើងវាយបកសងវិញយ៉ាងរហ័ស ប៉ុន្តែឌីម៉ា នៅតែរក្សាគោលជំហររបស់ខ្លួនក្នុងការវាយលុកមិនដកថយឡើយនៅក្នុងទឹកទី២ និងទី៣ ។ ទោះជាយ៉ាងណាកម្លាំងរបស់ឌីម៉ារក្សាបានល្អត្រឹមទឹកទី៤ប៉ុណ្ណោះ ទើបCHHATH CHHAY NOY SITPHANTOU សម្រុកចូលប្រើស្នៀតជើងទាត់មកលើឌីម៉ាផ្ទួនៗ ។ ឌីម៉ាមិនហ៊ានវាយសម្រុកឡើយនៅចុងទឹកទី៤ និងទី៥ ព្រោះកម្លាំងរបស់គេមានការថយចុះយ៉ាងខ្លាំង ទោះបីជាយ៉ាងណាគេបានប្រើកណ្តាប់ដៃវាយទប់ទល់ចំពោះការវាយបករបស់CHHATH CHHAY NOY SITPHANTOU ។
នួន វិចិត្រ ប្រកួតចាញ់ពិន្ទុកីឡាករថៃ SUPER LEK SITPHANTOU ។ វិចិត្រ ធ្វើបានល្អនៅត្រឹមទឹកទី១ និងទី២ប៉ុណ្ណោះ លុះចាប់ពីទឹកទី៣រហូតទៅត្រូវSUPER LEK SITPHANTOU បង្ខំឱ្យស្ថិតនៅអែបខ្សែរេញរហូត ។ ស្នៀតដៃ និងជង្គង់របស់វិចិត្រ ដែលល្បីថាល្អបំផុតនោះមិនអាចធ្វើអ្វីSUPER LEK SITPHANTOU បានឡើយ ហើយការបរាជ័យលើកនេះបានធ្វើឱ្យអ្នកមើលមិនសូវសប្បាយចិត្តប៉ុន្មានឡើយ ។
ក្រៅពីគូប្រកួតលក្ខណៈមិត្តភាពអន្តរជាតិនេះទៅនៅមានគូប្រកួតពិសេសៗជាច្រើនទៀតដូចជា កីឡាករ សេវ សំណាង មកពីក្លិបសមាគមកីឡាប្រដាល់ក្រសួងកសិកម្ម ប្រកួតឈ្នះពិន្ទុកីឡាករមង្គល សុភ័ក្រ មកពីសមាគមកីឡាប្រដាល់ខេត្តកោះកុង ។ កីឡាករពុទ្ធ ហ៊ុច មកពីក្លិបពុទ្ធសេរីវង្សកីឡា ប្រកួតចាញ់ពិន្ទុកីឡាករ លួន សុខខេង មកពីក្លិបសិង្ហកីឡា និងកីឡាករផុន ផាន់ណា មកពីក្លិបអប្សរាក្បាច់គុនខ្មែរ ប្រកួតឈ្នះពិន្ទុកីឡាករពុទ្ធ ឆាយរិទ្ធី មកពីក្លិបពុទ្ធសេរីវង្សកីឡា ៕
ចែករំលែកព័តមាននេះ