រាជធានីភ្នំពេញ ៖ រថយន្តម៉ាកឡង់គ្រីស្ស័រចង្កូតស្តាំ ពណ៌ស មួយគ្រឿងដែលអ្នកបើកស្រវឹងជោកជាំបានបើកបោះពួយឡើងចិញ្ចើមផ្លូវបុកចូលច្រកកាំជណ្តើរឡើងក្រោយផ្ទះ បណ្តាលឱ្យបាក់របងមួយផ្ទាំង និងជញ្ជាំងផ្ទះប្រេះបែក។ អ្វីដែលចាប់អារម្មណ៍នឹងការកើតមានគ្រោះថ្នាក់នេះអ្នកបើកបរបានឱ្យដឹងថា ដោយសារតែបត់ច្រឡំផ្លូវ ។
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១និង៤៥នាទីរំលងអធ្រាត្រឈានចូលថ្ងៃទី២៦ សីហា ២០១២ នៅផ្ទះលេខ៧១ តាមផ្លូវលេខ២២៣ សង្កាត់ផ្សារដើមគ ខណ្ឌទួលគោក ដែលជាផ្ទះរបស់លោកមេភូមិទី៤ បានជួលឱ្យជនជាតិវៀតណាម បើកលក់កាហ្វេយីហោសៃហ្គន ។ ទោះបីជាយ៉ាងណានៅក្នុងគ្រោះថ្នាក់នេះពុំបណ្តាលឱ្យមនុស្សរងរបួសឡើយ គឺគ្រាន់តែបាក់របងច្រកចូលកាំជណ្តើរ១ផ្ទាំងប្រមាណ១ម៉ែត្រ ហើយជញ្ជាំងប្រេះប្រមាណ៥ម៉ែត្រ ចំណែករថយន្តស្រុញក្បាលចំហៀងខាងឆ្វេង និងបែកស្តុបខាងក្រោយ ។
តាមសាក្សីនិយាយថា បន្ទាប់ពីបុកជញ្ជាំង ហើយនោះផ្នែកខាងក្រោយរថយន្តបានរេទៅបោកនឹងជញ្ជាំងផ្ទះជាប់បណ្តាលឱ្យប្រេះទាំងផ្ទាំង ហើយផ្នែកខាងមុខបានទៅប៉ះរបងបណ្តាលឱ្យបាក់មួយផ្ទាំង ។ នៅយប់នោះអ្នកបើកបររួមទាំងមិត្តភក្តិបានចុះពីក្នុងរថយន្តទាំងស្រវឹងជោកជាំ ហើយនាំគ្នារុញរថយន្តចេញពីជញ្ជាំងប្រុងបើកចេញតែរថយន្តពុំឆេះ ។ តាមអ្នកបើកបរឱ្យដឹងថា មូលហេតុដែលកើតមានគ្រោះថ្នាក់ដោយសារតែបត់ច្រឡំផ្លូវ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ