អាជ្ញាធរលីប៊ីកាលពីថ្ងៃទី២៥ សីហា បានបរិហារចំពោះការបំផ្លាញវិមានតម្កល់សពអ៊ិស្លាមនានា ដោយពួកអ៊ិស្លាមនិយមជ្រុលដោយសន្យាតាមរកចាប់ខ្លួនពួកអ្នកទទួលខុសត្រូវរឿងនេះ ចំណែកក្រសួងមហាផ្ទៃ និងក្រសួងការពារប្រទេស ត្រូវបានចោទ ប្រកាន់ថា មានសមត្ថភាពខ្សោយ ។
ប្រធានសមាជជាតិទូទៅ CGN ជាអាជ្ញាធរជាន់ខ្ពស់បំផុតរបស់ប្រទេសចាប់តាំងពីការបោះឆ្នោត កាលពីថ្ងៃទី៧ កក្កដា មកបានបរិហារថា នោះជាការបំផ្លិចបំផ្លាញ និងការចូលប្លន់អគារ និងបំផ្លាញស្នាដៃទាំងឡាយដែលតំណាងឱ្យសម័យកាលនៃប្រវត្តិសាស្ត្រមួយរបស់ប្រទេសយើង ហើយដែលស្នាដៃទាំងនេះមានលក្ខណៈវិទ្យាសាស្ត្រ អរិយធម៌ និងប្រវត្តិសាស្ត្រ ។
ប្រធានស្ថាប័ននោះលោកមូ៉ហា ម៉េដ អាល់ មេហ្គារី យ៉េវ ក្នុងសុន្ទរកថាមួយតាមទូរទស្សន៍ជាតិថ្លែងថា អំពើទាំងនេះត្រូវបដិសេធ និងហាមឃាត់ ដោយច្បាប់រដ្ឋ និងច្បាប់អ៊ិស្លាម ហើយពួកអ្នកទទួលខុសត្រូវដាច់ខាតត្រូវទទួលទោសតាមច្បាប់ ។ កាលពីព្រឹក ថ្ងៃទី២៥ សីហា ពួកអ៊ិស្លាមនិយមជ្រុលបានកម្ទេចវិមានតម្កល់សព អាល់ចា អាបអាល់ដាម៉ានី ជិតភាគកណ្តាលក្រុងទ្រីប៉ូលី ហើយប្រមាថផ្នូររបស់អតីតមេដឹកនាំអ៊ិស្លាមរូបនោះ ។ មុននេះពួកជ្រុលនិយមជាច្រើនសិបនាក់បានធ្វើឱ្យផ្ទុះកម្ទេចវិមានតម្កល់សពលោកស៊ិក អាប់ដេសសាឡេម អាល់អាស្មារ ជាប្រមុខអ៊ិស្លាមមួយរូប កាលពីសតវត្សទី១៥ នៅក្រុង ZLITEN ចម្ងាយ ១៦០គ.ម ខាងកើតក្រុងទ្រីប៉ូលី ជាទីលាននៃការប៉ះទង្គិចគ្នាចាប់តាំងពីយប់ថ្ងៃទី២៣ សីហា មក ។
បណ្ណាគារមួយ និងសាកលវិទ្យាល័យមានឈ្មោះលោកស៊ិក អាល់អាស្មា គឺជាគោលដៅនៃអំពើបំផ្លិចបំផ្លាញ និងការប្លន់ ។ សាក្សីទាំងឡាយគូស បញ្ជាក់ថា វិមានតម្កល់សពមួយទៀត ក៏រងការបំផ្លាញដែរ នៅក្រុងមីស្ត្រាតា ចម្ងាយ២០០គ.ម ខាងលិចក្រុងទ្រីប៉ូលី ៕
ចែករំលែកព័តមាននេះ