ការប្រយុទ្ធគ្នាយ៉ាងសាហាវនានាកើតមានកាលពីថ្ងៃទី២៥ សីហារវាងពួកឧទ្ទាម និងកងទាហាននៅក្រុងអាឡែប ជាទីក្រុងធំទី២របស់ស៊ីរី ជាសមរភូមិធំ ខណៈដែលសាកសពមនុស្សថ្មីៗជាច្រើនសិបនាក់ ត្រូវបានរកឃើញក្នុងតំបន់ក្រុងដាម៉ាស់ ។
ប្រឈមមុខចំពោះអំពើហិង្សាដែលពុំចុះថយឡើយ នៅស៊ីរី ក្រោយរយៈពេលជាង១៧ខែ នៃជម្លោះ លោកឡាក់ដា អីុប្រាហ៊ីមី អ្នកអាជ្ញាកណ្តាលអន្តរជាតិថ្មីសម្រាប់ស៊ីរីអះអាងថា បេកសកកម្មរបស់លោកពិតជាគួរឱ្យខ្លាច ។ លោកអះអាងបែបនេះ ពេលជួបសន្ទនាជាមួយប្រមុខអ.ស.ប លោកបាន គីមូន ។
លោកប្រាហ៊ីមី នឹងធ្វើការពីទីក្រុងញូវយ៉ក ចំណែកឯបេសកកម្មអ.ស.ប ទទួលបន្ទុកត្រួតពិនិត្យបទឈប់បាញ់គ្នា ដែលពុំអនុវត្ត ក្រោយបញ្ឈប់ការល្បាតពីខែមិថុនាមក ដោយសារការកើនឡើងនៃអំពើហិង្សាបានចាកចេញពីប្រទេសនេះ ។ ប្រមុខបេសកកម្មនោះ ឧត្តមសេនីយ៍សេនេហ្គាល់ លោកបាបាកា ហ្គាយ បានចាកចេញពីទីក្រុងដាម៉ាស់ កាលពីថ្ងៃទី២៥ សីហា ។
ខណៈដែលក្នុងខែសីហា ជម្លោះនៅស៊ីរី បណ្តាលឱ្យមនុស្សស្លាប់ជាង៤០០០នាក់ រយៈពេលតែ៣សបា្តហ៍ សាកសពមនុស្សរវាងពី៤០ ទៅ៥០នាក់ ត្រូវបានរកឃើញនៅដារ៉ាយ៉ា ជិតក្រុងដាម៉ាស់ដែលនៅទីក្រុងនោះជនស៊ីវិល និង ពួកឧទ្ទាម១០៩នាក់ ស្លាប់រយៈពេល៤ថ្ងៃចុងក្រោយនេះ ក្នុងប្រតិបត្តិការយោធាដ៏ធំមួយ ។ នេះបើយោងតាមតុល្យការរបស់អង្គការសិទ្ធិមនុស្សស៊ីរី OSDH ។
នៅទីក្រុងអាឡែបជាទីក្រុងសេដ្ឋកិច្ចរបស់ប្រទេសដែលកើតមានការប្រយុទ្ធគ្នារយៈពេលជាង១ខែមកហើយ មនុស្សភាគច្រើនបានចាកចេញពីទីនោះ ។
ទីភ្នាក់ងារព័ត៌មានផ្លូវការស៊ីរី SANA អះអាងថា កងទ័ពវាយរំដោះយកបានសង្កាត់សឺអីុហ្វអាល់ដាវឡា ពីក្រុមភេរវករប្រដាប់អាវុធ ដោយសម្លាប់ពួកនេះជាច្រើននាក់ ។ ម្យ៉ាងទៀត កងយន្តហោះបានវាយប្រហារលើសង្កាត់ជាច្រើនកាន់កាប់ដោយពួកឧទ្ទាម៕
ចែករំលែកព័តមាននេះ