ខេត្តកំពង់ឆ្នាំង ៖ ជនសង្ស័យមួយក្រុមមានស្រីមានប្រុសចំនួន៥នាក់ត្រូវបានមន្ត្រីប៉ូលិសព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តសហការជាមួយមន្ត្រីប៉ូលិសក្រុងកំពង់ឆ្នាំង ចាប់ឃាត់ខ្លួនកាលពីវេលាម៉ោង១០និង៣០នាទីព្រឹកថ្ងៃទី២៥ សីហា នៅក្នុងផ្ទះសំណាក់មួយកន្លែង ស្ថិតក្នុងសង្កាត់ខ្សាម ក្រុងកំពង់ឆ្នាំង និងជនសង្ស័យម្នាក់ទៀតដែលជាបក្សពួកក៏ត្រូវប៉ូលិសចាប់បាននៅស្រុកកំពង់ត្រឡាចផងដែរ បន្ទាប់ពីក្រុមនេះធ្វើសកម្មភាពលួចគោប្រជាពលរដ្ឋយកទៅពន្លះសាច់កាលពីយប់តែមិនបានសម្រេច ។
លោកវរសេនីយ៍ទោ ប៉ុល វុទ្ធី នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តឱ្យដឹងថា ដោយមានបទបញ្ជាពីលោកឧត្តមសេនីយ៍ត្រី អាត់ ខែម ស្នងការនគរបាលខេត្តដែលបានលើកឡើងក្នុងអង្គប្រជុំសប្តាហ៍កន្លងទៅ ស្តីពីចោរកម្មដែលតែងតែលួចសត្វគោរបស់ប្រជាពលរដ្ឋទៅកាប់ពន្លះយកសាច់ជារឿយៗនោះ លោកបានដឹកនាំកម្លាំងប៉ូលិសការិយាល័យសហការជាមួយប៉ូលិសក្រុងចេញល្បាតជារៀងរាល់យប់នៅតាមចំណុចដែលសង្ស័យ ។ ជាក់ស្តែងនៅវេលាម៉ោងប្រមាណជាង២រំលងអធ្រាត្រឈានចូលថ្ងៃទី២៥ សីហា ក្រុមល្បាតរបស់លោកបានជួបម្ចាស់គោឈ្មោះប្រាក់ សុគា អាយុ២៩ឆ្នាំ មានទីលំនៅភូមិត្រពាំងចឹក្សា សង្កាត់កំពង់ឆ្នាំង ដែលគាត់ប្រាប់ថា កំពុងដើររកគោ១ក្បាលបាត់មុននេះបន្តិច ។ គ្រាន់តែឮបែបនេះ មន្ត្រីប៉ូលិសគ្រប់ប៉ុស្តិ៍ ប៉ូលិសក្រុង និងខេត្តបានសហការគ្នាចេញតាមរុករកទាំងយប់ ប៉ុន្តែមិនបានប្រទះឃើញនោះទេ តែឃើញជនសង្ស័យ២នាក់ជិះម៉ូតូម៉ាកហុងដា សូនិច ពណ៌ខៀវ គ្មានស្លាកលេខមួយគ្រឿង ហើយនៅពេលដេញតាមក្រុមនេះគេចខ្លួនបាត់ ។
លោកបន្តថា នៅយប់នោះប៉ូលិសល្បាតរហូតទល់ភ្លឺក៏ឃើញសត្វគោដែលបាត់នោះដើរត្រឡប់ទៅផ្ទះវិញ។ ដោយមានការសង្ស័យថា ជនសង្ស័យលួចគោពន្លះយកសាច់មិនបានសម្រេចក៏លែងសត្វគោវិញ ហើយពួកគេបានទៅសម្ងំលាក់ខ្លួននៅផ្ទះសំណាក់ណាមួយក្នុងខេត្ត លោកក៏បានសុំការអនុញ្ញាតពីលោកស្នងការ និងព្រះរាជអាជ្ញាអមសាលាដំបូងខេត្ត ចុះឆែកឆេរតាមផ្ទះសំណាក់ក្នុងខេត្តរហូតឃាត់ខ្លួនបានតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ