ខេត្តកំពង់ធំ ៖ យុវជនម្នាក់ត្រូវបានសមត្ថកិច្ចនៃអធិការដ្ឋាននគរបាលក្រុងស្ទឹងសែន ធ្វើការឃាត់ខ្លួន ខណៈយុវជនរូបនេះជិះម៉ូតូដើររកកន្លែងបញ្ចាំ បន្ទាប់ពីលួចមិត្តភក្តិពីភ្នំពេញ កាលពីវេលាម៉ោង៦និង០៥នាទីល្ងាចថ្ងៃទី២៤ សីហា ២០១២ នៅចំណុចភូមិស្ទឹងសែន សង្កាត់កំពង់ក្របៅ ក្រុងស្ទឹងសែន។
តាមប្រភពព័ត៌មានពីលោកវរសេនីយ៍ត្រី ញ៉ែម ឈុនលី អធិការនគរបាលក្រុងបានឱ្យដឹងថា កាលពីល្ងាចថ្ងៃខាងលើកម្លាំងរបស់លោកបានឃើញជនសង្ស័យជិះម៉ូតូម៉ាកឌ្រីមសេ១២៥ ពណ៌ខ្មៅ ស៊េរីឆ្នាំ២០១១ ដើរសួររកកន្លែងបញ្ចាំ គាប់ជួនពេលនោះហាងលក់និងបញ្ចាំគេបិទទ្វារអស់ហើយ ដោយមានការសង្ស័យ ក៏ឃាត់សួរនាំរកលិខិតស្នាម។ ប៉ុន្តែត្រូវជនសង្ស័យឆ្លើយថា គ្មាន ម៉ូតូនេះម្ដាយទើបតែទិញឱ្យពុំបានយកមកជាមួយទេ ។ ពេលនោះកម្លាំងក៏ធ្វើការត្រួតពិនិត្យចាក់សោកែបម៉ូតូឃើញមាន សៀវភៅកាត់តឡុក និងប័ណ្ណទិញលក់ម៉ូតូដែលមានលេខទូរស័ព្ទនៅក្នុងនោះ និងបានទូរស័ព្ទតាមលេខក្នុងវិក័យប័ត្រជួបនឹងម្ចាស់ម៉ូតូផ្ទាល់ ដឹងថាជាចោរ ទើបសុំបញ្ជាពីលោកប៉ែន សារ៉ាត ព្រះរាជអាជ្ញាអមសាលាដំបូងខេត្ដធ្វើការឃាត់ខ្លួនតែម្ដង។ នៅចំពោះមុខសមត្ថកិច្ចជនសង្ស័យបានសារភាពថា ខ្លួនមានឈ្មោះជុំ សេងឆវី ភេទប្រុស អាយុ២០ឆ្នាំ ស្នាក់នៅបន្ទប់ជួលជាមួយម្ចាស់ម៉ូតូក្នុងខណ្ឌពោធិ៍សែនជ័យ រាជធានីភ្នំពេញ ពិតជាបានលួចម៉ូតូមិត្តភក្តិមែន ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ