ខេត្តបន្ទាយមានជ័យ ៖ កម្លាំងនគរបាលនៃអធិការដ្ឋាននគរបាលស្រុកព្រះនេត្រព្រះ កាលពីវេលាម៉ោង៩ព្រឹកថ្ងៃទី២៤ សីហា ២០១២ បានស្ទាក់ឃាត់រថយន្តម៉ាកកាមរីចំនួន៣គ្រឿងមានដឹកមនុស្សប្រុសស្រីនៅលើកំណាត់ផ្លូវជាតិលេខ៦ ត្រង់ចំណុចផ្លូវបំបែក (អតីតរង្វង់មូល) ស្ថិតក្នុងភូមិចក្រី ឃុំជប់វ៉ារី ស្រុកព្រះនេត្រព្រះ យកមកអធិការដ្ឋានដើម្បីសួរនាំ ដោយសង្ស័យឆ្លងដែនទៅរកការងារធ្វើនៅប្រទេសជិតខាងដោយខុសច្បាប់ ។
លោកវរសេនីយ៍ត្រី កែវ ប៊ុនយឿន អធិការនគរបាលស្រុកព្រះនេត្រព្រះ បានឱ្យដឹងថា បន្ទាប់ពីទទួលព័ត៌មានថា មានរថយន្តម៉ាកកាមរីចំនួន៣គ្រឿងមានដឹកមនុស្សប្រុសស្រី ក្នុង១គ្រឿងជិះចាប់ពី៧ទៅ៨នាក់ ណែនណាន់តាន់តាប់នោះ លោកបានចាត់កម្លាំងនគរបាលចរាចរចុះចាំស្ទាក់ឃាត់រថយន្តទាំងនោះនៅចំណុចខាងលើ ។ លុះមកដល់ម៉ោង៩ព្រឹកថ្ងៃខាងលើក៏មានរថយន្តចំនួន៣គ្រឿងភិនភាគដូចសេចក្តីរាយការណ៍ ក៏ធ្វើការ ឃាត់យកទៅអធិការដ្ឋាននគរបាលស្រុក រួចរាយការណ៍ទៅការិយាល័យជំនាញប្រឆាំងការជួញដូរមនុស្ស និងការពារអនីតិជនដើម្បីសួរនាំ ។
លោកវរសេនីយ៍ទោ សិទ្ធិ ឡោះ នាយការិយាល័យប្រឆាំងការជួញដូរមនុស្ស និងការពារអនីតិជនបានបញ្ជាក់ដែរថា តាមការសាកសួរពួកគេនិយាយថា ពួកគេមិនបានទៅធ្វើការនៅប្រទេសថៃទេ គឺគ្រាន់តែទៅធ្វើជាកម្មករដកដំឡូង បោចស្មៅចម្ការ និងដកស្ទូងស្រូវនៅស្រុកភ្នំព្រឹក ខេត្តបាត់ដំបងប៉ុណ្ណោះ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ