រាជធានីភ្នំពេញ ៖ ចាប់តាំងពីថ្ងៃទី២៣ ដល់ថ្ងៃទី២៧ សីហា ផលិតផលរបស់វៀតណាមដែលមានជាង២.០០០មុខ មកពីក្រុមហ៊ុនជាង១២០ ត្រូវបានដាក់តាំងបង្ហាញនិងលក់នៅ មជ្ឈមណ្ឌលម៉ុងឌីយ៉ាល់ រាជធានីភ្នំពេញ ។ នៅ ល្ងាចថ្ងៃទី២៣ សីហា ពិធីបើកសម្ពោធពិព័រណ៍ពាណិជ្ជកម្មនេះមានប្រជាពលរដ្ឋខ្មែរចូលរួមយ៉ាងច្រើនកុះករ ដោយមានការអញ្ជើញចូលរួមជាគណៈអធិបតីពីសំណាក់លោកម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម លោកត្រាន់ អាញ់ទួន អភិបាលរងខេត្តបែនជែ ប្រទេសវៀតណាម លោកស្រីវូ គីមហាញ់ ប្រធានសមាគមធុរកិច្ចនៃទំនិញវៀតណាមដែលមានគុណភាពខ្ពស់ ។
លោកម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម និងជាតំណាងលោកទេសរដ្ឋមន្ត្រីចម ប្រសិទ្ធ រដ្ឋមន្ត្រីក្រសួងពាណិជ្ជកម្មបានមានប្រសាសន៍ថា កម្ពុជាគឺជាប្រទេសមួយក្នុងចំណោមប្រទេសដែលមានការរីកចម្រើនឆាប់រហ័សបំផុតនៅក្នុងពិភពលោក ក្នុងរយៈពេល១ទសវត្សចុងក្រោយនេះ ។ សេដ្ឋកិច្ចកម្ពុជាបានបន្តរីកលូតលាស់ទៅទៀត ហើយត្រូវគេរំពឹងថានឹងមានកំណើន៦,៦%នៅក្នុងឆ្នាំ២០១២នេះ ។ លោកបន្តទៀតថា ពិព័រណ៍ពាណិជ្ជកម្មវៀតណាមកន្លងមកបានទទួលជោគជ័យជាផ្លែផ្កាសម្រាប់កម្ពុជា និងវៀតណាម ដែលត្រូវបានបង្ហាញជាសក្ខីភាពតាមរយៈការកើនឡើងនូវការវិនិយោគទុនផ្នែកពាណិជ្ជកម្ម និងបណ្តាទំនាក់ទំនងសេដ្ឋកិច្ចផ្សេងទៀតរវាងប្រទេសទាំង២កម្ពុជា-វៀតណាម ។
លោកស្រី វូ គីមហាញ់ ប្រធានសមាគមធុរកិច្ចនៃទំនិញវៀតណាមដែលមានគុណភាពខ្ពស់ក៏បានមានប្រសាសន៍ដែរថា ពិព័រណ៍នេះត្រូវបានប្រារព្ធធ្វើឡើងក្នុងកាលវេលាដ៏សំខាន់រវាងប្រទេសទាំង២ ហើយនេះជាពិព័រណ៍ពាណិជ្ជកម្មអន្តរជាតិដែលមានទ្រង់ទ្រាយធំ ផ្តុំដោយទំនិញ គុណភាពខ្ពស់ និងមានកិត្តិស័ព្ទរបស់វៀតណាមប្រចាំព្រះរាជាណាចក្រកម្ពុជា ។ លោកស្រីរំពឹងថា តាមរយៈពិព័រណ៍លើកនេះ សហគ្រាសវៀតណាម នឹងទទួលបានយោបល់ជាច្រើនពីប្រជាពលរដ្ឋខ្មែរ ដើម្បីផលិតផលវៀតណាមអាចបំពេញតម្រូវការល្អជាងមុន ។ ជាចុងក្រោយលោកស្រីក៏បានថ្លែងអំណរគុណដល់ក្រសួងពាណិជ្ជកម្មនៃព្រះរាជាណាចក្រកម្ពុជានាយកដ្ឋាន ជំរុញពាណិជ្ជកម្មដែលតែងតែគាំទ្រ និងជួយជ្រោមជ្រែងដល់ការរៀបចំពិព័រណ៍ផ្សារណាត់ទំនិញវៀតណាមគុណភាពខ្ពស់យ៉ាងស្មោះអស់ពីចិត្ត ។
គួរបញ្ជាក់ដែរថា នេះជាព្រឹត្តិការណ៍លើកទី១០ ដែលវៀតណាមបានរៀបចំពិព័រណ៍នេះឡើង ហើយពិព័រណ៍នេះមានស្តង់ចំនួន២២០ ដាក់តាំងបង្ហាញនូវផលិតផលជាច្រើន ដូចជាម្ហូបអាហារ សម្ភារប្រើប្រាស់ គ្រឿងក្រអូប សម្ភារការិយាល័យ គ្រឿងសិប្បកម្ម វិចិត្រសិល្បៈ សម្ភារកសិកម្ម គ្រឿងអេឡិចត្រូនិកនិងសម្ភារសំណង់ជាដើម ។ល។ ហើយនឹងមានការចូលរួមពីភ្ញៀវអតិថិជនខ្មែរនិងអន្តរជាតិជាច្រើននាក់ ៕
ចែករំលែកព័តមាននេះ