ខេត្តកំពង់ឆ្នាំង ៖ រហូតមកដល់ពេលនេះមានរយៈពេលជាងកន្លះខែហើយ ដែលករណីចោរប្លន់ដង្ខៅទិញគោយកប្រាក់អស់ចំនួន៧០លានរៀលបានដោយសុវត្ថិភាព នៅជើងភ្នំកង្រី ក្នុងភូមិសាស្រ្តភូមិពោធិ៍ ឃុំពោធិ៍ ស្រុកកំពង់លែងកន្លងទៅនេះនៅមិនទាន់បានចាប់ជនដៃដល់ពិតប្រាកដនៅឡើយ ។ ទោះបីជាបែបណា ជនសង្ស័យជាបក្សពួករួមគំនិតចំនួន២នាក់ត្រូវបានមន្រ្តីប៉ូលិសចាប់ខ្លួនភ្លាមៗ បន្ទាប់ពីក្រុមចោរធ្វើសកម្មភាពបានមួយថ្ងៃ ហើយពេលថ្មីៗនេះ ជនសង្ស័យម្នាក់ទៀតដែលជាអ្នកចម្លងកាណូតឱ្យជនដៃដល់ក្រោយពីធ្វើសកម្មភាពក៏ត្រូវប៉ូលិសចាប់ខ្លួនបញ្ជូនទៅសាលាដំបូងដាក់ឃុំជាបណ្តោះអាសន្នដែរ។ ទាំងនេះគឺមានន័យថា ប៉ូលិសបានខិតខំប្រឹងប្រែងក្នុងកិច្ចការងារបង្ក្រាបនេះយ៉ាងយកចិត្តទុកដាក់ជាទីបំផុត ។
មន្ត្រីប៉ូលិសដែលបានប្រឹងប្រែងក្នុងប្រតិបត្តិការនេះនិយាយថា ឈ្មោះប៉ូច ខ្លឹម អាយុ៣៤ឆ្នាំ មានទីលំនៅភូមិកំពង់បាចិន ឃុំពោធិ៍ ត្រូវបានចាប់ខ្លួនកាលពីថ្ងៃទី១៦ សីហា បន្ទាប់ស្រាវជ្រាវដឹងថា ឈ្មោះនេះបានយកកាណូតចម្លងជនដៃដល់ពីជើងភ្នំកង្រី មកក្រុងកំពង់ឆ្នាំងដាក់នៅភូមិចុងកោះ សង្កាត់ផ្សារឆ្នាំង ក្រោយពេលធ្វើសកម្មភាពប្លន់បានសម្រេច ។ ប្រភពដដែលបានបន្តថា ក្រុមជនល្មើសបានរៀបផែនការគិតទុកជាមុនជាច្រើនដងមុននឹងឈានដល់ធ្វើសកម្មភាពប្លន់បានសម្រេច ដោយសារផែនការមុនៗនៅពេលដង្ខៅទិញគោវេចប្រាក់ជាច្រើនទៅស្រុកកំពង់លែង នៅតាមកំណាត់ផ្លូវដែលក្រុមចោរត្រៀមធ្វើសកម្មភាពបានជួបឧបសគ្គដូចជា ជួបរ៉ឺម៉កម៉ូតូ ជួបអ្នកភ្ជួររាស់ ដកស្ទូងជាដើម ហើយគម្រោងផែនការត្រូវអាក់ខាន ។ ប៉ុន្តែនៅថ្ងៃទី៨ សីហា ខណៈដង្ខៅទិញគោឈ្មោះស៊ិន ឌូច អាយុ២៨ឆ្នាំ មានទីលំនៅនៅខេត្តតាកែវ បានមកបើកលុយចំនួន៧០លានរៀលពីផ្សារក្រោមខេត្តកំពង់ឆ្នាំង យកទៅស្រុកកំពង់លែងដើម្បីទិញគោដូចសព្វដង ក៏ត្រូវក្រុមចោរចំនួន២ពួនស្ទាក់វាយនៅតាមដងផ្លូវយកលុយនោះអស់ហើយគេចខ្លួនបាត់ ។
សូមរំលឹកថា ឈ្មោះស ហេន អាយុ៣៤ឆ្នាំ និងឈ្មោះយិន ទីន អាយុ៤៤ឆ្នាំ ទាំងពីរនាក់នេះត្រូវបានចាប់ខ្លួននៅថ្ងៃទី៩ សីហា បន្ទាប់ពីកើតហេតុនៃអំពើប្លន់នេះបានមួយថ្ងៃ ។ ចំណែកឈ្មោះប៉ូច ខ្លឹម ចាប់ខ្លួននៅថ្ងៃទី១៦ សីហា ដែលជននេះរួមគំនិតក្នុងអំពើប្លន់ ព្រោះបានយកកាណូតជួយចម្លងជនដៃដល់បន្ទាប់ពីប្លន់បានសម្រេច។ ជនសង្ស័យក្នុងអំពើប្លន់ខាងលើនេះ មានសរុបចំនួន៦នាក់ ដែលពេលនេះប៉ូលិសចាប់បាន៣នាក់ជាបក្សពួកសមគំនិត និងនៅសល់៣នាក់ទៀត ដែលក្នុងនោះ២នាក់ជាជនដៃដល់ ហើយជនសង្ស័យទាំង៣នាក់នេះកំពុងគេចខ្លួនពីកន្លែងមួយទៅកន្លែងមួយក្រោយពីដឹងថា បក្សពួកត្រូវប៉ូលិសចាប់ខ្លួន ។
តាមប្រភពក្រៅផ្លូវការដែលទទួលបានពីប្រជាពលរដ្ឋនៅក្នុងឃុំពោធិ៍និយាយថា ក្រុមចោរទាំងនោះ ជាបងប្អូន និងបក្សពួកដែលធ្លាប់ជាប់ពន្ធនាគារ ហើយក្រោយពេលប្លន់បាន គឺចែកលុយគ្នាអស់ហើយ ដោយម្នាក់ៗបាន១៣លានរៀល ចំណែកឯអ្នកចម្លងកាណូតបាន៣លានរៀល ។ អ្នកដែលបានចាប់ខ្លួនកំពុងនៅក្នុងពន្ធនាគារក៏មានចំណែកដែរ គឺគេវេរមកឱ្យដោយហេតុនេះហើយទើបមានគេកំពុងរត់ការដោះជនសង្ស័យទាំង៣នាក់ពីការឃុំឃាំង ប៉ុន្តែមិនអាចទៅរួចព្រោះសាលាដំបូងខេត្តបានប្រកាន់ច្បាប់ជាធំជាងប្រាក់ ។ ប្រភពដដែលបានបន្តថា អ្នករត់ការដោះលែងមនុស្សទាំងនោះ គឺជាមន្រ្តីប៉ូលិសម្នាក់ ។ ព័ត៌មានក្រៅផ្លូវការនេះទុកឱ្យថ្នាក់លើស្រាវជ្រាវចុះ ពិសេសអង្គភាពប្រឆាំងអំពើពុករលួយ សូមមេត្តាជួយវែកមុខផង ៕
ចែករំលែកព័តមាននេះ