រាជធានីភ្នំពេញ ៖ លោកឧកញ៉ា អូស្មាន ហាស្សាន់ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងជាប្រធានមូលលិធិអភិវឌ្ឍន៍មូស្លីម កម្ពុជាបានមានប្រតិកម្ម និងបដិសេធជុំវិញមន្ត្រីជាន់ខ្ពស់ថៃ ដែលបានចោទប្រកាន់ថា ខ្មែរអ៊ិស្លាមកម្ពុជា ត្រូវបានគេជួលឱ្យទៅធ្វើសង្គ្រាមនៅភាគខាងត្បូងនៃប្រទេសថៃ ហើយត្រូវបានកាសែតបាងកកប៉ុស្តិ៍ផ្សាយនៅពេលថ្មីៗកន្លងមក ។ ការចោទប្រកាន់នេះ ជាមការមួលបង្កាច់ និងមានចេតនាមិនល្អ ។
ការបដិសេធចំពោះការចោទប្រកាន់នេះ បានធ្វើឡើងកាលពីវេលាម៉ោង១១ និង៥០នាទីថ្ងៃត្រង់ ថ្ងៃទី២៤ សីហា ២០១២ នៅវហារគីឡូម៉ែត្រលេខ៩ ក្នុងសង្កាត់ច្រាំងចំរេះទី១ ខណ្ឌប្ញស្សីកែវ ក្នុងឱកាសដែលលោកអញ្ជើញទៅថ្វាយបង្គំហើយជួបសម្ភាសន៍ជាមួយអ្នកយកព័ត៌មាន ។ នៅខណៈនោះ លោកឧកញ៉ាអូស្មាន ហាស្សាន់ ក៏បានអំពាវនាវដល់ថ្នាក់ដឹកនាំអ៊ិស្លាមទាំងអស់ឱ្យជួយផ្សព្វផ្សាយឱ្យបងប្អូនអ៊ិស្លាមបានយល់ ដែលគេមានបំណងអាក្រក់បែបនេះ ។
លោកឧកញ៉ាអូស្មាន ហាស្សាន់ បានឱ្យដឹងថា ខ្មែរអ៊ិស្លាមស្លូតបូតស្រឡាញ់សន្តិភាពមិនអាក្រក់ដូចគេចោទប្រកាន់ថា ត្រូវបានគេជួលឱ្យទៅធ្វើសង្គ្រាមនោះទេ ។ គ្មានអ្វីមួយដែលអាចបញ្ជាក់ថា ខ្មែរអ៊ិស្លាមធ្វើដំណើរទៅប្រទេសថៃ បង្កការអុកឡុកឡើយ ។ការធ្វើដំណើរទៅប្រទេសថៃ របស់បងប្អូនខ្មែរអ៊ិស្លាម គឺឆ្លងទៅរកស៊ី និងធ្វើអាជីវកម្មផ្សេងៗនៅប្រទេសម៉ាឡេស៊ី តាមផ្លូវគោកដោយស្របច្បាប់ ដែលចំណាយអស់ថវិកាតិច ។ ការធ្វើដំណើរសុទ្ធតែមានលិខិតត្រឹមត្រូវ និងស្របច្បាប់ ។ ខ្មែរអ៊ិស្លាមគ្មានអំពើណាមួយរួមគំនិតក្នុងការបង្កើតចលាចលនោះទេ ។
លោកឧកញ៉ាអូស្មាន ហាស្សាន់ បានឱ្យដឹងទៀតថា ថ្នាក់ដឹកនាំថៃគួរតែយល់ ហេតុអ្វីបានជាអ៊ិស្លាមកម្ពុជារស់នៅមានសេចក្តីសុខ ហើយហេតុអ្វីបានជាអ៊ិស្លាមថៃរស់នៅជាមួយគ្នាគ្មានសេចក្តីសុខនោះ ។ លោកឧកញ៉ាក៏បានណែនាំដល់ថ្នាក់ដឹកនាំអ៊ិស្លាមត្រូវបំភ្លឺថា អ៊ិស្លាមកម្ពុជាល្អមិនបង្កការអុកឡុក ឬស៊ីឈ្នួលធ្វើសង្គ្រាមដូចការចោទប្រកាន់នោះទេ ។ ដូចនេះសូមធ្វើការផ្សព្វផ្សាយដល់បងប្អូនខ្មែរអ៊ិស្លាមយើងបានយល់កាន់តែច្បាស់ចំពោះបំណងប្រាថ្នានេះ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ